ބީއެމްއެލް ނޯތު ރީޖަން ލީގުގެ ކޮލިފައިން ޒޯން ދޭއްގެ ފޯރިގަދަ ފައިނަލް މެޗުގައި، އޭދަފުށީގެ މައްޗަށް 6-5 އިން ކުރިހޯދައި ނ. މަނަދޫ އިން މުބާރާތުގެ ޗެމްޕިއަންކަން ހޯދައިފިއެވެ. އޭދަފުށީ ފުޓްބޯޅަ ސްޓޭޑިއަމްގައި ކުޅުނު މި މެޗުގައި މަނަދޫ މޮޅުވީ، އޭދަފުށިން ބޮޑު ލީޑެއް ނަގާފައި ވަނިކޮށް ހިތްވަރާއެކު ކުޅެ، ފަހަތުން އަރައި ކާމިޔާބުކުރި ގޯލުތަކުންނެވެ. މެޗުގެ ފުރަތަމަ ހާފު އޭދަފުށިން ނިންމާލީ 4-1 ގެ ބޮޑު ލީޑަކާއެކު އެވެ. ނަމަވެސް، މެޗުގެ 19 ވަނަ މިނެޓުގައި އޭދަފުށީގެ ގޯލްކީޕަރު މުހައްމަދު ޒަޔާން އަހުމަދަށް ސީދާ ރަތް ކާޑެއް ދެއްކުމުން، މެޗުގެ ބާކީ ބައި އެޓީމުން ކުޅެން ޖެހުނީ އެކަކު މަދުކޮށެވެ. އޭދަފުށީގެ ގޯލުތައް ކާމިޔާބުކޮށްދިނީ ދެ ގޯލު ޖެހި ހުސައިން ޝަރީފް، އަލީ ނަސީމް، މިމްރާހް އަބްދުލްއަޒީޒް އަދި އިބްރާހީމް ޝަރީފެވެ. ދެވަނަ ހާފުގައި މަނަދޫން ވަނީ ކުޅުން ވަރުގަދަކޮށް، މެޗުގެ ފަހުކޮޅު ގާތްގާތުގައި ލަނޑުތައް ޖަހައި ނަތީޖާ އަނބުރާލާފަ އެވެ. އެޓީމަށް ރައުފަތު އަބޫބަކުރު އަދި އަމްދާހު އަލީ ކުރެ ކޮންމެ ކުޅުންތެރިއަކު ދެ ގޯލު ޖަހައިދިންއިރު، އަހުމަދު އަލީ ވެސް ވަނީ ގޯލެއް ކާމިޔާބުކޮށްފައެވެ. މަނަދޫ މޮޅުކޮށްދިން ނިންމާލި ގޯލު މެޗުގެ ފަހު ވަގުތު ކާމިޔާބުކޮށްދިނީ ޚަލަފް އަހުމަދެވެ. މަނަދޫން ދިޔަ ގިނަ އަދަދެއްގެ ސަޕޯޓަރުންގެ މެދުކެނޑުމެއް ނެތް ތަރުހީބަކީ މި އެނބުރި އައުމުގައި އެޓީމަށް ލިބުނު ބޮޑު ހިތްވަރެކެވެ. މި ކާމިޔާބީއާއެކު މަނަދޫ އާއި އޭދަފުށި ދެން ވާދަކުރާނީ އުތުރުގެ ރީޖަނަލް ކޮލިފައިންގަ އެވެ. ހަނިމާދޫ އާއި ދިއްދޫ ވެސް ހިމެނޭ މި ބުރުގެ މެޗުތައް ކުޅުމަށް ހަމަޖެހިފައިވަނީ "ހޯމް އެންޑް އަވޭ" އުސޫލުންނެވެ. މި ބުރުގެ ޗެމްޕިއަން ޓީމަށް ދިވެހި ޕްރިމިއާ ލީގުގެ ކޮލިފައިންގައި ވާދަކުރުމުގެ އަގުހުރި ފުރުސަތު ލިބިގެންދާނެ އެވެ.