އައްޑޫގައި 'އިކޮނޮމިކް ކޮރިޑޯ' އެއް ހެދުމުގެ ހިޔާލު އެންމެ ފުރަތަމަ ފާޅުރެއްވީ ކުރިއަށް ލޯކަލް ކައުންސިލް އިންތިހާބުގައި ވެރިކަން ކުރާ ޕީއެންސީގެ ޓިކެޓްގައި ވާދަކުރައްވާ މުޝްރިފް އަލީ ކަމަށް ހޯމްލޭންޑް މިނިސްޓަރު އަލީ އިހްސާން ވިދާޅުވެއްޖެ އެވެ.
އޭނަ އެގޮތަށް ވިދާޅުވީ އެފަދަ ކަމެއް ކުރުމުގެ ހިޔާލު ކުރީގެ ރައީސް މުހައްމަދު ނަޝީދު ހިއްސާ ކުރައްވައި އާންމު ކުރެއްވި ވީޑިއޯއަކާ ގުޅިގެންނެވެ. އޭގައި ނަޝީދު ވިދާޅުވެފައި ވަނީ އައްޑު އަށް ލިބިފައިވާ އެންމެ ބޮޑު ނިއުމަތަކީ އެތަން ގުދުރަތީ ގޮތުން އުފެދިފައި އޮތް ތަން ކަމަށާއި އެގޮތުން އައްޑޫ އޮތީ އިންޑިއާ ކަނޑުގެ ސީދާ މެދުގައި ކަމަށްވާއިރު، އެއްކޮޅުގައި އެފްރިކާ އަދި އަނެއްކޮޅުގައި އިންޑޮނޭޝިއާ އާއި މެލޭޝިއާއާއި ސިންގަޕޫރު ފަދަ ގައުމުތައް ހިމެނޭ ކަމަށެވެ.
އެހެންވެ ދުނިޔޭގެ އެކި ސަރަހައްދުތަކުން އުފުލާ ވަރަށް ގިނަ މުދާ އުފުލަނީ އިންޑިއާ ކަނޑު ހުރަސްކޮށް ކަމަށްވާތީ އިންޑިއާ ކަނޑުގައި އައްޑޫ ހިމެނޭ ގޮތަށް ގްރީން އިކޮނޮމިކް ކޮރިޑޯއެއް ހެދުން މުހިއްމު ކަމަށް ނަޝީދު ވިދާޅުވި އެވެ. އަދި އެ ކޮރިޑޯ ފަށަން އެންމެ ރަނގަޅު ތަނެއް ކަމަށް ފެނިވަޑައިގަންނަވަނީ މޮމްބާސާ އާއި ކެންޔާ، ދެން އައިސް އައްޑޫން ގޮސް ނިންމަން ޖަކާޓާ، އިންޑޮނޭޝިއާ ކަމަށް ނަޝީދު ވިދާޅުވި އެވެ.
އެ މަނިކުފާނު މި ވާހަކަ ހިއްސާކުރެއްވުމާ އެކު މިނިސްޓަރު އިހްސާން ސޯޝަލް މީޑިއާ ޕޯސްޓެއްގައި މުޝްރިފްގެ ކެމްޕޭނަށް 'ދަ ގްރޭޓާ އައްޑޫ' ގެ ނަމުގައި އެކުލަވާލާފައިވާ ތަސައްވުރުގައި އެފަދަ ކޮރިޑޯއެއްގެ ވާހަކަ ހިމަނާފައި އޮތްކަން ފާގަފަ ކުރައްވައި އެ ހިޔާލު އެންމެ ފުރަތަމަ ފާޅުކުރެއްވީ ވެސް މުޝްރިފް ކަމަށް ވިދާޅުވެފައިވެ އެވެ.
އަދި ނަޝީދާއި އައްޑޫގެ މިހާރުގެ މޭޔަރު އަލީ ނިޒާރު ފަދަ ބޭފުޅުން އެ ހިޔާލު އެންޑޯޒް ކުރައްވާކަން ފާހަގަކުރައްވާފައިވެ އެވެ. އެހެންވެ ކުރިއަށް އޮތް ކައުންސިލް އިންތިހާބަށް ޕީއެންސީން އައްޑު އަށް ގެންގުޅޭ ސިސާސަތުތަކަށް އެ ބޭފުޅުން ތާއީދު ކުރައްވާތީ ޝުކުރު އަދާ ކުރައްވާ ކަމަށް ވެސް އައްޑު އަށް ނިސްބަތްވާ މިނިސްޓަރު ވިދާޅުވި އެވެ.
ނަމަވެސް ފާހަގަކޮށްލެވޭ ކަމަކީ މުޝްރިފްގެ 'ދަ ގްރޭޓާ އައްޑޫ' ތަސައްވުުރުގައި އިކޮނޮމިމް ކޮރިޑޯއެއްގެ ވާހަކަ ހިމަނައި މިދިޔަ މަހުގެ ތެރޭގައި އިއުލާން ކުރެއްވުމުގެ ކުރިން އައްޑޫ މޭޔަރު މިދިޔަ އަހަރުގެ ޑިސެންބަރު މަހު ކެންޔާގެ ނައިރޯބީގައި ބޭއްވި އދ. ގެ އެންވަޔަރަމަންޓް އެސެމްބްލީގެ 7 ވަނަ ބައްދަލުވުމަށް ވަޑައިގެންނެވުމުގެ ކުރިން ވެސް މޭޔަރާއ ނަޝީދާ ދެމެދު އެފަދަ މަޝްވަރާތަކެއް ކުރެވި، ނިޒާރުގެ ދަތުރުގެ ތެރޭގައި ވެސް އެކަމާ ގުޅުން ހުރި މަސައްކަތްތަކެއް ކުރެވިފައިވާކަމެވެ.