ސިވިލް ކޯޓުގެ ދެ ގާޒީން ކަމަށްވާ، ހާފިޒާ އަބްދުއްސައްތާރާއި އަބްދުﷲ އިހްސާނާ ދެކޮޅަށް، ސިވިލް ކޯޓުގެ މުވައްޒަފުންތަކެއް ޖޭއެސްސީއަށް މައްސަލައެއް ހުށަހަޅައިފިއެވެ. މައުލޫމާތު ލިބިފައިވާ ގޮތުގައި ހާފިޒާއާއި އިހުސާނާ ގުޅޭ ގޮތުން ސިވިލް ކޯޓުގެ މުވައްޒަފުންތަކެއް ހުށަހެޅި މައްސަލައާ މެދު ޖުޑީޝަލް ސަވިސް ކޮމިޝަނުން އަދި ވަކި އެއްޗެއް ނުބުނެއެވެ. މައުލޫމާތު ލިބިފައިވާ ގޮތުގައި، ގާޒީ ހާފިޒާއާ ގުޅޭ ގޮތުން މުވައްޒަފުން ހުށަހަޅާފައިވަނީ، މުވައްޒަފުންނާ މުއާމަލާތްކުރާ ގޮތާއި އަމަލުތައް ބަހައްޓަވާ ގޮތާމެދު ހިތްހަމަ ނުޖެހިގެންނެވެ. މި މައްސަލަ ހުށަހަޅާފައިވަނީ މިދިޔަ ހަފުތާގައި ކަމަށްވަނީ މައުލޫމާތު ލިބިފައެވެ. މީގެ ކުރިންވެސް ހާފިޒާއާ ގުޅޭ މައްސަލަތަކެއް ޖޭއެސްސީއަށް ހުށަހެޅިއެވެ. ގާޒީ އިހްސާނާ ގުޅޭ ގޮތުން މައްސަލައެއް ޖޭއެސްސީއަށް ހުށަހަޅާފައިވަނީ މީގެ ދުވަސްކޮޅެއް ކުރިން ކަމަށްވަނީ މައުލޫމާތު ލިބިފައެވެ. އެ މައްސަލައިގެ ތަފުސީލެއް ލިބިފައި ނެތް ނަމަވެސް، އެ މައްސަލަ ބަލަން ފަށާފައިވާ ކަމަށް ބައެއް ރިޕޯޓްތައް ބުނެއެވެ. ގާޒީ އަބްދުﷲ އިހްސާން: އޭނާއާ ދެކޮޅަށް ސިވިލް ކޯޓު މުވައްޒަފުން ވަނީ ޖޭއެސްސީއަށް މައްސަލަ ހުށަހަޅައިފައި -- ސިވިލް ކޯޓުގެ އެހެން ދެ ގާޒީއެއްގެ މައްސަލަތަކެއް ވެސް ޖޭއެސްސީން ބަލަމުން އަންނައިރު، އޭގެ ތެރޭގައި ޖިނާއީ ތުހުމަތުތަކެއް ހިމެނޭ މައްސަލަތަކެއްވެސް ކުރިއަށްދާ ކަމަށްވަނީ މައުލޫމާތު ލިބިފައެވެ. އަދި އޭގެ ތެރެއިން އެއް މައްސަލަ، ފުލުހުންވެސް ބަލަމުން އަންނަ ކަމަށްވަނީ މައުލޫމާތު ލިބިފައެވެ. https://sun.mv/214188 ސިވިލް ކޯޓުގެ އިސްގާޒީ މަރިޔަމް ވަހީދުގެ މައްސަލައެއް ވެސް އެ ކޯޓުގެ މުވައްޒަފުން ޖޭއެސްސީއަށް ކުރިން ހުށަހެޅި އެވެ. އެކަމަކު އެ މައްސަލަ ވެސް ކުރިއަށްދާ ގޮތެއް ނުވެއެވެ. ހައިކޯޓުގެ ފަސް ފަނޑިޔާރެއްގެ މައްސަލަވެސް ޖޭއެސްސީން ބަލަމުން އަންނަކަމަށް ރިޕޯޓްތައް ވަނީ ލިބިފައެވެ. އެކަމަކު އޭގެ ތެރޭގައި ހިމެނޭ ފަނޑިޔާރު މުހައްމަދު ފައިސަލް، ވަނީ މަގާމުން އިސްތިއުފާ ދެއްވައިފައެވެ. https://sun.mv/214305 ފައިސަލްގެ މައްޗަށް ހުށަހެޅިފައިވާ މައްސަލަތަކެއް ބަލަމުން އަންނަ ކަމަށް، އެންޓި-ކޮރަޕްޝަން ކޮމިޝަން (އޭސީސީ)އިން ފަހުން ވަނީ ބުނެފައެވެ. މި އަހަރު ތެރޭ ޖޭއެސްސީއާއި އޭސީސީން ސުޕްރީމް ކޯޓުގެ ތިން ފަނޑިޔާރެއްގެ މައްސަލަތައް ވެސް ބެލިއެވެ. އެއީ ހުސްނުއްސުއޫދާއި އަޒްމިރަލްދާ ޒާހިރާއި މަހާޒު އަލީ ޒާހިރެވެ. އެ ތިން ފަނޑިޔާރުން ސަސްޕެންޑުކުރުމުން ސުއޫދު އިސްތިއުފާ ދެއްވިއެވެ. އަދި ޖޭއެސްސީން މައްސަލަ ބެލި ގޮތަށް ފާޑުކިޔުން އަމާޒުވެފައި ވަނިކޮށް، އެ ކޮމިޝަނުން ވަނީ މަހާޒާއި އަޒްމިރަލްދާ މަގާމުން ވަކިކުރަން ނިންމައިފައެވެ. އެއަށްފަހު މަޖިލީހުން ވަނީ އެ ދެ ބޭފުޅުން ފަނޑިޔާރުކަމުން ވަކިކޮށްފައެވެ.