އދ. މާމިގިލީ ކަނދިލި މިސްކިތް ތަރިކައިގެ ރަސްމީ ލިސްޓުގައި ހިމަނަން ހެރިޓޭޖު މިނިސްޓްރީން ނިންމައިފި އެވެ.
ވީ ކިހިނެއް؟ - ހެރިޓޭޖު މިނިސްޓްރީން މިއަދު ކުރި ޕޯސްޓެއްގައި ބުނި ގޮތުގައި ކަނދިލި މިސްކިތަކީ ވަރަށް މަތީ ފެންވަރުގެ ރީތި ހިރިގަލުގެ ފަންނީ މަސައްކަތްތަކެއް ފެންނަ މިސްކިތެކެވެ. އަދި އެކަމާ ގުޅޭ އިތުރު މަޝްވަރާތައް މިނިސްޓަރު އާދަމް ނަސީރާއި މާމިގިލީ ކައުންސިލްގެ ރައީސް އިމާދު ފާރޫގާ ދެމެދު ވަނީ ކޮށްފަ އެވެ.
ތަފްސީލު - މާމިގިލިން 'ދައުރު'އަށް މައުލޫމާތު ދިން މީހަކު ބުނި ގޮތުގައި ކަނދިލި މިސްކިތަކީ ގާތްގަނޑަކަށް 600 ނުވަތަ 700 އަހަރު ވެފައިވާ މިސްކިތެކެވެ.
އޭނާ ބުނި ގޮތުގައި:
ކަނދިލި މިސްކިތަކީ އެއްވެސް ވަރަކަށް ސިމެންތި ބޭނުންނުކޮށް، ގަލުގެ ކެނޑުންތަކަށް ގާތައް ފައްތައިގެން ރާވާފައިވާ މިސްކިތެއް
މިސްކިތުގެ ވަޅު ވެސް ރާނާފައިވަނީ ހަމަ އެ ބީދައިން
ކުރިން ހިޔާކޮށްފައި ހުރީ އެންމެ އިހު ޒަމާނުގެ އީޓުން؛ ނަމަވެސް ފަހުން ބަދަލުތަކެއް ގެނެސް، މަތިވަޑާންގަނޑު ވަނީ ބަދަލުކޮށްފައި
ކަނދިލި މިސްކިތުގައި ކުރިން ހުރި ކަނދިލި (ފާނޫޒެއް ކަހަލަ އެއްޗެއް) މާލެއަށް ގެނެސް ވަނީ ދާރުލްއާޝާރަށް ނަގާފައި
އެނގުން މުހިންމު - އޭނާ ބުނި ގޮތުގައި ކަނދިލި މިސްކިތަކީ މާމިގިލީގައި ހުރި އާސާރީ ހަމައެކަނި މިސްކިތެވެ. ކުރިން ހުރި މާ މިސްކިތް އުވާލައި، އެ ތަން ރޫޅާލުމަށް ފަހު މާމިގިލި ސްކޫލް އެޅީ، އޭނާ ބުނި ގޮތުގައި އެ މިސްކިތުގެ ގަލުންނެވެ.
އެ މިސްކިތް އުވައިލީ ގަބުރުސްތާނެއްގެ މަތީގައި އެތަން ހުރުމުންނެވެ.