ހުޅުމާލެ ވޯޓާ ތީމް ޕާކަށް މިރޭ ގިނަ އަދަދެއްގެ ފުލުހުން ވަދެ، ވެއްޓިފައި އޮތް މީހަކު ގެންގޮސްފިއެވެ. މިރޭ 21:45 ހާއިރު އެ ސަރަހައްދުގައި ހުރި 'ސަން'ގެ ނޫސްވެރިއަކަށް ވަނީ، ހަތަރު ސައިކަލުގައި ފުލުހުން އެ ސަރަހައްދަށް ދިޔަ މަންޒަރު ފެނިފައެވެ. އޭގެފަހުން، ފުލުހުންގެ ކާރެއް ގޮސް، އެއް ފަހަރާ ވޯޓާ ތީމް ޕާކަށް ވަންނަ މަންޒަރު ވަނީ ފެނިފައެވެ. އެ ސަރަހައްދުގައި ފުލުހުން ހަރަކާތްތެރިވުމަށް ފަހު ނުކުތްއިރު، ވެއްޓިފައި އޮތް މީހަކު އަތްދަނޑި މައްޗަށް ލާފައި އޮތެވެ. އަދި، އޭނާ ގޮވައިގެން ފުލުހުންގެ ކާރުގައި ދިޔަ މަންޒަރު ވެސް 'ސަން'ގެ ނޫސްވެރިޔާއަށް ވަނީ ފެނިފައެވެ. އެ ސަރަހައްދަކީ، މަސްތުވާތަކެެއްޗާއި ފޭރުމުގެ ކަންކަން ބޮޑު ހިސާބެއް ކަމަށްވާއިރު، މި ކަމާ ގުޅިގެން މިހާތަނަށް ފުލުހުންގެ ބަހެއް ލިބިފައެއް ނުވެއެވެ. މީގެކުރިން، މިދިޔަ އޮގަސްޓު 25ގައި އެ ސަރަހައްދުން ވަނީ މަރުވެ، ކުނިވެފައި އޮތް މީހެއްގެ ހަށިގަނޑު ފެނިފައެވެ. ފުލުހުން ވަނީ އެއީ ނޭޕާލަށް ނިސްބަތްވާ، ރުޕަން ތަޕާ މަގަރު ކިޔާ 29 އަހަރުގެ މީހެއް ކަމަށް ބުނެފައެވެ. https://sun.mv/210529 އެ މަރުގައި ތުހުމަތުކުރެވޭ ކަމެއް ނެތް ކަމަށް ބެސް ފުލުހުން ވަނީ ބުނެފައެވެ. ވޯޓާ ތީމް ޕާކް ހެދުމުގެ މަސައްކަތް މެލޭޝިއާގެ ކުންފުންޏަކާ 2017 ވަނަ އަހަރު ހަވާލުކުރި ނަމަވެސް، އެ މަސައްކަތް ނުނިމި، މިހާރު އެ ސަރަހައްދު އޮންނަނީ ބޭނުންނުކޮށެވެ.