ތަންކޮޅެއް ކުރިއަށް ބަލައިފިނަމަ ދަރިންނަށް އެންމެ ފުރަތަމަ ދަސްކޮށްދެވެނީ ޤުރްއާން ކިޔެވުމަށާއި ނަމާދުކުރުމަށެވެ. މިހާރުވެސް ގިނަ ބެލެނިވެރިން އެމީހުންގެ ދަރިންނަށް އެމަގުން ޤުރްއާން އުނގަންނައިދެއެވެ. ނަމަވެސް ނަމާދަށް އެވަރަށް ސަމާލުކަންދޭކަމަށް ބުނަން އުނދަގުލެވެ. ނަތީޖާއަކަށްވަނީ ނަމާދާއިމެދު ދަރިންނަށް އެކަށީގެންވާވަރަށް މަޢުލުމާތު ނުލިބުމެވެ.
އަހުރެން ބުނާނީ ނަމާދުކުރަން ބޭނުން ނުވާނެ އަދި ނަމާދުގައި ފަރުވާކުޑަކުރަން ބޭނުންވާނެ މުސްލިމަކު ނުހުންނާނެ ކަމަށެވެ. ނަމަވެސް ފަރުވާކުޑަކުރެވެނީއެވެ. ދޭންޖެހޭ ސަމާލުކަން ނުދެވެނީއެވެ. ވީމާ ޙައްލަކީ ނަމާދާއިމެދު ގިނަ ކަންކަން އެނގި ހޭލުންތެރިވުމެވެ. އެހެންކަމުން މުހިންމު ބައެއް ކަންކަން ފާހަގަކޮށްލާނަމެވެ.
މުސްލިމް ލަޝްކަރުގެ ފާރަވެރިއަކަށް ރަސޫލް (ﷺ) ބެހެއްޓެވި ޞަހާބީއަކު ނަމާދަށް ހުންނަވަނިކޮށް ހަށިކޮޅަށް ދުޝްމިނުންގެ 3 ތީރު އެރިއިރުވެސް އެންމެ ކުޑަމިނުން އެއިން ތީރެއްވެސް އުފުރޫއްވައި ނުލައްވަވައި ދެމި ހުންނެވީ ނަމާދުކުރެއްވެވުމުގައެވެ. އެއިރު ކިޔަވައި ވިދާޅުވަމުން ގެންދެވި ސޫރަތަކީ ވަރަށް ލޯބިފުޅުވާ ސޫރަތަކަށްވާތީ އަމިއްލަފުޅު ފުރާނަފުޅަށްވުރެ އިސްކަން ދެއްވެވީ ސޫރަތް ނިންމަވާލައްވައި ނަމާދު ފުރިހަމަކުރެއްވެވުމަށެވެ. މިއީ އެބޭކަލުންގެ ހިތްޕުޅުގައި ނަމާދުކުރެއްވެވުމަށާއި ކީރިތި ޤްރުއާން ކިޔަވައި ވިދާޅުވުމަށް އޮތް ލޯބީގެ މަތިވެރިކަން އެނގިގެންދާ ކަމެކެވެ.
ބޭކަލެއްގެ ފައިންޕުޅު ބުރިކޮށްލަން ޖެހުނެވެ. ވިދާޅުވީ ނަމާދުގައި ހުންނަވަނިކޮށް އެކަން ކުރުމަށެވެ. އަޅާނެ ވޭން ނިކަން ވިސްނައިލަބަލާށެވެ! ނަމަވެސް އެ ބޮޑު އޮޕަރޭޝަންކޮށް ނިންމައިލިއިރުވެސް އެއްވެސް އެއްޗެއް ވިދާޅެއް ނުވެއެވެ. ނަމާދުގައި ދެމިހުންނެވީއެވެ.
އިމާމް ބުޚާރީގެ ދަރިވަރުން ބަޔާންކުރއްވާފައިވެއެވެ. ނަމާދު ނިމިވަޑައިގެން ބުރަކަށިފުޅުގައި އެއްޗެއް އިންހެން ހީފުޅުވެގެން ލިބާސްކޮޅު ނަންގަވައި ބެއްލެވިއިރު މުޅި ބުރަކަށިފުޅުގައި އެތައްބައިވަރު ކުޅަނދުރުތަކެއް ތިއްބެވެ.
ޢަލީގެފާނު ގެކޮޅުގައި ނަމާދަށް ހުންވަނިކޮށް ގެކޮޅުގައި އަލިފާންރޯވިއެވެ. މީސްތަކުން އެއްވެ ގެކޮޅުން ނުކުމެވަޑައިގަންނަވަން ދެންނެވިއެވެ. ނަމަވެސް ނުކުމެވަޑައިގަތީ ނަމާދު ނިންމަވައިފައެވެ.
އަހަރެމެންނަށް މިކުރެވެނީ ނަމާދު ހެއްޔެވެ؟ އަހަރެމެންގެ ކިބައިގައި ޚުޝޫޢަތްތެރިކަން ހުރީ ކިހައިވަރަކަށް ހެއްޔެވެ؟ ނަމާދު ނުކޮށް ތިބެން ބިރު ނުގަންނަނީ މިކަންކަން އެނގޭ ހާލުގައި ހެއްޔެވެ؟
އިބިލީސް ސުވަރުގެއިން ބޭރުކޮށްލައްވައި ލައްނަތް ލައްވަވައި ނަރަކައިގެ އެންމެ އަޑިން ޖާގަ ދެއްވެވީ ﷲ ތަޢާލާގެ އަމުރުފުޅަށް އާދަމްގެފާނަށް ސަޖިދަ ނުކުރުމުންނެވެ. އާދަމްގެފާނަކީ ﷲ ތަޢާލާ އުފެއްދެވި މަޚްލޫޤެކެވެ. އިބިލީސް އިބިލީހަކަށް ވެގެންދިއައީ ﷲ ތަޢާލާގެ އަމުރުފުޅަށް ނުކިޔަމަންތެރިވެ ﷲ ތަޢާލާ އުފެއްދެވި މަޚްލޫޤަކަށް ސަޖިދަ ނުކުރުމުންނެވެ! ވީއިރު ﷲ ތަޢާލާގެ އަމުރުފުޅަށް ﷲ ތަޢާލާއަށް އަހަރެމެން ސަޖިދަ ނުކުރާނަމަ އަހަރެމެންގެ ޙާލަކީ ކޮބައިހެއްޔެވެ؟
--އިސްލާމީ ތިލަފަތުގެ ދަރުސަކުން