ޑޮލަރުގެ ދަތިކަމުގެ މައްސަލައާ ގުޅޭގޮތުން މަރުކަޒީ ބޭންކް، އެމްއެމްއޭއާ ބައްދަލުކުރާ މާލިއްޔަތު ކޮމިޓީގެ ބައްދަލުވުން ގަވަރުނަރު އަހުމަދު މުނައްވަރު އެދިލެއްވުމުން މިއަދު ސިއްރުކޮށްފިއެވެ.މާލިއްޔަތު ކޮމިޓީއަށް ގަވަރުނަރު ހާޒިރުވެވަޑައިގަތީ، ރާއްޖެއަށް ކުރިމަތިވެފައިވާ ޑޮލަރުގެ ދަތިކަމާ ގުޅޭ ގޮތުންނާއި އެމްއެމްއޭ އިން ކުރާ ބައެއް މަސައްކަތްތަކާ ގުޅޭ ގޮތުން މައުލޫމާތު ހިއްސާކުރައްވަން އޭނާ އެދިވަޑައިގެންނެވެ.ކޮމިޓީގެ ބައްދަލުވުން ފެށުމާ އެކު، ރިޔާސަތުގައި އިންނެވި ކޮމިޓީގެ ނައިބު މުގައްރިރު، އޭދަފުށީ ދާއިރާގެ ޕީއެންސީ މެންބަރު އަދި ވިޔަފާރިވެރިޔާ އަހްމަދު ސަލީމް (ރެޑްވޭވް ސަލީމް) ވިދާޅުވީ މި ބައްދަލުވުން ސިއްރު ކުރުމަށް އެމްއެމްއޭއިން އެދިފައިވާ ކަމަށެވެ."އެމްއެމްއޭގެ ގަވަރުނަރު [އަހްމަދު މުނައްވަރު] ބޭނުންފުޅުވަނީ މި ކޮމިޓީ ސިއްރުކޮށްގެން ކުރިއަށް ގެންގޮސްދެއްވުމަށް،" ވަކި ސަބަބެއް ފާހަގަކުރެއްވުމެއް ނެތި ސަލީމް ވިދާޅުވި އެވެ.އެއާ އެކު، ކޮމިޓީގައި އެމްޑީޕީ ތަމްސީލު ކުރައްވާ ހަނިމާދޫ ދާއިރާގެ މެންބަރު އަބްދުލްގަފޫރު މޫސާ އާއި ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު އެކަމާ ދެކޮޅަށް ވާހަކަ ދެއްކެވި އެވެ.ޑޮލަރު ތާށިކަން ބޮޑުވެ، އޭގެ ނުރަނގަޅު އަސަރުތައް އިގުތިސޯދަށްކޮށް، ވިޔަފާރިތަކާއި ރައްޔިތުންނަށް އަންނަނީ އޭގެ އަސަރުތައް ފެންނަމުންނެވެ. ކަޅު ބާޒާރުގައި ޑޮލަރެއް ގަންނަން ލިބެން ހުރި އަގު ރެކޯޑު މިންވަރަކަށް އުފުލިފައިވާއިރު، މިކަމުގައި އެމްއެމްއޭއިން ބަހެއް ނުބުނާތީ ކަންބޮޑުވުން ވެސް ބޮޑެވެ.