ބައެއް ލިޔުންތެރިންގެ ވާހަކަތައް ކަމުގޮސް ލޯބިކުރެވެން ފެށީމާ އެމީހުން ލިޔެފައި ހުންނަ ވާހަކަތައް ކިޔަމުއެވެ. އެހިސާބުން އެކަން އެއޮތީ ނިމިފައެވެ. އިސްލާމް ދީނަށް ބަލައިފިނަމަ އަހުރެމެން ކީރިތި ޤުރްއާން ކިޔަވަނީ ﷲ ތަޢާލާއަށް ލޯބިންނެވެ. އެކަމަކު އެކަން އހިސާބުން ނިންމައިލެވޭކަށް ނެތެވެ. ޤުރްއާން ކިޔެވިނަމަވެސް ތިބާއަށް ހަމަ ހަޤީޤަތުގައިވެސް ﷲ ތަޢާލާ ދެކެ އެބަ ލޯބިވެވޭ ހެއްޔެވެ؟ މި ވާހަކަތައް އަޑުއަހާފައި ނިކަން ޖަވާބު ދީބަލާށެވެ! 
ތިބާ ތިއައުޅެނީ މީހަކުދެކެ ލޯބިވެގެންނެވެ. އެންމެ އިސްކަންދީގެން މަސައްކަތް ތިއަކުރަނީ އޭނާގެ ލޯބިހޯދުމަށެވެ. އޭނާގެ ރުހުން ހޯދުމަށެވެ. ކެތްތެރިކަމެއް ނެތި އިންތިޒާރު ތިއަކުރަނީ ލޯބިވެރިޔާއާއި ބައްދަލުކުރުމަށެވެ.
ދެން ނިކަންބުނެބަލާށެވެ! އެލޯބިވެރިޔާ ތިބާ އާއި ބައްދަލުކުރަން ތިބާގެ ގާތަށް އަންނަނީއެވެ. އަންނާނެ ވަޤުތުވެސް އެބަ އެނގެއެވެ. ޖަވާބުދޭންވީ ސުވާލަކީ އެކަމަށް ފަރުވާކުޑަކޮށްލާފައި ކަންނެތްވެ އެ ވަޤުތު ތިބާ ނިދަން އޮވެދާނެ ހެއްޔެވެ؟ ކޮންމެއަކަސް ތެދުބަހުން ޖަވާބުދޭނެ ކޮންމެ މީހަކުވެސް ބުނާނީ ދެއެސްފިޔައިގަ އިލޮށިވިއްދައިގެންނަމަވެސް މަތިމައްޗަށް ކޮފީބޮއިގެންވެސް ހޭލައި ހުންނާނެ ކަމެވެ. އަދި ނިދިއައިސްގެން ނިދިޔަސް ނިދާނީ އެގަޑިއަށް ހޭލެވޭނެ އިންތިޒާމުތައް ހަމަޖައްސައިގެންކަމަށެވެ. 
ދެން ނިކަން ބުނެބަލާށެވެ! އަހަރެމެން މުސްލިމުން އެންމެ ބޮޑަށް ލޯބިވާން އޮތީ ﷲ ތަޢާލާ ދެކެއެވެ. އެންމެ ބޮޑަށް ބޭނުންވަނީ ﷲ ތަޢާލާ އާއި ބައްދަލުކުރުމަށެވެ. އެންމެ ބޮޑަށް ބޭނުންވަނީ ﷲ ތަޢާލާގެ ރުހިވޮޑިގަތުމެވެ. އަހަރެމެންގެ ބޭނުންތައް ފުއްދަވައި ދެއްވެވޭނީވެސް ﷲ ތަޢާލާއަށެވެ. 
ކޮންމެ ރެއެއްގެ ފަހުދަންފަޅީގައި ﷲ ތަޢާލާ ބިމުގެ އުޑަށް އެބަ ކުއްތަންވެވޮޑިގަންނަވައެވެ. އަހަރެމެންގެ ތެރެއިން އެކަލާނގެ ޙަޟްރަތުން ކަންކަމު އެދި ދަންނަވަނީ ކޮން ބައަކުތޯ އާއި އެދެނީ ކޮންކަމަކުކަން އެބަބައްލަވައެވެ. އަދި އެދޭ ކަންކަން ފުއްދަވައި ދެއްވަވާނެ ކަމަށްވެސް އެބަ ވަޙީކުރައްވަވައެވެ. 
ނަމަވެސް އަހަރެމެން މިތިބެނީ ކަންނެތްވެ ނިދާފައެވެ. ރޭއަޅުކަމެއް ނުކުރެއެވެ. ދުޢާއެއް ނުކުރެއެވެ. އެހެންކަމަށްވާއިރު ﷲ ތަޢާލާ ދެކެ އެބަ ލޯބިވެވޭހެއްޔެވެ؟ ﷲ ތަޢާލާގެ ޙަޟްރަތުން އެދި ދަންނަވާނެ އެއްވެސް ކަމެއް ނެތީހެއްޔެވެ؟ 
އެންމެ ރަނގަޅެވެ. ތިބާއަކީ ތަނަވަސްކަން ލިބިގެންވާ މީހެކެވެ. އުނިވާ އެއްވެސް ކަމެއް ނެތެވެ. އެހެންވެ ދުޢާކުރާނެ ކަމެއް ނެތިގެން ދުޢާނުކޮށް ކަންނެތްވެ ނިދަނީއެވެ. އެންމެ ރަނގަޅެވެ. ނިކަން ބުނެބަލާށެވެ! ތިބާގެ ފާފަތައް ފުއްސަވައި ދެއްވަވާފައިވާކަން އެނގެނީހެއްޔެވެ؟ ސުވަރުގެ ލިބޭނެކަން ޔަޤީންވީހެއްޔެވެ؟ ބަލިނުވާނެކަން އެނގެނީހެއްޔެވެ؟ ﷲ ތިބާއަށް ދެއްވަވާފައިވާ ތަނަވަސްކަން އަނބުރައި ނުގެންދަވާނެކަން އެނގެނީހެއްޔެވެ؟ 
ހަމަ ޔަޤީނެވެ. މިއިން އެއްވެސް ކަމަކަށް އެއްވެސް ޔަޤީންކަމެއް ނުލިބޭނެއެވެ. އެހެންވީއިރު ދުޢާނުކޮށް ކަންނެތްވެ ނިދަން ތިއައޮތީ ކީއްވެގެންހެއްޔެވެ؟ 
ލޮބުވެތިއަޚުންނާއި އުޚުތުންނޭވެ! ތަހައްޖުދުނަމާދަށް ކަންނެތްނުވާށެވެ! ބިމުގެ އުޑަށް ﷲ ތަޢާލާ ކުއްތަންވެވޮޑިގަންނަވާއިރަށް އިސްތިޤްބާލްކޮށް ކިޔަމަންތެރިވެ ތިމާގެ ބޭނުންތައް ފުއްދަވައި ދެއްވެވުން އެދެން ތައްޔާރަށް ހުންނަ މީހަކަށްވާށެވެ! އެދޭ ކަންކަން ހިންމަވައި ދެއްވަވާނެތެވެ. ދުނިޔެއާއި އާޚިރަތްވެސް ކާމިޔާބުކުރެވޭނެއެވެ. އިން ޝާ ﷲ
 
- އިސްލާމީ ތިލަފަތުގެ ދަރުސަކުން
miadhu.mv