މާލޭގެ ބައެއް ސަރަހައްދުތަކުން މިއަދު ކަރަންޓް ކެނޑުނީ ޖަނަރޭޓަރަކަށް ދިމާވި މައްސަލައަކާ ގުޅިގެން ކަމަށް ސްޓެލްކޯއިން ބުނެފި އެވެ.
ސަރުކާރުގެ ކަރަންޓް ކުންފުނީގެ އޮފިޝަލަކު ވިދާޅުވީ މިއަދު ހެނދުނު ބައެއް ސަރަހައްދުތަކުން ކަރަންޓު ކެނޑިފައިވާ ކަމަށެވެ. އަދި އިންޖީނަށް ދިމާވި މައްސަލަ މިހާރު ހައްލުކޮށްފައިވާ ކަމަށް އޭނާ ވިދާޅުވި އެވެ.
"އިންޖީނުތަކަށް މައްސަލަ ދިމާވެގެން ކަރަންޓް ކެނޑޭ މައްސަލަ އެބަ ދިމާވޭ. އިއްޔެ ވެސް އަލަށް ބެހެއްޓި އެއް ޖަނަރޭޓަރަށް ދިމާވި މައްސަލައަކާ ގުޅިގެން ކަރަންޓް ކެނޑުނު. އެކަމަކު އެ މައްސަލަ ވެސް ހައްލުކޮށް ވަރަށް އަވަހަށް ކަރަންޓް އަލުންދިން،" އެ އޮފިޝަލް ވިދާޅުވި އެވެ.
ސްޓެލްކޯގެ އޮފިޝަލް ވިދާޅުވީ އަލަށް ބެހެއްޓި ދެ ޖަނަރޭޓަރުގެ ތެރެއިން އެއް ޖަނަރޭޓަރު އަދިވެސް ހަވާލުނުކުރާ ކަމަށެވެ. އަދި އެ ޖަނަރޭޓަރު ބޭނުންކުރަން ފެށުމުން މިހާރު ދިމާވާ މައްސަލަ ވަރަށް ބޮޑަށް ހައްލުވާނެ ކަމަށް އޭނާ ވިދާޅުވި އެވެ.
މާލޭގެ އެކި ސަރަހައްދުތަކުން ކުއްލިއަކަށް ކަރަންޓް ކެނޑުމާ ގުޅިގެން ވަރަށް ގިނަ ބަޔަކު އެކަމާ ޝަކުވާކުރެ އެވެ. އަދި ޝޯޝަލް ނެޓްވޯކްތަކުގައި ވެސް ސްޓެލްކޯއަށް ވަރަށް ބޮޑަށް ފާޑުކިޔަ އެވެ.