ބިޑްކުރުމުގެ އުސޫލާ ހިލާފަށް ހުޅުމާލެއިން އެއްވެސް ބިމެއް ވިއްކާފައި، ނުވާނޭކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީން ބިޑް ކުރުމުގެ އުސޫލާ ހިލާފަށް ބައެއް ފަރާތްތަކަށް ބިންތައް ވިއްކާފައިވާކަމަށް ސޯޝަލް މީޑިއާގައި ބައެއް ފަރާތްތަކުން ދަނީ ވާހަކަދައްކަމުންނެވެ. މިކަމާ ގުޅިގެން އެޗްޑީސީން ނެރުނު ބަޔާނެއްގައި ބުނެފައިވަނީ، ހުޅުމާލެއިން ދިރިއުޅުމުގެ ބޭނުމަށް އިއުލާނުކުރި ބައެއް ބިންތައް ބިޑް އުސޫލާ ހިލާފަށް ވިއްކާފައިވާކަމަށް ދެކެވެމުންދާ ވާހަކަތަކުގައި އެއްވެސް އަސްލެއްނެތްކަމަށެވެ. އެޗްޑީސީން ބުނީ ދިރިއުޅުމުގެ ބޭނުމަށް އެޗްޑީސީން މިހާތަނަށް ބިން ވިއްކާފައިވަނީ، އާއްމުކޮށް އެކަން އިއުލާނުކުރުމަށްފަހު، ހުޅުވާލެވިފައިވާ ބިޑްކުރުމުގެ މަރުހަލާއެއްގެ ތެރެއިންކަމަށެވެ.
އެޗްޑީސީން ބުނީ ބިންގަތުމުގެ ފުރިހަމަ މަރުހަލާއަކީ ކަނޑައެޅޭ ބިމަކަށް ޝައުގުވެރިކަން ފާޅުކުރުން ކަމަށާއި، އެއަށްފަހު އެ ޝައުގުވެރިކަން ފާޅުކުރި ފަރާތަށް ބިޑް ކުރުމަށް ހުޅުވާލެވޭނޭ ކަމަށެވެ. މިގޮތުން ބިން ގަތުމަށް ފުރުސަތު ދީފައިވާނީ ބިޑްކުރުމަށް ކަނޑައެޅިފައިވާ ވަގުތު ނިމޭއިރު އެންމެ މަތީއަގު ހުށަހެޅި ފަރާތަކަށް ކަމަށެވެ. އެޗްޑީސީން ބުނީ، ބިން ގަތުމަށް ޝައުގުވެރިކަން ހުށަހެޅޭނީ އިއުލާނުކޮށްފައިވާ ބިމުގެ ބޭސް ރޭޓަށްވުރެ ދަށް ނޫން އަގެއްގައި ކަމަށެވެ. ބޭސް ރޭޓުގެ ގޮތުގައި އަދަދު ކަނޑައަޅަނީއެޗްޑީސީގެ ބޯޑުގެ ޑިރެކްޓަރުން އެންޑޯޒްކޮށްފައިވާ ރޭޓްތަކަށް ކަމަށެވެ.
Advertisement
ބިޑްކުރުމުގެ އުސޫލާ ހިލާފަށް ހުޅުމާލެއިން އެއްވެސް ބިމެއް ވިއްކާފައި ނުވާނޭކަމަށް އެޗްޑީސީން ބުނެފައިމިވަނީ، މަޖިލީހުގެ ބައެއް މެމްބަރުންނާއި ސަރުކާރުގެ ބައެއް ވެރިންނަށް ހުޅުމާލެ ފޭސް ދޭކުން ނުއަގުގައި ބިންތަކެއް ވިއްކާލާފައިވާކަމަށް ސޯޝަލް މީޑިއާގައި ލިޔުންތަކެއް ލީކުވުމާ ގުޅިގެންނެވެ. މީގެ އިތުރުން ބިންވެރިޔާ ސްކީމުން އުސޫލުން ބޭރުން އެޗްޑީސީގެ ކުރީގެ އެމްޑީ، ފަޒުލްގެ ބޭބެއަށް ގޯއްޗެއް ދިން މައްސަލަވެސް ވަނީ ފެންމަތިވެފައެވެ. ފުލުހުން ދަނީ ޖިނާއީ މައްސަލައެއްގެ ގޮތުގައި އެ މައްސަލަ ބަލަމުންނެވެ.