ބައިނަލްއަގުވާމީ ތައުލީމީ ދުވަހުގެ މުނާސަބަތުގައި ގައުމީ ޔުނިވާސިޓީއާއި ރާއްޖޭގެ ކޮލެޖުތަކުގައި ކިޔަވާ ދަރިވަރުންނަށް ދިރާގުން ޚާއްސަ އިވެންޓެއް މިދިޔަ ހޮނިހިރު ދުވަހު ބާއްވައިފިއެވެ. ދިރާގުން ބުނީ، "ދިރާގު ސްޓޫޑެންޓް ކަނެކްޓް"ގެ ނަމުގައި ފެށި މި އިވެންޓުގެ މަގުސަދަކީ ޑިޖިޓަލް ވަސީލަތްތަކުގެ އެހީގައި ޒުވާނުންގެ އުފެއްދުންތެރިކަން އިތުރުކޮށް، ޒުވާނުން ބާރުވެރިކުރުވުން ކަމަށެވެ. "ދިރާގު ސްޓޫޑެންޓް ކަނެކްޓް"ގެ ދަށުން ބާއްވާ ފުރަތަމަ އެޑިޝަން ކަމަށްވާ "އައިސިކް އެޑިޝަން" ބޭއްވީ މުނިފޫހިފިލުވުމުގެ އެކި ހަރަކާތްތައް ހިމެނޭހެން ދަރިވަރުންނަށް ޚާއްސަ އޮފާތަކާއި ޑިސްކައުންޓުތަކާ އެކު ކަމަށް ދިރާގުން ބުންޏެވެ. މި ހަރަކާތުގައި ބައިވެރިވި ދަރިވަރުންނަށް ދިރާގު x އައިސިކް ސްޓޫޑެންޓް ޑިސްކައުންޓް ކާޑުގެ އެއް އަހަރު ދުވަހުގެ ސަބްސްކްރިޕްޝަނެއް ވަނީ މުޅިން ހިލޭ ދީފައިވާ ކަމަށް ދިރާގުން މައުލޫމާތު ދެއެވެ. ދިރާގުން ބުނިގޮތުގައި މި ސަބްސްކްރިޕްޝަންގެ ސަބަބުން ދަރިވަރުންނަށް ރާއްޖެއާއި ރާއްޖޭން ބޭރުގެ އެކި އައުޓްލެޓްތަކުން ޚާއްސަ ޑިސްކައުންޓުތަކާއި އޮފާތައް ލިބިގެންދާނެ ކަމަށެވެ. މި ހަރަކާތުގައި ވާހަކަ ދައްކަވަމުން ދިރާގުގެ ޗީފް ކޮމާޝަލް އޮފިސަރު ޢަލީ ރިޔާޒް ވިދާޅުވީ، ޒުވާނުން ބާރުވެރިކުރުވުމަށް އެހީތެރިވެދީ، ޒުވާނުންނަށް އެކި ފުރުސަތުތަކާއި ވަސީލަތްތަކާއި ތަޖުރިބާ ފޯރުކޮށްދިނުމަށް ދިރާގުން އަބަދުވެސް އިސްކަންދޭ ކަމަށެވެ. އަދި ދިރާގުގެ ބްރޭންޑް، މާކެޓިން އެންޑް ކޮމިއުނިކޭޝަންސް މިރްޝާން ޙަސަން ވިދާޅުވިގޮތުގައި، ދިރާގުގެ އަމާޒަކީ ޑިޖިޓަލް ގޮތުން ކުރިއަރަމުން އަންނަ ޒަމާނެއްގައި އުނގެނުމަށް ބޭނުންވާ ވަސީލަތްތަކުން ފެށިގެން އިންޓަނެޓު ފަދަ ޚިދުމަތްތަކުގެ އެހީގައި ދަރިވަރުންނަށް ތައުލީމީގޮތުންނާއި އެކި ދާއިރާތަކުން ކުރިއަރައި ދިއުމަށް އެހީތެރިކަން ފޯރުކޮށްދިނުން ކަމަށެވެ. ރާއްޖޭގައި ކިޔަވަމުން އަންނަ ދަރިވަރުންނަށް ޚާއްސަކޮށް ދިރާގު x އައިސިކް ސަބްސްކްރިޕްޝަން ޕްލޭން އިފްތިތާހުކުރީ މިދިޔަ އޮކްޓޯބަރު މަހެވެ.