ރައީސުލްޖުމުޙޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް 52 ހަފްތާ ފުރުނުއިރު، އިސްލާމީ ކަންތައްތަކާ ބެހޭ ވުޒާރާއިން ކުރެވުނު މުހިއްމު ކަންކަން ހިމެނޭ ގޮތަށް ތައްޔާރުކުރެވުނު 'އިސްލާމީ ނޫރާއި ދީނީ އަޤީދާ ދާއިރާއިން 52 ހަފްތާގެ އުސްއަލިތައް' ފޮތް ނެރެފިއެވެ.
މި ފޮތް ނެރެދެއްވީ މިއަދު ބޭއްވި ރަސްމިއްޔާތެއްގައި އިސްލާމީ މަރުކަޒުގެ އިސް އިމާމު ފަޟީލަތުއްޞައިޚް މުޙައްމަތު ލަޠީފްއެވެ. މި ރަސްމިއްޔާތުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވަނީ ބައިވެރިވެލައްވާފައެެވެ.
މި ފޮތުގައި ފާއިތުވެދިޔަ 52 ހަފްތާގެ ތެރޭގައި ވުޒާރާގެ އެކި ސެކްޝަންތަކުން ކުރިއަށް ގެންދިޔަ މުހިއްމު ކަންކަމުގެ ތަފްސީލީ މަޢުލޫމާތު ވަނީ ހިމަނާފައެވެ. މީގެ އިތުރުން ވަޒީރު ރާއްޖެއިން ބޭރަށް ކުރެއްވި ދަތުރުފުޅުތަކާއި، ވުޒާރާއިން އިންތިޒާމްކުރި ރާއްޖޭން ބޭރު ދަތުރުތަކުގެ މަޢުލޫމާތާއި، އަލަށް ނެރުނު އުސޫލުތަކާއި ޤަވާއިދުތަކުގެ މަޢުލޫމާތުވެސް މި ފޮތުގައި ހިމަނާފައިވާކަން ފާހަގަކޮށްލެވެއެވެ.