ރިސޯޓުތަކަށް ލިބޭ އާމްދަނީން ދިވެހި ރުފިޔާއަށް ބޭންކުތަކުގައި މާރުކުރަން ލާޒިމުވާ ގަވާއިދުގެ ދަށުން މިދިޔަ އޮކްޓޯބަރު މަހު ރިސޯޓުތަކަށް ލިބުނު އާމްދަނީން ގާތްގަނޑަކަށް 40 މިލިއަން ޑޮލަރު މާރުވާނެ ކަމަށް ބެލެވޭ ކަމަށް އެމްއެމްއޭން ބުނެފި އެވެ.
ވީކިހިނެއް؟ - މިދިޔަ އޮކްޓޯބަރު މަހުގެ އާމްދަނީން ޑޮލަރު މާރުކުރަން ޖެހެނީ އެމްއެމްއޭން ނެރުނު ބޭރު ފައިސާގެ ގަވާއިދުގެ ދަށުންނެވެ. ގަވާއިދު ބުނާ ގޮތުން ކޮންމެ ޓޫރިސްޓަކަށް 500 ޑޮލަރުގެ މަގުން ޑޮލަރު މާރުކުރަން ޖެހެ އެވެ.
ތަފްސީލް - އެމްއެމްއޭން ބުނި ގޮތުގައި މިދިޔަ އޮކްޓޯބަރު މަހު ލިބުނު ސޭލްސް ރިޕޯޓްތަކަށް ބަލާއިރު ގާތްގަނޑަކަށް 30 މިލިއަން ޑޮލަރާއި 40 މިލިއަން ޑޮލަރާ ދެމެދުގެ އަދަދަކަށް މާރުކުރާނެ ކަމަށް ބެލެވޭ ކަމަށެވެ. އެގޮތުން:
175 ރިސޯޓްގެ ތެރެއިން 138 ރިސޯޓްގެ އޮކްޓޫބަރު މަހުގެ ސޭލްސް ރިޕޯޓް ވަނީ ލިބިފައި. ސޭލްސް ރިޕޯޓް ނުލިބެނީ 37 ރިސޯޓްގައި
މިހާތަނަށް ހުށަހަޅާފައިވާ ސޭލްސް ރިޕޯޓްތަކަށް ބަލާއިއިރު 30 މިލިއަން ޑޮލަރާއި 40 މިލިއަން ޑޮލަރާއި ދެމެދުގެ އަދަދެއް، ބޭރު ފައިސާ މާރުކުރުމުގެ ގަވާއިދުގެ ސަބަބުން ބޭންކުތަކަށް މާރުކުރެވިގެންދާނެ ކަމަށް ލަފާކުރެވޭ
އެއީ ގާތްގަނޑަކަށް 617 މިލިއަން ރުފިޔާ
އެނގުން މުހިންމު - މިދިޔަ ގަވާއިދަށް އަމަލުކުރަން ފެށި ފަހުން، މަޖިލީހުން ވަނީ ޓޫރިސްޓަކަށް 500 ޑޮލަރު ދެއްކުން އިހުތިޔާރީކޮށް އޭގެ ބަދަލުގައި އާމްދަނީގެ20 ޕަސެންޓް މާރުކުރުމުގެ އިހުތިޔާރު ލިބޭ ގޮތަށް ގާނޫނު ފާސްކޮށްފަ އެވެ. 
ގާނޫނަށް އަމަލުކުރަން ފަށަނީ މި ޖެނުއަރީ މަހުން ފެށިގެންނެވެ.