އިނގިރޭސި ރަސްގެފާނު ޗާލްސް އިސްނަންގަވައިގެން ބާއްވަވާ ބައްދަލުވުމެއްގައި ބައިވެރިވެވަޑައިގަތުމަށް ރައީސް މުހައްމަދު މުއިއްޒު އިނގިރޭސިވިލާތަށް ރޭ ފުރާވަޑައިގަންނަވައިފި އެވެ.
ވީ ކިހިނެއް؟ - ރައީސް އޮފީހުން ބުނި ގޮތުގައި، ރައީސް އިނގިރޭސިވިލާތަށް ވަޑައިގަންނަވަނީ ރަސްގެފާނު ޗާލްސް ދައުވަތަކަށް، ސަސްޓެއިނަބަލް މާކެޓްސް އިނީޝިއޭޓިވް (އެސްއެމްއައި)ން އިންތިޒާމުކޮށްގެން ބާއްވާ ހައި-ލެވެލް ބްރީފިން އޮން ޕްރައިވެޓް ކެޕިޓަލް މޮބިލައިޒޭޝަން'ގައި ބައިވެރިވެވަޑައިގަތުމަށެވެ.
ނަމަވެސް، މިއީ ރައީސް ކުރައްވާ ރަސްމީ ދަތުރުފުޅެއް ކަމަކަށް ރައީސް އޮފީހަކުން ނުބުނެ އެވެ. އަދި އެ މަނިކުފާނު އެނބުރި ރާއްޖެ ވަޑައިގަންނަވާނެ ދުވަހެއް ވެސް އެ އޮފީހަކުން ހާމައެއް ނުކުރެ އެވެ.
ތަފްސީލް - ރައީސް އޮފީހުން ބުނި ގޮތުގައި، މި ބައްދަލުވުމުގައި:
ބައިނަލްއަގްވާމީ ޑިވެލޮޕްމަންޓް ބޭންކްތަކާއި ދުނިޔޭގެ ބޮޑެތި މާލީ މުއައްސަސާތަކުގެ ވެރިން ބައިވެރިވެވަޑައިގަންނަވާނެ 
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރާނީ މޫސުމީ ލަނޑުދަނޑިތަކަށް ވާސިލުވުމަށް ގެންނަންޖެހޭ ބަދަލުތައް ގެނައުމަށްޓަކައި ބައިނަލްއަގްވާމީ ފެންވަރުގައި ކުރަންޖެހޭ މަސައްކަތްތަކަށް އެއްބާރުލުން ދިނުމަށް 
ދެމެހެއްޓެނިވި ތަރައްގީގެ ދުވެލި އަވަސްކުރުމަށް، ބައިނަލްއަގްވާމީ ގުޅުންތައް އިތުރަށް ހަރުދަނާކޮށްގެން، ޕްރައިވެޓް ކެޕިޓަލް ބޭނުންކުރެވިދާނެ ގޮތްތަކާ މެދު ވެސް މަޝްވަރާކުރާނެ
މިއީ ރަސްގެފާނު ޗާލްސްގެ ތަސައްވުރެއްގެ މައްޗަށް ބިނާކޮށްފައިވާ އެ މަނިކުފާނުގެ އިސްނެންގެވުމެކެވެ.
މިއީ ދެމެހެއްޓެނިވިކަން ކަށަވަރުކުރުމުގެ މަސައްކަތްތަކުގައި އަމިއްލަ ވިޔަފާރިތައް ހަރަކާތްތެރިކުރުވާ ތަނެކެވެ. އެގޮތުން:
އަމިއްލަ ވިޔަފާރި ކުންފުނިތަކުގެ ވެރިންނާއި ބައިނަލްއަގްވާމީ ފެންވަރުގައި ނިންމުންތައް ނިންމާ ފަރާތްތަކުން ހިންގާ އިގްތިސާދީ ހަރަކާތްތަކަކީ ދެމެހެއްޓެނިވިކަމުގެ މައްޗަށް ބިނާކުރާ ހަރަކާތްތަކަކަށް ހެދުމަށް އެސްއެމްއައިން ބާރުއަޅާ 
އަމިއްލަ ވިޔަފާރިތަކުން ކުރާ ދުރު ރާސްތާގެ މަސައްކަތްތަކަކީ ތިމާވެށީގެ ގޮތުން ޒިންމާދާރު އަދި ގައުމީ ފެންވަރުގެ މޫސުމީ އަޒުމުތަކާއި ދުނިޔޭގެ ފިނިހޫނުމިން 1.5 ޑިގްރީ ސެލްސިއަސްގައި ބެހެއްޓުމަށް ހިފާފައިވާ އަމާޒަށް ވާސިލުވުމަށް ކުރާ ކަންކަމާ އެއްގޮތް މަސައްކަތްތަކަކަށް ހެދޭނޭ މަގު ދައްކައިދިނުމަކީ ވެސް އެސްއެމްއައިގެ އަމާޒެއް