ސިޔާސީ ކަންކަމުގައި ޚިޔާލު ތަފާތުވިޔަސް ޕީޕީއެމުން އަބަދުވެސް އިސްކަން ދޭނީ ގައުމުގެ މަސްލަހަތަށް ކަމަށާއި، މިހާތަނަށްވެސް އެ ޕާޓީން މަސައްކަތް ކޮށްފައި ވާނީ އެގޮތަށް ކަމަށް ޕީޕީއެމްގެ އިންތިގާލީ ރައީސް މައުމޫނު އަބްދުލްޤައްޔޫމު ވިދާޅުވެއްޖެ އެވެ.
ޕީޕީއެމް އަށް ތާއީދު ހޯދުމަށް ޅ. ނައިފަރަށް އެ ޕާޓީން އިއްޔެ ކުރި ދަތުރުގައި ރޭ އެ ރަށުގައި ވާހަކަފުޅުދައްކަވަމުން ޕީޕީއެމްގެ އިންތިގާލީ ރައީސް މައުމޫނު އަބްދުލްގައްޔޫމް ވިދާޅުވީ ޕީޕީއެމް އަބަދުވެސް މަސައްކަތް ކުރާނީ ސިޔާސީ ގޮތުން އުފެދޭ ދެބަސްވުން ތަކުގައިވެސް ރައްޔިތުން ނަށް އެންމެ ފައިދާ ހުރި ގޮތަކީ ކޮބައިތޯ ބަލާ އެފަދަ ކަންކަމަށް މަގުފަހި ކޮށްދިނުމަށް ކަމަށެވެ. އަދި އެ ޕާޓީ އަކީ އެހެން އެއްވެސް ސިޔާސީ ޕާޓީ އަކާ ހަސަދަވެރި ކަމެއް ބާއްވައިގެން ރުޅިވެރި ކަމުގައި މަސައްކަތް ކުރާނެ ޕާޓީއެއް ނޫން ކަމަށްވެސް އެމަނިކުފާނު ވިދާޅުވި އެވެ.
"ޕީޕީއެމް އަކީ އެއްވެސް ޕާޓީ އަކާ ހަސަދައެއް ލައިގެން ރުޅިވެރި ކަމެއް ބާއްވާނެ ޕާޓީއެއް ނޫން. ޕީޕީއެމުން އަބަދުވެސް މަސައްކަތް ކުރާނީ ގައުމުގެ މަސްލަހަތު އިސްކޮށް ޚިޔާލު ތަފާތު ވިޔަސް ރައްޔިތުންނަށް ފައިދާ ހުރި ކަންކަން ކޮށްދީ މަގުފަހި ކޮށްދިނުމަށް،" ރައީސް މައުމޫނު ވިދާޅުވި އެވެ.
އަދި ވިދާޅުވީ އެމަނިކުފާނުގެ 30 އަހަރުގެ ވެރިކަމާއި، ރައީސް ނަޝީދުގެ ތިން އަހަރުގެ ވެރިކަމުގައި ކުރެވިފައިހުރި ގޯސް ކަންތައްތަކާއި މެދު ވިސްނާ އެފަދަ ކަންކަމުން އިބުރަތް ހާސިލްކޮށް ކުރިއަށް އޮތް ތަނުގައި ކަންކަން އިސްލާހު ކުރުމަށް ގޮވާލައްވާ ކަމަށެވެ. މައުމޫނު ވިދާޅުވީ ނައިފަރަށް ކުރެއްވި ދަތުރު ފުޅަކީ އެ ރަށުގައި ޕީޕީއެމްގެ ރޫހު ދިރުވާ އާލާ ކުރުމަށާއި، އެޕާޓީގެ މަސައްކަތްތައް ހަލުވި ކުރުމަށް ކުރެއްވި ދަތުރުފުޅެއް ކަމަށެވެ.
މައުމޫނު އިއްޔެ ނައިފަރަށް ފައިބާ ވަޑައިގަތުމުން އެރަށުގެ ގިނަ އަދަދެއްގެ ރައްޔިތުން އެ މަނިކުފާނަށްވަނީ ވަރަށް ހޫނު މަރުހަބާއެއް ދަންނަވާފަ އެވެ. އަދި ރޭ ބޭއްވި ޖަލްސާއަށްވެސް ރަށުގެ ގިނަ އަދަދެއްގެ ރައްޔިތުން ވަނީ ހާޒިރުވެފަ އެވެ.
މައުމޫނުގެ އެ ދަތުރުފުޅުގައި ޕާޓީގެ ނައިބު ރައީސް އަބްދުލް ރަހީމް އަބްދުﷲ އާއި، ޕާލިމެންޓްރީ ގްރޫޕުގެ ރައީސް އަބްދުﷲ ޔާމީން ގެ އިތުރުން ޕާޓީގެ މަޖިލިސް މެމްބަރުންނާއި، ބައެއް ސްޓޭޓް މިނިސްޓަރުން ބައިވެރިވެ ވަޑައިގެންނެވި އެވެ. ރައީސް މައުމޫނުގެ އެ ދަތުރުފުޅު ނިންމަވާ ލެއްވުމަށްފަހު މިއަދު ވަނީ މާލެ ވަޑައިގެންފަ އެވެ.