މިއަހަރުގެ ފުރަތަމަ ކުއާޓަރުގައި ޗައިނާގެ އޮންލައިން ފެޝަން ކުންފުނި ޝެއިންއަށް 99 މިލިއަން ޑޮލަރުގެ ގެއްލުމަކާ ކުރިމަތިލާން ޖެހިއްޖެއެވެ. ހޮންގްކޮންގް ސްޓޮކް އެކްސްޗޭންޖުގައި ލިސްޓުކުރުމަށް ތައްޔާރުވަމުން އަންނަ ޝެއިންއިން އާންމުކުރި މާލީ ރިޕޯޓުތަކާ ހަވާލާދީ ރޮއިޓާސްއިން ރިޕޯޓުކޮށްފައިވާ ގޮތުގައި، ގެއްލުންވުމުގެ މައިގަނޑު ސަބަބަކީ އެމެރިކާއިން ކުދި ޕެކޭޖުތަކުން ނަގާ ޓެކްސް މާފުކޮށްދިނުން ހުއްޓާލުމާއި، އިންވެސްޓަރުންގެ ހިއްސާއާ ގުޅޭ 328 މިލިއަން ޑޮލަރުގެ އެކައުންޓިން ޗާޖެއް ކެނޑުމެވެ. މިދިޔަ އަހަރުގެ ފުރަތަމަ ކުއާޓަރުގައި އެ ކުންފުންޏަށް 395 މިލިއަން ޑޮލަރުގެ ފައިދާއެއް ލިބުނެވެ. އެމެރިކާގެ "ޑި މިނިމިސް" އުސޫލުގެ ދަށުން 800 ޑޮލަރަށް ވުރެ އަގުހެޔޮ ޕެކޭޖުތަކުން ކުރިން ޓެކްސް ނުނަގައެވެ. ނަމަވެސް މިދިޔަ އަހަރުގެ މެއި މަހުން ފެށިގެން އެމެރިކާއިން ވަނީ ޗައިނާއިން އެތެރެކުރާ މުދަލުން 10 ޕަސެންޓާއި 87.5 ޕަސެންޓާ ދެމެދުގެ އަދަދަކަށް ޓެކްސް ނަގަން ފަށާފައެވެ. ޝެއިންއިން ބުނި ގޮތުގައި މި ބަދަލާ ގުޅިގެން އެމެރިކާ މާކެޓުގައި އެ ކުންފުނީގެ އާމްދަނީ ވަނީ 14.3 ޕަސެންޓް ދަށްވެ، 2.04 ބިލިއަން ޑޮލަރަށް ވެއްޓިފައެވެ. މީގެ އިތުރުން، ޔޫރަޕިއަން ޔޫނިއަން (އީޔޫ) އިން ވެސް ވަނީ އޮންލައިންކޮށް އެތެރެކުރާ އަގުހެޔޮ މުދަލުން ތިން ޔޫރޯގެ ފީއެއް ނަގަން މި މަހު ފަށާފައެވެ. ޝެއިންއިން ބުނި ގޮތުގައި ޓެކްސް ބޮޑުވުމުގެ ސަބަބުން އިތުރުވި ހަރަދުތައް ފޫބެއްދުމަށްޓަކައި އެމެރިކާގައި މުދާ ވިއްކާ އަގު ބޮޑުކުރުމަށް އެ ކުންފުނިން އަންނަނީ ވިސްނަމުންނެވެ. ޗައިނާގެ ސެކިއުރިޓީޒް ރެގިއުލޭޓަރީ ކޮމިޝަން (ސީއެސްއާރުސީ) އިން ވަނީ މި މަހުގެ 10 ވަނަ ދުވަހު ޝެއިން ހޮންގްކޮންގްގައި ލިސްޓުކުރުމަށް ހުއްދަ ދީފައެވެ. މީގެ ކުރިން އެ ކުންފުނިން ވަނީ ނިއުޔޯކް އަދި ލަންޑަންގައި ލިސްޓުކުރަން މަސައްކަތްކޮށްފައެވެ. ޝެއިންގެ މުޅި ވިޔަފާރިއަށް ބަލާއިރު، މިދިޔަ އަހަރު ލިބުނު ސާފު ފައިދާ ވަނީ އޭގެ ކުރީ އަހަރާ އަޅައިބަލާއިރު 38.7 ޕަސެންޓް ދަށްވެ، 2.06 ބިލިއަން ޑޮލަރަށް ވެއްޓިފައެވެ.