ބާސެލޯނާ (ޖެނުއަރީ 26) - ސްޕެނިޝް ލީގުގައި ރޭ ލަމީން ޔަމާލް ޖެހި ގޯލާ އެކު، 3-0 އިން ލީގުގެ ފުލުގައި އޮތް ރެއާލް އޮވިއޭޑޯ އަތުން މޮޅުވެ، ބާސެލޯނާ އިން އަލުން އެއް ވަނަ އަށް ޖެހިލައިފި އެވެ.
ލީގުގައި ހޮނިހިރު ދުވަހުގެރޭ ވިޔަރެއާލް ބަލިކޮށް ރެއާލުން ތާވަލުގެ ކުރިއަށް ޖެހިލިއިރު، ޖެހިގެން އައި ރޭގައި ބާސެލޯނާ އިން މޮޅުވެ، މި ވަނީ މަގާމު ދަމަހައްޓައިފަ އެވެ. ބާސެލޯނާ އަށް 21 މެޗުން 52 ޕޮއިންޓް ލިބިފައިވާއިރު، ރެއާލުން ފަހަތުގައި ވިއްދާފައި އޮތީ 21 މެޗުން 51 ޕޮއިންޓާ އެކު އެވެ.
ބާސެލޯނާ ދަނޑުގައި ރޭ ކުޅުނު މެޗުގައި، ބާސެލޯނާ އަށް ތިން ގޯލު ޖެހުނީ ވެސް މެޗުގެ ދެ ވަނަ ހާފުގަ އެވެ. ފުރަތަމަ ހާފުގައި ބާސެލޯނާ ހުއްޓުވުމުގައި، އޮވިއޭޑޯގެ ޑިފެންޑަރުން ވަނީ ޓީމެއްގެ ގޮތުގައި ރަނގަޅު މަސައްކަތެއް ކޮށްފަ އެވެ. ބާސެލޯނާ އިން ލީޑުނެގީ، ދެ ވަނަ ހާފުގެ އަށް ވަނަ މިނިޓްގައި، ޑެނީ އޮލްމޯ ޖެހި ގޯލުންނެވެ. ފުރަތަމަ ލަނޑު ޖެހިތާ ފަސް މިނިޓް ފަހުން، ބާސެލޯނާގެ ލީޑުފުޅާކޮށްދިނީ ރަފީނިއާ އެވެ.
މެޗުގައި، ބާސެލޯނާ އިން ޖެހި ފަހު ލަނޑަކީ، އޮލްމޯ ތަނަވަސްކޮށްދިން ފުރުސަތެއްގައި ޔަމާލް ޖެހި އިންޑިވިޖުއަލީ މޮޅު ގޯލެކެެވެ. މިއީ، އޮލްމޯ ނެގި ހުރަހަކުން އޯވަހެޑް ކިކަކުން ޔަމާލް ޖެހި ގޯލެކެވެ.
މިއީ ލީގުގައި ފްލިކްގެ އިރުޝާދުގެ ދަށުން އެއް ސީޒަނެއްގައި ބާސެލޯނާ ހޯދި 10 ވަނަ މޮޅެވެ. އެންމެ ފަހުން، އެކަން ހާސިލްކުރެވުނީ، 2019 ވަނަ އަހަރު ހުރި ކޯޗު އާނެސްޓޯ ވަލްވޭޑޭ އަށެވެ.