ނިޝާން އިއްޒުއްދީނުގެ އިއްޒަތުގެ ވެރިޔާ އިބްރާހީމް ހުސައިން ޒަކީގެ އަނބިކަނބަލުން ހުސްނާ މޫސާ އަވަހާރަވުމާ ގުޅިގެން ރައީސް ޑރ. މުހައްމަދު ތައުޒިޔާ ވިދާޅުވެއްޖެއެވެ.
ރައީސް އެކްސްގައި ކުރެއްވި ޕޯސްޓެއްގައި ވަނީ މި ހިތާމައިގައި ބައިވެރިވެ ވަޑައިގެން އާއިލާއަށް ތައުޒިޔާ ދަންނަވާފައެވެ. "މަރުޙޫމާ ހުސްނާ މޫސާގެ ފުރާނަފުޅަށް ސުވަރުގޭގެ ދާއިމީ ނިއުމަތް މާތްﷲ މިންވަރުކޮށް ދެއްވާށިއެވެ. އާމީން" ރައީސްގެ ޕޯސްޓުގައި ވިދާޅުވިއެވެ.
ކުރިން ފޮރިން މިނިސްޓަރު އަދި އެމްޑީޕީގެ އިސް ސަފުގައި މަސައްކަތްކުރެއްވި ޒަކީގެ އަނބިކަނބަލުން އަވަހާރަވުމާ ގުޅިގެން އެ ޕާޓީގެ އިސް މެންބަރުންވެސް ވަނީ އާއިލާއަށް ތައުޒިޔާ ދަންނަވާފައެވެ. އެ ގޮތުން ކުރީގެ ފޮރިން މިނިސްޓަރު އަބްދުﷲ ޝާހިދު ކުރެއްވި ޕޯސްޓެއްގައި ވިދާޅުވީ ދިވެހި ގައުމަަށް ގިނަ ހިދުމަތްތަކެއް ކުރެއްވި އިއްޒަތްތެރިޔެއްގެ ގޮތުގައި ހުންނެވި އަދި އެމްޑީޕީއަށް އެތައް ގޮތަކުން ހިދުމަތްކުރެއްވި ޕާޓީގެ ކުރީގެ ނައިބު ރައީސް އިބްރާހީމް ހުސައިން ޒަކީގެ އަނބިކަބަލުން ހުސްނާ މޫސާ އަވަހާރަވި ހަބަރު އަޑު އެހީ ފުންހިތާމައާއެކުގައި ކަމަށެވެ.
އެމްޑީޕީ އުފައްދަން ކުރެވުނު މަސައްކަތާއި ހަމައިން ޕާޓީގެ ތެރޭގައި އަންހެނުން ކުރީސަފަށް ނެރުމަށް ހިތްވަރު ދެއްވައި އަމަލީގޮތުން ހުސްނާ ބައިވެރިވެ ވަޑައިގެންނެވިކަމަށް ޝާހިދުގެ ޕޯސްޓުގައި ވަނީ ފާހަގަ ކުރައްވާފައެވެ.
ހުސްނާ މޫސާގެ ކަށުނަމާދު އޮންނާނީ މިއަދު ހުކުރު ނަމާދަށްފަހު އިސްލާމީ މަރުކަޒުގައެވެ.