ދިވެހިރާއްޖެއަށް މިފަހަރު އައު އަހަރު ބައްދަލުކުރީ ގަދަ ވަޔާއި ވިއްސާރައާއެކުގައެވެ.
އަވަށްޓެރި ސްރީލަންކާ ކައިރީގައި އުފެދުނު ކޮޅިގަނޑެއްގެ އަސަރާއެކު، ރާއްޖެއަށް މިހާރު ކުރަމުން މިދާ ވިއްސާރައިގައި ވެރިރަށް މާލޭގެ އިތުރުން، މެދުރާއްޖެތެރޭގެ ބައެއް ރަށްތަކުގައި ވެސް ފެންބޮޑުވުމުގެ ހާދިސާތައް ވަނީ ހިނގައިފައެވެ.
މާލޭގައި ވަރަށް ބޮޑަށް ފެންބޮޑުވީއިރު، އިއްޔެ އަކީ ކުޑަ ވަގުތުކޮޅެއްގެ ތެރޭގައި މާލެއަށް ރެކޯޑު މިންވަރަކަށް ވާރޭ ވެހުނު ދުވަހެކެވެ. މެޓުން ބުނީ، އިއްޔެ ހަވީރު އެއްގަޑިއިރުގެ ތެރޭގައި މާލެއަށް 60 މިލިމީޓަރުގެ ވާރޭ ވެހުނު ކަމަށެވެ.
ހޯމަ ދުވަހާ ހަމައަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާ ކޮށްފައެވެ. އެހެންވެ، މޫސުމަށް ސަމާލުވުމަށް ކަމާބެހޭ ފަރާތްތަކުން ދަނީ މެދުކެނޑުމެއް ނެތި އިރުޝާދު  ދެމުންނެވެ.
 
މިހާރު ކުރަމުންދާ ވިއްސާރައިގައި ރާއްޖޭގެ ރަށެއްގައި ފެންބޮޑުވެފައި
 
ރާއްޖޭގެ އިތުރުން އިނގެރޭސިވިލާތަށް ވެސް އައު އަހަރު ބައްދަލުކުރީ ގަދަ ވިއްސާރައާއި ފެންބޮޑުވުމުގެ ހާދިސާތަކާއެކުގައެވެ.
އެ ގައުމުގެ އެކި ސަރަހައްދުތައް ވެސް އައު އަހަރު ފެށުނުއިރު އޮތީ ”ފެނު އަޑީގަ“އެވެ. ކުޑަ ކުޑަ ރާއްޖެއާ އަޅައިވެސް ނުކިޔޭނެ ފަދަ ހާލަތެއްގައެވެ. ވަސީލަތްތައް ކިތަންމެ ގިނަ ވިޔަސް، ކުރެވުނު މާ ބޮޑު ކަމެއް ނެތެވެ. ވާރޭގެ ތޫފާނާ ހަނގުރާމަ ކުރަން މާބޮޑު ތައްޔާރީއެއް ނުވެވުނެވެ.
އައު އަހަރު ފެށުނު ދުވަހު އިނގެރޭސިވިލާތުގައި ފެންބޮޑުވެފައި
 
ޔޫކޭގެ އެކި ސަރަހައްދުތަކުގައި ފެންބޮޑުވާނެ ކަމަށް ބަލައި 150 ސަރަހައްދަކަށް އެލާޓު ނެރެން ޖެހުނުއިރު، އެކި ސަރަހައްދުތަކުން 400 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލު ކުރަން ޖެހުނެވެ.
ބައެއް ހިސާބުތަކުން ކަރަންޓާއި ފެން ކެނޑުމުގެ ހާދިސާތައް ވެސް ހިނގިއެވެ.
ފެން ބޮޑުވުމުގެ ސަބަބުން ދުއްވަމުން ދިޔަ ހަތަރު ފުރޮޅުލީ އުޅަނދުތަކުގައި ތާށިވި ބަޔަކު ވެސް، ރެސްކިޔު ޓީމުތަކަށް ސަލާމަތް ކުރަން ޖެހުނެވެ. އައު އަހަރަށް ރޭވި ހަވާ އެރުވުމުގެ އެތައް ޝޯއެއް ކެންސަލް ކުރަން ވެސް ޖެހުނެވެ.
ޔޫކޭގެ ސްޓޮކްޕޯޓް ޓައުންގައި ފެންބޮޑުވެފައި
ޔޫކޭގައި އެންމެ ބޮޑަށް ފެންބޮޑުވުމުގެ ހާދިސާތައް ހިނގީ ގްރޭޓަރ މެންޗެސްޓަރ، ލެންކްޝަރ، އަދި ޗެޝާގައި ކަމަށް ރިޕޯޓުތައް ބުނެއެވެ.
މެންޗެސްޓަރގައި އުޅޭ ބައެއް މީހުން މީޑިއާ އަށް މައުލޫމާތު ދެމުން ބުނީ، ފެންބޮޑުވެގެން ގޮސް، ”ގެނބެނީ“ ކަމަށް ހީވާ ހިސާބަށް ހާލަތު ގޯސްވި ކަމަށެވެ.
ސިންގަޕޫރަށް ވެސް މިއީ ވިއްސާރަ ދުވަސްވަރެކެވެ. އާއްމުކޮށް ނޮވެމްބަރު މަހުން ޖެނުއަރީ މަހަށް ދެމިގެންދާ މި މޫސުމީ ވިއްސާރައިގައި އެ ގައުމުގެ އެކި ސަރަހައްދުތަކުގައި ވެސް ފެންބޮޑުވުމުގެ ހާދިސާތައް ދަނީ ހިނގަމުންނެވެ.
 
މިދިޔަ ޑިސެމްބަރު މަހުގެ 29 ވަނަ ދުވަހު، ސިންގަޕޫރުގައި ފެންބޮޑުވެފައި
 
މޫސުމަށް އަންނަމުންދާ ބަދަލުތަކާއެކުގައި، ދުނިޔޭގެ އެކި ކަންކޮޅުތަކުގައި ގުދުރަތީ ކާރިސާތައް ހިނގުން އިތުރުވަމުން އަންނައިރު، ބޭރުގެ މީޑިއާތަކުން ބުނާ ގޮތުގައި، ނިމިގެންދިޔަ 2024 ވަނަ އަހަރަކީ ފަހުގެ ތާރީހަށް ބަލާއިރު، ފެންބޮޑުވުމުގެ ކާރިސާތައް ގިނަ އަހަރެކެވެ.
މިދިޔަ އަހަރުގެ އޮކްޓޯބަރު މަހުގެ 14 ވަނަ ދުވަހު، ސިންގަޕޫރުގެ ބައެއް ސަރަހައްދުތަކަށް ފާއިތުވި 40 އަހަރު ތެރޭގައި ވެސް ވާރޭ ވެހިފައިނުވާ މިންވަރަށް ވާރޭ ވެހުނު ކަމަށް ރިކޯޑު ކުރެވިފައިވެއެވެ.
ސިންގަޕޫރުގެ ތިންވަނަ ގައުމީ ކްލައިމެޓް ޗޭންޖް ސްޓަޑީން ދައްކާ ގޮތުގައި، މޫސުމަށް އަންނަމުންދާ ބަދަލުތަކާއެކުގައި، ކުރިއަށް އޮތްތަނުގައި އެ ގައުމުގައި ފެންބޮޑުވުމުގެ ހާދިސާތައް ހިނގުން އިތުރު ވެގެންދާނެއެވެ.