ފަތިހު ކަސްރަތުކުރާ މީހުން ވަރަށް ގިނައެވެ. އެއީ ވަރަށް ރަނގަޅު ކަމެކެވެ. ނަމަވެސް ކަސްރަތަށް ފަށަންވާނީ ފަތިސްނަމާދުކޮށް ޛިކުރުތައް ކިޔާލައިގެންނެވެ. ހަމައެގޮތަށް މަޣްރިބް ނަމާދުނަ ފައިގައިގެން ކަސްރަތަށްދާމީހުންނަށް ޢިޝާ ނަމާދުގެ ޖަމާއަތަށް ނުދެވުމަކީ އެއްވެސް ޙާލެއްގައި ކަންތައްކުރަން އޮތް ގޮތެއް ނޫނެވެ.
ދައްކަން ބޭނުން ނުވި ނަމަވެސް މިއަދު މިވާހަކަދައްކަން މިވަނީ މަޖުބޫރުވެފައެވެ. ދުވާލު ދެއިރު ޕާކުތަކުން މިފެންނަ މަންޒަރުގެ ސަބަބުންނެވެ. ބައިބައަށް އެތައް ސަތޭކަބައަކު ކަސްރަތުކުރަމުން ގެންދާތީއެވެ. ޖިމްތައް ފުރި އެޕޮއިންޓްމަންޓްހަދަންޖެހޭތީއެވެ.
އެއްވެސް މީހަކު މިވެނި އަޅުކަމެއް ނުކުރާކަމަށް ބުނުމެއް ނެތެވެ. ނަމަވެސް އެނގޭކަމަކީ ޕާކުތަކާއި މަގުތަކުން ކަސްރަތުކުރަނިކޮށް މިފެންނަ އަދަދަށް މީހުން މިސްކިތުގެ ޖަމާޢަތުން ފެންނަނަމަ މިސްކިތްތައް ފުރޭނެ ކަމެވެ. ކޮންމެއަކަސް އެމީހުންނަށް ވިސްނިގެން އުޅޭ ގޮތުގައި މައްސަލައެއް އެބައުޅެއެވެ.
ލޮބުވެތި އަޚުންނާއި އުޚުތުންނޭވެ! ކަސްރަތުކުރާށެވެ! ޖިމްތަކަށްދާށެވެ! ދުޅަހެޔޮ ޞިއްހަތު ލިބިގަންނަން މަސައްކަތްކުރާށެވެ! ނަމަވެސް އެކަމަށް މަސައްކަތްކުރަންވާނީ ތަޤްވާވެރިކަން އިތުރުކުރަން ކުރާ މަސައްކަތުގެ ފަހަތުންނެވެ. ކުރިއަށް ނެރެގެނެއް ނޫނެވެ.
ﷲ ތަޢާލާއަށް އަދާކުރަންޖެހޭ ޙައްޤުތައް އަދާނުކޮށް ކުރާ ކަސްރަތުން ކުރާނެ ފައިދާއެއް ނެތެވެ! ވީމާ ކަސްރަތުކުރިނަމަވެސް ބޮޑީބިލްޑްކުރި ނަމަވެސް އެކަންކަން ކުރުމުގެ ކުރިން ﷲ ތަޢާލާއަށް އަދާކުރަންޖެހޭ ޙައްޤުތައް އަދާކުރާ މީހަކަށްވާށެވެ! އަބަދުވެސް ބުނާފަދައިން ބަލިތަކުން ސަލާމަތްކޮށްދޭނީ ދުޅަހެޔޮ ޞިއްހަތެއް ނޫނެވެ! އެކަންކޮށްދެއްވެވުންވަނީ ހަމައެކަނި ﷲ ތަޢާލާގެ ޙަޟްރަތަށެވެ!
އިސްލާމީ ތިލަފަތުގެ ދަރުސަކުން