ހިތާމައާއި ހިތްދަތިކަމުގެ ވަޤުތުތަކުގައި ކެތްތެރިވާން މަސައްކަތްކުރާ އަންހެނުން ވަރަށް ގިނައެވެ. އެއީ ވަރަށް ރަނގަޅުވެސް ކަމެކެވެ. މައްސަލައަކަށް މިވަނީ އެފަދަ ޙާލަތުގައި ހުންނައިރު ކުރިމަތިވާ ކޮންމެ ކަމަކީވެސް އެކަމުގެ ސަބަބުން ކުރިމަތިވާ ކަމެއް ކަމަށް އަމިއްލައަށް ނިންމާތީއެވެ. 
މިޘާލަކަށް މޭގައި ރިއްސިނަމަވެސް ބަލާނީ އެއީ އުޅެންޖެހިފައިވާ ޙާލަތުން މެދުވެރިވާ ކަމެއް ކަމަށެވެ. އެހެންވެ އަޅާވެސް ނުލައި ހުންނަނީއެވެ. އެއީ ހެދޭ ވަރަށް ބޮޑު ގޯހެކެވެ. މޭގައި ރިއްސާނަމަ އަވަހަށް ޑޮކްޓަރަށް ދައްކަންވާނެއެވެ. ޑޮކްޓަރުގެ ލަފާހޯދަން ޖެހޭނެއެވެ. އީސީޖީ ނަގަން ނުވަތަ އެހެންވެސް ޓެސްޓެއް ހަދަން ބުނެފިނަމަ ފަރުވާކުޑނުކުޜާށެވެ! 3 ދުވަސް ފަހުން ނުވަތަ އެނޫންވެސް ދުވަހަކު އަލުން ދައްކަން ބުނެފިނަމަ އެކަމަށްވެސް ފަރުވާކުޑަނުކުރާށެވެ!
އިނގިރޭސިވިލާތުގައި ކުރިދިރާސާއަކުން އެނގޭ ގޮތުގައި ހާޓްއެޓޭކް ޖެހިގެން ނުވަތަ ސްޓްރޯކް ޖެހިގެން ހޮސްޕިޓަލަށް ގެންދެވޭ އަންހެނުންގެ ތެރެއިން ގިނަ ބައަކަށް ދެވޭނެ ފަރުވާއެއް ނެތް ޙާލަތަށް އޮންނަނީ ކަންކަން ގޮސްފައެވެ. ސަބަބަކަށްވަނީ ކުރިން މިބުނި ފަދައިން ލިބޭ އިންޒާރަށް ފަރުވާކުޑަކުރުމުގެ ސަބަބުން ފުރާނަ ސަލާމަތްކުރަން ދޭންޖެހޭ ފަރުވާ ދިނުމުގެ ފުރުޞަތު ގެއްލެނީއެވެ. ވަޤުތު ފާއިތުވަނީއެވެ. 
ރިޕޯޓްގައި ލަފާކޮށްފައި އޮތްގޮތުން ހާޓްއެޓޭކާއި ސްޓްރޯކްޖެހިގެން ހޮސްޕިޓަލަށް ގެންދެވޭ އަންހެނުންގެ ތެރެއިން މަރުވާ އަންހެނުންގެ ތެރެއިން 80 އިންސައްތަ އާއި ގާތްކުރާ ޢަދަދެއްގެ އަންހެނުންނަކީ މިބުނެވުނު ފަދައިން ފުރަތަމަ އިންޡާރަށް އަޅައިނުލި މީހުންނެވެ. މިއީ ނިޞްބަތަށް ބަލައިފިނަމަ ވަރަށް ގިނަ ޢަދަދެކެވެ. ވީމާ މިކަމަށް ސަމާލުކަން އިތުރުކުރާށެވެ! ކޮންމެ ކަމެއް އެންޒައިޓީ އާއި ނުގުޅުވާށެވެ. އަދި ކޮންމެ ކަމަކަށް ކެތްތެރިވެވޭނެ ކަމަށްވެސް ހީނުކުރާށެވެ!
 
- މަޢުލޫމާތު: ޞިއްޙީ ޚަބަރު