މާލޭން ހުޅުމާލެއަށް ދަތުރުކުރި އެމްޓީސީސީގެ ފެރީއަކަށް އެރުވި ކެމަލް ސިނގިރޭޓް ކޭހެއް ގެއްލިގެން، އެކަމުގެ ބަދަލުގެ ގޮތުގައި ފަސް މިލިއަނަށްވުރެ ގިނަ ރުފިޔާ އެމްޓީސީސީ ހޯދަން ކުރި ދައުވާ ސާބިތުނުވާ ކަމަށް ސިވިލް ކޯޓުން އިއްޔެ ހުކުމްކޮށްފިއެވެ. މިއީ، 2017 ވަނަ އަހަރު، އެމްޓީސީސީ ހުޅުމާލޭ ފެރީއަށް މީހަކު އެރުވި ކެމަލް ސިނގިރޭޓް ކޭހެއް ގެއްލުނު މައްސަލައެވެ. ސިނަމާލެ ބްރިޖް ބޭނުންކުރަން ފެށުމުގެ ކުރިން ހިނގި މި ހާދިސާއާ ގުޅިގެން ދައުވާކުރި މީހާއަކީ އޭނާ ބުނާ ގޮތުން ނަމަ، ހުޅުމާލޭ 10 ފިހާރައަކަށް ސަޕްލައިކުރި މީހެކެވެ. އޭނާގެ ދައުވާގައި ބުނެފައިވާ ގޮތުން އޭނާ، އޮގަސްޓް 8، 2017 ވަނަ ދުވަހު ހަވީރު، މާލޭން ހުޅުމާލެއަށް ދަތުރުކުރި އެމްޓީސީސީގެ މުދާ ފެރީއަށް ސިނގިރޭޓް ކޭސް އެރުވީ ރަސްމީކޮށް ހުއްދަ ހޯދައި އަދި އެ ކޭހުގެ ނާލުވެސް ދެއްކުމަށް ފަހެވެ. މުދާ ފެރީއަށް ސިގިރޭޓް ކޭސް އެރުވުމަށް ފަހު، ހަމަ އެ ގަޑީގައި އޮތް ފަސެންޖަރުން އުފުލާ ފެރީގައި އެ މީހާ ހުޅުމާލެއަށް ދިޔަކަމާއި، މުދާ ފެރީ ހުޅުމާލެއަށް ކައިރި ކުރިއިރު އޭނާ ހުރީ ހުޅުމާލޭގައި ކަމަށް ދައުވާގައި ބަޔާންކޮށްފައިވެއެވެ. އެކަމަކު، އޭނާ އެރުވި 55،000 ރުފިޔާގެ ސިގިރޭޓް ކޭސް މުދާ ފެރީގައި ނެތުމުން، ހަމަ އެ ވަގުތު އެކަން ފެރީގެ ކެޕްޓަނާއި ކޭޝިއަރުގެ ސަމާލުކަމަށް ގެނައި ކަމަށާއި އަދި އެ ކޭސް ވަގަށް ނެގީ ކަމަށް ބެލެވޭ ކަމަށް ކެޕްޓަން ބުނުމުން އެ މައްސަލަ ހަމަ އޭރު ޕޮލިހަށް ވެސް ހުށަހެޅި ކަމަށް އޭނާއާ ހަވާލާދީ މައްސަލަ ނިމުނު ގޮތުގެ ރިޕޯޓުގައި ބަޔާންކޮށްފައިވެއެވެ. މި މައްސަލައިގައި އެމްޓީސީސީއާ ދެކޮޅަށް، ހާދިސާ ހިނގިތާ ހަތް އަހަރު ފަހުން ކުރި ދައުވާގައި އެ މީހާ އެދިފައިވަނީ އޭނާގެ ސިގިރޭޓް ކޭސް ގެއްލިފައިވަނީ އެމްޓީސީސީގެ އިހުމާލުން ކަމަށް ކަނޑައަޅައިދިނުމަށާއި ސިނގިރޭޓް ކޭހުގެ އަގަށްވާ 55،000 ރުފިޔާ އެމްޓީސީސީން ނަގައިދިނުމަށާއި އަދި ވިޔަފާރީގެ އާމްދަނީގެ ގޮތުގައި ނުލިބި ގެއްލުންވެގެން ކަމަށް ބުނެ، 5،559،000 ރުފިޔާ އެމްޓީސީސީން ހޯދުމަށާއި ޝަރީއަތުގެ ހަރަދުގެ ގޮތުގައި 35،000 ރުފިޔާ ހޯދުމަށެވެ. އެމްޓީސީސީން މި މީހާ ހޯދުމަށް އެދުނު ޖުމުލަ އަދަދު 5.6 މިލިއަން ރުފިޔާއަށް އަރާއިރު، މި މައްސަލައިގައި އެމްޓީސީސީގެ ފަރާތުންވަނީ އެ މީހާ ދައުވާކުރާ ސިގިރޭޓް ކޭސް އެރުވީ "ހެއްވާލި" ނަމަކަށް ކިޔާ ފަސެންޖަރުން ދަތުރުކުރާ ފެރީއަށްކަން ފާހަގަކޮށްފައެވެ. އަދި، ހަމަ އެ ފެރީން އެ މީހާ ދަތުރުކުރިއިރު، އޭނާގެ މުދާ ބެލެހެއްޓުމަކީ އޭނާގެ ޒިންމާއެއްކަން ދިފާއުގައި އެމްޓީސީސީން ފާހަގަކޮށްފައިވެއެވެ. މި މައްސަލަ ނިންމުމުގައި، ގެއްލުނު ކަމަށް ދައުވާ ކުރި ސިގިރޭޓް ކޭސް އެމްޓީސީސީގެ ފެރީއަށް އެރުވިކަން އެ މީހާއަށް ސާބިތުކޮށް ނުދެވޭކަމާއި، ނާލު ދެއްކި ކަމަށް ބުނެ ހުށަހެޅި ސްލިޕުގައި ނަމެއް ނެތްކަމާއި އަދި ރޫޓް ފިހާރައިން ސިނގިރޭޓް ގަތްކަން ސާބިތުކުރުމަށް ހުށަހެޅީ އިންވޮއިސްގައި އޮތީ އެހެން ފަރާތެއްގެ ނަމެއް ކަމާއި އެހެން ފަރާތެއްގެ ނަން އޮތް ސަބަބު ވެސް އެ މީހާއަށް ޝަރީއަތުގައި ބުނެ ނުދެވުނުކަންވަނީ ފާހަގަކޮށްފައެވެ. އެހެންވެ، އެ މައްސަލަ ސާބިތުނުވާ ކަމަށް ސިވިލް ކޯޓުން އިއްޔެ ވަނީ ހުކުމްކޮށްފައެވެ.