‘ޢީދުން ސަޢީދުން’ ގެ ނަމުގައި މިނިސްޓްރީ އޮފް އިސްލާމިކް އެފެއާރޒް އާއި މޯލްޑިވްސް ޕޮލިސް ސަރވިސަސް، އެމް.އެން.ޑީ.އެފް އަދި އެހެނިހެން އަމިއްލަ ޖަމިއްޔާތަށް ގުޅިގެން ސެޕްޓެމްބަރު މަހުގެ 13 އަދި 14 ވަނަ ދުވަހުގެ ހަވީރު ރަސްފަންނުގައި ބޭއްވި ކުޑަކުދިންގެ ހަވީރު، މިއަދު ނިންމާލީ ވަރަށް ވެސް ޖޯޝާއި ފޯރީގައެވެ.
އެހެން ކުޑަކުދިންގެ ހަވީރު ތަކާއި ޚިލާފަށް، މިކުޑަކުދިންގެ ހަވީރުގެ ތަފާތަކީ، މިހަވީރުގައި އެއްވެސް ވަރަކަށް މިއުޒިކު ބޭނުން ކޮށްފައެއް ނުވެއެވެ. މިހަވީރަށް ވަނުމުގެ މާކުރިން އިވެމުން ދަނީ މަދަޙައިގެ އަޑެވެ.  މީގެ އިތުރުން ގިނަ ކުޑަކުދިންގެ ހަވީރު ތަކުގައި ކާޓޫން ކެރެކްޓާސް ބޭނުން ކޮށްފައިވީ ނަމަވެސް، މި ކުދަކުދިންގެ ހަވީރުން އެފަދަ އެއްވެސް އެއްޗެއް ފެނިފައިނުވާކަން ވެސް ވަރަށް ބޮޑަށް ފާާހަގަ ވިއެވެ.
އީދުން ސަޢީދުން ކުޑަކުދިންގެ ހަވީރު އިންތިޒާމް ކޮށްދެއްވި އަމިއްލަ ޖަމިއްޔާތަކުގެ ތެރޭގައި ހިމެނެނީ އަލް-ޢަސްރު ޖަމިއްޔާ އާއި، ޖަމީއަތުލް ސަލަފް، ޕީސް ފައުންޑޭޝަން، އަލް ހިޖްރާ،  އެހީ ޖަމިއްޔާގެ އިތުރުން މަހަލްދީބް ފައުންޑޭޝަނެވެ. ‘ދުވަސް’ އަށް މަޢުލޫމާތު ލިބުން ގޮތުގައި އެހުރިހާ ފަރާތްތަށް އެއްވެގެން 10،000 އަށް ވުރެ ގިނަ ހަދިޔާ ކުޑަ ކުދިންނަށް ދިނުމަށްޓަކައި ތައްޔާރު ކޮށްފައިވެއެވެ. މިކުޑަކުދިންގެ ހަވީރު ވަރަށް ވެސް ކާމިޔާބު ހަވީރަކަށް ވެގެން ދިޔަކަން ސާބިތު ކޮށްދެނީ އެހާ ގިނަ ހަދިޔާތަށް، މި ހަވީރު ނިމުމުގެ ކުރިން، އެއްކޮށް ހުސްވުމެވެ. ހަދިޔާތަށް ހުސްވުމުން އެއްވެސް ކުއްޖެއް ދެރަ ނުކުރުމަށް އެފަރާތްތަކުން ވަނީ މެޓާ ބަހާފައެވެ.
‘ޢީދުން ސަޢީދުން’ ކުޑަކުދިންގެ ހަވީރުގައި ބޭއްވުނު ހަރަކާތްތަށް ފޯރި ގަދަ ވުމުގެ އިތުރުން ކުޑަކުދިންނާއި ވަރަށް ގުޅެއެވެ. އެކިއެކި ސްޓޯލް ތަކުގައި އެކިއެކި ކުޅިވަރު ހިމެނިފައިވެއެވެ. އޭގެ ތެރޭގައި ގޯނި ރޭސް، ބެލޫން ރިލޭ، ސްޕޫން ރޭސް،  ވައްބުރެއް ތެރެއަށް ބޯޅަ ޖެހުން، ރިންގް އުކުން، ދީނީ ސުވާލު ކުރުމާއި ފްރޭމް ތެރޭގައި ފޮޓޯ ނެގުމުުގެ އިތުރުންވެސް ވަރަށް ގިނަ ފޯރި ގަދަ ކުޅިވަރުތަށް ހިމެނިފައިވެއެވެ.
 އަމިއްލަ ޖަމިއްޔާތަކުގެ އިތުރުން އެމްއެންޑީއެފް އާއި މޯލްޑިވްސް ޕޮލިސް ސަރވިސަސް އިންވެސް ވަނީ އެބޭފުޅުންގެ ޚާއްސަ ބެލުމުގެ ދަށުން ތަފާތު އެކިއެކި ހަރަކާތްތަށް މިކުޑަކުދިންގެ ހަވީރުގައި ބާއްވާފައެވެ. އެގޮތުން ރަސްފަންނު ބީޗުގެ ސޯޝަލް ސެންޓަރާވީ ސަރަޙައްދުން ފެށިގެން ކުރީގެ ވެސްޓް ޕާރކް ހުރި ސަރަޙައްދާއި ހަމަޔަށް އެބޭފުޅުން އިންތިޒާމް ކުރި އެކިއެކި ކުޅިވަރުތަށް ވަނީ ކުރިއަށް ގެންގޮސްފައިވެއެވެ.
 އޭގެ ތެރޭގައި މައުންޓަން ކްލައިމްބިންގް، ބައިސިކަލް ރައިޑިންގް، ސްނޭކް އެންޑް ލެޑާރ ގޭމް ގެ އިތުރުން ޕޮލިހުންގެ ސައިކަލަކަށް ފަހަރަކު ކުއްޖެއް އަރުވާ ފޮޓޯ ނެގުން ވެސް ހިމެނެއެވެ.
އަދި މީގެ އިތުރުން އެބޭފުޅުން ވަނީ ހަ ސްޓޯލެއް ވެސް މި ކުޑަކުދިންގެ ހަވީރުގައި ހިންގާފައެވެ.
މިފަދަ ކުޅިވަރުތަކުގެ އިތުރުން އެވަގުތު އެތަނަށް ގޮސް ތިބި ކުޑަ ކުދިންގެ ތަފާތު އެކިއެކި ހުނަރު ދައްކާ ދިނުމަށްޓަކާ ސްޓޭޖް ހަރަކާތްތަކެއް ވެސް ވަނީ ބާއްވާފައެވެ. ހުނަރު ތަކުގެ ތެރޭގައި ހިމެނުނީ ކުރު ވާހަކައެއް ކިޔާ ދިިނުން ނުވަތަ މަދަހައެއް ކިޔާ ދިނުމެވެ.
ކޮންމެޔަކަސް މިއަދު ނިމިގެން މިދިޔައީ ރާއްޖޭގެ ތާރީޚުގައި ވެސް އަދި މިހާތަނަށް ދެކެފައިނުވާ، އެކުވެރި، ކާމިޔާބު އަދި އެހާމެ އުފާވެރި ކުޑަކުދިންގެ ހަވީރެއް ކަމަށް ގިނަ ބަޔަކު އެއްބަސްވެއެވެ. އެ އެންމެންވެސް ބުނާ އެއްވާހަކަ އަކީ މި ކުޑަކުދިންގެ ހަވީރުން އެއްވެސް ކުޑަ ކުއްޖެއް އުފަލެއް، މަޖަލެއް ނުކުރެވި ގޮސްފާ ނުވާކަމަށެވެ. އަދި އެއުފާވެރިކަން އެކުދިންގެ މޫނު މައްޗަށް ގެނައުމަށް މިއުޒިކާއި ކާޓޫނު ކެރެކްޓާސް އެއްވެސް ރޯލެއް އަދާ ނުކުރާކަމީ މިކުޑަކުދިންގެ ހަވީރު އިންތިޒާމު ކޮށްގެން ބޭއްވި ހުރިހާ ފަރާތްތަކުން ވެސް ވަރަށް އުފަލާއި ފަޚުރުވެރިކަމާއި އެކީ ފާހަގަ ކުރާ ކަމެކެވެ.