ސ. ހުޅުމީދު އަށް ކަރަންޓް ދިނުމަށް މަގުތަކުގައި ބަހައްޓާފައި ހުންނަ ޑިސްޓްރިބިއުޝަން ފޮށިތަކަށް ގެއްލުން ދިނުން އާންމުވެފައިވާ ކަމަށާއި މިހާރު ވެސް ގިނަ ފޮށިތަކެއް ހުރީ ހަލާކުކޮށްލާފައި ކަމަށް އައްޑޫ ސިޓީ ކައުންސިލުން ބުނެފި އެވެ.
އެ ކައުންސިލްގެ ޑިޕާޓްމަންޓް އޮފް އެންވަޔަރަމެންޓް ހިންގުމާ ހަވާލުވެ ހުންނެވި އިބްރާހީމް ދީދީ މިއަދު ވިދާޅުވީ ހުޅުދު އާއި މީދޫގެ މަގުތަކުގައި ހުރި ގިނަ ފޮށިތަކަށް ގެއްލުން ދީފައިވާ ކަމަށާއި އެކަން އާންމުކޮށް ކުރާ ކަމަށް ފާހަގަކުރެވިފައި ވަނީ ކުޑަ ކުދިން ކަމަށެވެ.
"ރަށުގައި ހުރި ވަރަށް ގިނަ ފޮށިތަކަށް ހުރީ އެކިވަރުގެ ގެއްލުންތައް ދީފައި. އެއްބައި ފޮށިތަކުގެ ދޮރުފަތް ނައްޓާލާފައި ހުރި އިރު ބައެއް ފޮށިތަކުގައި ހުރި ދޮރުތައް ހުޅުވައި ގެއްލުންތަކެއް ދީފައި ހުރީ،" އޭނާ ވިދާޅުވި އެވެ. "މިކަމާ ގުޅިގެން އާންމުން ވަރަށް ޝަކުވާ ކުރޭ. އެކަމަކު މިކަންކުރާ ކަމަށް ފާހަގަކުރެވިފައި ވަނީ ކުޑަކުދިން."
އިބްރާހީމް ދީދީ ވިދާޅުވީ މި މައްސަލަ ބޮޑުވެގެން، އައްޑު އަށް ކަރަންޓުގެ ހިދުމަތް ދެމުން އަންނަ ސަދަން ޔުޓިލިޓީޒް ލިމިޓެޑް (އެސްޔޫއެލް)ގެ ކުރީގެ މެނެޖިން ޑިރެކްޓަރު ހުސައިން ޝާހިދު، އެ ފޮށިތައް ބަދަލުކުރެއްވުމަށް ވެސް ޕްލޭންތަކެއް ކުރެއްވި ކަމަށެވެ. ނަމަވެސް އޭނާ މަގާމުން ވަކިކުރެއްވި ހިސާބުން ފެށިގެން އެކަން ކުރިއަށް ނުގޮސް ހުއްޓިފައިވާ ކަމަށް ދީދީ ވިދާޅުވި އެވެ.
އެސްޔޫއެލްގެ ޑިރެކްޓަރު ސައުދުﷲ ހަމީދު މިއަދު ވިދާޅުވީ ކަރަންޓް ޑިސްޓްރިބިއުޝަން ފޮށިތަކަށް ގެއްލުން ދީފައި ހުރީ ހަމައެކަނި ހުޅުމީދޫގައި ނޫން ކަމަށެވެ. އައްޑޫގެ އެހެން ރަށްރަށުން ވެސް މި މައްސަލަ ފާހަގަކުރެވިފައިވާ ކަމަށް އޭނާ ވިދާޅުވި އެވެ. އެހެންވެ ހަލާކުކޮށްފައި ހުރި ފޮށިތައް ބަދަލުކުރުމުގެ މަސައްކަތް ވަރަށް އަވަހަށް ފަށާނެ ކަމަށް ސައުދު ވިދާޅުވި އެވެ.
މިކަމާ ގުޅިގެން އާންމުންގެ ތެރޭގައި ވެސް ކަންބޮޑުތަކެއް ހުރި ކަމަށް ބައެއް އާންމުން ބުންޏެވެ.
"އިހަކަށް ދުވަހު ވެސް އަޅުގަނޑު ދެކުނި ހުޅުދޫ މަގެއްގައި ހުރި ފޮއްޓެއް ހުޅުވާލައިގެން ކުޑަވަރެއްގެ ކުއްޖަކު ފޮށިތެރެއަށް އަތް ކޮއްޕާލައިގެން ހުއްޓައި،" ހުޅުދޫން ވާހަކަ ދެއްކި މީހަކު ބުންޏެވެ. "މިއީ ވަރަށް ނުރައްކާތެރި ކަމެއް. މިކަމަށް އެބަ ޖެހޭ ފިޔަވަޅެއް އަޅަން. ފޮށިތަކަށް އެގޮތަށް ގެއްލުން ދޭ ކަމަށް ވަންޏާ ކަރަންޓް ލިބުމުގައި ވެސް ދަތިތަކެއް ދިމާވެދާބެ."