ވަގަށް ނަގާފައިވާ ކަރަންޓް ނަރު ރޯލްތަކަކާއިއެކު ދެ މީހަކު ފުލުހުން ހައްޔަރު ކޮށްފިއެވެ.
ފުލުހުން މި ދެ މީހުން ހައްޔަރުކޮށްފައިވަނީ 19 އޯގަސްޓް ވަނަ ދުވަހުގެ 18:00 ހާއިރު އާއްމު ފާރާތަކުން ފުލުހުންނަށް ދިން މައުލޫމާތަކާއި ގުޅިގެން ހިންގި ހާއްސަ އޮޕަރޭޝަނެއްގެ ދަށުން މިދެމީހުން ދުއްވާފައިދިއަ ސައިކަލް ފިޔާތޮށި ހިނގުމަގައި ހުންނަ މ.ޒިލިޔަން ގޭ ކުރިމަތީގައި ޕާކުކޮށްފައި ހުއްޓާ ފެނިގެން ފުލުހުން އެސަރަހައްދަށްގައި މަޑުކޮށްގެން ތިއްބާ އެދެމީހުން އެގެއިން ނުކުމެގެން ސައިކަލަށް އަރަން އުޅެނިކޮށް ކަމަށް ފުލުހުންގެ މީޑިއާއިން ބުނެއެވެ.
ފުލުހުން ބުނީ ވަގަށް ނަގާފައިވާ ކަރަންޓް ނަރު ރޯލްތަށް އަލާފައިވާ ގޯނި ފެނިފައިވަނީ މިދެމީހުން ފުލުހުން ހައްޔަރު ކުރުމަށްފަހު އެދެމީހުން ނުކުމެގެންއައި މ.ޒިލިޔަން ގޭ ފުލުހުން ބަލައި ފާސްކުރިއިރު އެގޭ ތެރޭގައި ބަހައްޓާފައި ހުއްޓައެވެ.
މިމައްސަލާގައި ފުލުހުން ހައްޔަރުކޮށްފައި ވަނީ 30 އަހަރާއި 31 އަހަރުގެ ދެ ފިރިހެނުންނެވެ. އަދި މިމީހުން ހައްޔަރުކޮށް ބަލައި ފާސްކުރިއިރު 30 އަހަރުގެ މީހާ ލައިގެން ހުރި ގަމީހުން ދެ އިސްކުރާއި ދޮރު ތަންޑުގެ ބައެއްބައިތަށް ފެނިފައިވާ ކަމަށާއި އުމުރުން 31 އަހަރުގެ މީހާ އަތުން 1418.00 ދިވެހި ރުފިޔާއާއި އަންގި ޖޯޑެއް ފެނިފައިވާ ކަމަށްވެސް ފުލުހުން ބުނެއެވެ.
ފުލުހުން ބުނީ މިދެމީހުން ތެރެއިން 31 އަހަރުގެ މީހާ ފުލުހުންގެ އަމުރަށް ނުކިޔަމަން ތެރިވެ ފުލުހުން މަޑުކުރަން ބުނުމުން މަޑުނުކޮށް ފިލަން މަސައްކަތްކޮށްފައިވާ ކަމަށާއި އަދި އޭނާއަކީ ދެވަނަ ފުރުސަތުގެ ދަށުން ދޫކޮށްލާފައިވާ މީހެއް ކަމަށެވެ.
ފުލުހުން މި ދެމީހުންގެ އުމުރު އާއްމު ކުރިނަމަވެސް މި ދެމީހުންގެ ފުރިހަމަ މައުލޫމާތު މީޑިއަށް އާއްމުކޮށްފައެއް ނުވެއެވެ.
ފުލުހުން ބުނީ މިމައްސަލަ ތަހުގީގު ކުރަމުންދާ ކަމަށެވެ.