މިދިޔަ އޮކްޓޯބަރު މަހު އެކުލަވާލި ހަނގުރާމަ ހުއްޓާލުމުގެ އެއްބަސްވުމުގެ ދަށުން، ހަމާސްގެ ހަތިޔާރު އަތުލުމަށް އުދަނގޫވަމުންދާ ދަނޑިވަޅެއްގައި، ގާޒާއިން ހަތިޔާރު ނައްތާލުމުގެ މަސައްކަތް ކުރިއަށް ގެންދާނީ ބައިނަލްއަގުވާމީ ގޮތުން ފަންޑުކުރާ ހަތިޔާރު ގަތުމުގެ ޕްރޮގްރާމެއްގެ ދަށުންކަން އެމެރިކާއިން އދ.ގެ ސަލާމަތީ މަޖިލީހަށް އަންގައިފި އެވެ.
އދ.ގެ ސަލާމަތީ މަޖިލީހުގައި ވާހަކަދައްކަވަމުން އެމެރިކާއިން އދ.އަށް ކަނޑައަޅާފައި ހުންނަވާ ސަފީރު މައިކް ވޯލްޓްޒް އިއްޔެ ވިދާޅުވީ، އެކަން ކުރިއަށްދާނީ ބައިނަލްއަގުވާމީ މިނިވަން މޮނިޓަރުންގެ ބެލުމުގެ ދަށުން ކަމަށެވެ.
މިއީ އެމެރިކާގެ ރައީސް ޑޮނަލްޑް ޓްރަމްޕް މެދުވެރިވެގެން އެކުލަވާލި ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާގެ ބައެކެވެ. މި އެއްބަސްވުމުގައިވާ ގޮތުން، އިޒްރޭލު ސިފައިން ގާޒާއިން އިތުރަށް ފޭބުން ބިނާވެފައިވަނީ، އަދިވެސް ގާޒާގެ ބޮޑު ބައެއްގެ ކޮންޓްރޯލް އޮތް ހަމާސް ޖަމާއަތުން ހަތިޔާރު ބެހެއްޓުމުގެ މަރުހަލާގެ މައްޗަށެވެ.
"ގާޒާ ހިންގުމުގައި ހަމާސްގެ އެއްވެސް ދައުރެއް، ސީދާ ގޮތުން ވިޔަސް ނުވަތަ ނުސީދާ ގޮތުން ވިޔަސް، އެއްވެސް ސިފައެއްގައި އޮވެގެން ނުވާނެ،" ވޯލްޓްޒް ވިދާޅުވި އެވެ.
މީގެ އިތުރުން، ހަނގުރާމައިގެ ބޭނުމަށް ބޭނުންކުރާ ހުރިހާ ވަސީލަތްތަކާއި ބިންގަރާސްތަކާއި ހަތިޔާރު އުފައްދާ ކާރުހާނާތައް ނައްތާލެވޭނެ ކަމަށާއި އެ ތަންތަން އަލުން ބިނާކުރުމަށް ފުރުސަތު ނުދޭނެ ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވި ގޮތުގައި، ހަތިޔާރުތައް ނައްތާލުމަށް އެއްބަސްވެފައިވާ އުސޫލެއްގެ ދަށުން، ބައިނަލްއަގުވާމީ އެހީގައި ހިންގާ ހަތިޔާރު ގަތުމާއި މުޖުތަމައަށް އަލުން އަހުލުވެރިކުރުވުމުގެ ޕްރޮގްރާމެއް މެދުވެރިކޮށް އެ ތަކެތި ބޭނުންނުކުރެވޭނެ ގޮތް ހަދާނެ އެވެ. އެމެރިކާގެ ސްޓޭޓް ޑިޕާޓްމަންޓުން ބުނީ މި މަސައްކަތް ތަންފީޒުކުރުމާ ގުޅޭ ގޮތުން މަޝްވަރާތައް މިހާރު ވެސް ކުރިއަށްދާ ކަމަށެވެ.
ހަމާސްއިން ފަލަސްތީނުގެ އެހެން ޖަމާއަތްތަކާއި މެދުވެރިންނާ އެކު ހަތިޔާރު ބެހެއްޓުމާ ގުޅޭ ގޮތުން މަޝްވަރާކުރަން އެއްބަސްވެފައިވީ ނަމަވެސް، އަދި މިހާތަނަށް އެކަމުގެ ތަފްސީލީ ހުށަހެޅުމެއް ލިބިފައިނުވާ ކަމަށް ހަމާސްގެ ދެ އޮފިޝަލަކު ރޮއިޓާސްއަށް ބުންޏެވެ. އެމެރިކާގެ އޮފިޝަލަކު ވިދާޅުވީ، ހަތިޔާރު ބެހެއްޓުމުގެ މަރުހަލާގައި މައާފު ދިނުމުގެ އުސޫލެއް ހިމެނިދާނެ ކަމަށް ވޮޝިންޓަނުން ގަބޫލުކުރާ ކަމަށެވެ.
އިޒްރޭލުން އދ.އަށް ކަނޑައަޅާފައި ހުންނަވާ ސަފީރު ޑެނީ ޑަނަން ސަލާމަތީ މަޖިލީހުގައި ވިދާޅުވީ، ހަމާސްއަކީ އަދިވެސް ހަތިޔާރު ގެންގުޅޭ ޖަމާއަތެއް ކަމަށެވެ. އޭނާގެ އަންދާޒާއަކީ އެ ޖަމާއަތުގެ އަތުގައި އެތައް ހާސް ރޮކެޓާއި ޓޭންކާއި މިސައިލާއި ގާތްގަނޑަކަށް 60،000 އެސޯލްޓް ރައިފަލް ހުރި ކަމަށެވެ.
"މި ހަތިޔާރުތަކަކީ ހަމައެކަނި އިޒްރޭލާ ދެކޮޅަށް ބޭނުންކުރާ ތަކެއްޗެއް ނޫން. މިއީ ހަމާސްގެ ވެރިކަމާ ދެކޮޅު ގާޒާގެ ރައްޔިތުންނާ ދެކޮޅަށް ވެސް ބޭނުންކުރާ ތަކެތި،" އޭނާ ވިދާޅުވި އެވެ.