މިއަދު ހެނދުނު 6:30 ބައިވެ ބޮޑުވުމާ އެކު، މާލެ އާއި ރަށްރަށުގެ މަގުތައްމައްޗަށް، އަނެއްކާވެސް އާ ދިރުމެއް ގެނުވައިފި އެވެ. ދިރާސީ އާ އަހަރުގެ ކިޔެވުން މިއަދު ފެށިއިރު، މަގުތައް ފުރާލީ އެކި ކުލަކުލައިގެ ޔުނީފޯމުގައި، އެކި ޑިޒައިންތަކުގެ ފޮތް ދަބަހާ އެކު ސްކޫލަށް ދާން ނުކުތް ދަރިވަރުންނާއި އެ މީހުންގެ ބެލެނިވެރިންތަކުންނެވެ.
އަހަރީ ބޮޑު ޗުއްޓީއަށް ފަހު 80،000އަށް ވުރެ ގިނަ ދަރިވަރުން މިއަދު ސްކޫލަށް ނުކުންނާނެ އެވެ. އާ އުއްމީދުތަކާއި އާ ހުވަފެންތަކެއް ހިފައިގެންނެވެ.
"ބޮޑު ސްކޫލަކަށް ދެވޭތީ ވަރަށް އުފާވެފައި ހުރީ. ރޭ ވެސް ދެތިން ފަހަރަކު ދަބަސް ޗެކްކުރި ފޮތްތައް ހަމަތޯ ބަލަން،" ޕްރީ ސްކޫލު ނިންމައި މިއަހަރު އަލަށް އަމީނިއްޔާ ސްކޫލަށް ބަދަލުވާ ދަރިވަރެއްގެ މަންމަ ބުންޏެވެ.
"އަޅުގަނޑު ވެސް މިހިރީ ވަރަށް އެކްސައިޓެޑް ވެފައި."
އާ އަހަރުގެ ކިޔެވުން ފެށުމާ އެކު ގެތަކުން ވެސް ފެންނަނީ ހަލަބޮލި ކަމެވެ. ސްކޫލަށް ފޮނުވުމަށް ހެނދުނު ހެނދުނާ ދަރިން ނިދިން ހޭލެއްވުމާއި ލަސް ވެގެން މަންމަމެން ހަޅޭއްލަވާ އަޑެވެ. ކޮންމެވެސް އެއްޗެއް މަދުވެދާނެ ކަމުގެ ކަންބޮޑުވުމެވެ. ދިގު ޗުއްޓީއަކަށް ފަހު ގިނަ ކުދިންގެ ރޫޓިން ބަދަލުވެފައިވާއިރު އަނެއްކާ ވެސް އާ ފެށުމަކުން ފަށަން ޖެހުމުން އެ އުނދަގޫ ބައެއް ބެލެނިވެރިންނަށް މިއަދު ތަހައްމަލު ކުރަން ޖެހުނެވެ.
ގަޑިޖެހެން ކައިރިވި އިރު، ސްކޫލު ދޮށުން ބަރުގޮނުގެ އަޑު ނުކެނޑެ އެވެ. ކުއްލި އަކަށް، ވަކި މަގުތަކެއް ހަލަބޮލި ކޮށްލައިފި އެވެ. އެކަމަކު މިއަދު މާ ބޮޑު ޝަކުވާއެއް އެއްވެސް މީހެއްގެއެއް ނެތެވެ. މާހައުލުގައި އޮތީ އުފާވެރިކަމެވެ.
އެޑިއުކޭޝަން މިނިސްޓްރީން ބުނި ގޮތުގައި، މިއަދު ސަރުކާރުގެ 219 ސްކޫލެއްގައި ކިޔަވައިދޭނެ އެވެ. އެ މިނިސްޓްރީން އެންމެ ފަހުން އާއްމުކުރި ތަފާސްހިސާބުތަކަށް ބަލާއިރު:
މި އަހަރު ޕްރީ ސްކޫލު ނިންމައި 4،700އަށް ވުރެ ގިނަ ދަރިވަރުން ގްރޭޑް އެކަކަށް ބަދަލުވާނެ
ރަށްރަށުގެ ސްކޫލުތަކުން މާލެއަށް 1،500އެއްހާ ދަރިވަރުން ބަދަލުވި
މާލެއިން ހުޅުމާލޭގެ ސްކޫލުތަކަށް 800އަށް ވުރެ ގިނަ ދަރިވަރުން ބަދަލުވި
އާ އަހަރުގެ ކިޔެވުން މިއަދު ފެށިއިރު، އެންމެ ބޮޑު ސްކޫލެއްގެ ގޮތުގައި އަލަށް ހުޅުވީ، ހުޅުމާލޭ ދެ ވަނަ ފިޔަވަހީގައި ގާއިމްކޮށްފައިވާ ޝަހީދު އަލީ ސްކޫލެވެ. އެ ސްކޫލުގައި މި އަހަރު 1،900އަށް ވުރެ ގިނަ ދަރިވަރުން ކިޔަވާނެ އެވެ.
އެޑިއުކޭޝަން މިނިސްޓްރީން އެހެން ބައެއް މީޑިއާތަކަށް ދިން މައުލޫމާތަށް ބަލާއިރު، ސްކޫލުތައް މި ހުޅުވީ ފުރިހަމައަށް ތައްޔާރުވެގެންނެވެ. ދަރިވަރުންނަށް ބޭނުންވާ ހުރިހާ ފޮތްތަކެއް ސްކޫލުތަކަށް މިހާރު ފޮނުވާ ނިމިފައިވާއިރު، ޖުމްލަ ގޮތެއްގައި ގާތްގަނޑަކަށް ގިނަ ޓީޗަރުން ހަަމަވާނެ އެވެ.