ޑޮކްޓަރަށް ދެއްކުމަށް ފަހު ހަދާ ޓެސްޓްތަކާއި އެކި ރެކޯޑްތައް ފައިލްކޮށްގެން ގެންގުޅުމަކީ އުނދަގޫ އަދި ޒަމާނައް ފެތޭ ކަމެއް ނޫން ކަމަށް ހެލްތު މިނިސްޓަރު އަބުދުﷲ ނާޒިމް އިބްރާހީމް ވިދާޅުވެއްޖެއެވެ.
“މޯލްޑިވްސް އިންޓެގްރޭޓެޑް ހެލްތު އިންފޮރމޭޝަން ސިސްޓަމް” ( މިހިސް ) ގެ ޕަބްލިކް ޕޯޓަލް އިފްތިތަހުކުރުމަށް ބޭއްވި ރަސްމިއްޔާތުގައި މިނިސްޓަރު ވަނީ ކޮންމެ ތިންމަހު މަންމަ ޑޮކްޓަރަށް ދައްކާ، ހަދަންޖެހޭ ޓެސްޓްތަކާއި އެ ޓެސްޓްތަކުގެ ނަތީޖާ ފައިލްކޮށްގެން ގެންގުޅެންޖެހޭ ގޮތުގެ ތަޖުރިބާ ހިއްސާކުރައްވާފައެވެ. މިނިސްޓަރު ވިދާޅުވީ މިއަދު އިފްތިތާހް ކުރެވުނު ޕޯޓަލް އަކީ މިފަދަ ކަންކަމަށް ހުރި ގޮންޖެހުންތައް ހައްލު ލިބި ޞިއްޚީ ނިޒާމުގައި ކަންކަން ހަރުދަނާކުރުމަށް އެއްކުރެވޭ މައުލޫމާތަކަށް ވެގެންދާނެކަމަށެވެ.
މި ޕޯޓަލްގެ މަގްސަދަކީ އާންމުންނަށް މުހިއްމު ސިއްހީ މައުލޫމާތު ހާމަކަން ބޮޑު ގޮތެއްގައި ރައްކާތެރިކަމާއިއެކު އަދި ފަސޭހައިން ލިބޭނެ މަގު ފަހިކޮށްދިނުމެވެ. އެގޮތުން 01 ޖެނުއަރީ 2025 އިން ފެށިގެން އުފަންވާ ތުއްތު ކުދިންގެ ވެކްސިން ކާޑުގައި ހުންނަ މައުލޫމާތު މި ޕޯޓަލް އިން ފެންނަން ހުންނާނެއެވެ. އޭގެ ތެރޭގައި ޑިޖިޓަލް ވެކްސިނޭޝަން ކާރޑް، ހެދި ބޮޑުވުމުގެ ޗާރޓް، ހެދިބޮޑުވަމުންދާ މިންވަރު ދެނެގަނެވޭނެ ހަރުފަތްތަކާއި ކުއްޖާއަށް ދޭ ވިޓަމިން އޭ އަދި ފަނިބޭހުގެ މައުލޫމާތު ބެލެނިވެރިންނަށް މި ޕޯޓަލް މެދުވެރިކޮށް ލިބޭނެއެވެ. މީގެ އިތުރުން ހެދިބޮޑުވަމުންދާ މިންވަރު މޮނިޓަރކޮށް، ވެކްސިން ޖަހަންޖެހޭ ދުވަސް ކަރިވުމުން ބެލެނިވެރިންނަށް ހަނދާންކޮށްދިނުމަށް މި ސިސްޓަމް މެދުވެރިކޮށް ނޮޓިފިކޭޝަން ލިބިގެންދާނެއެވެ.
މިނިސްޓަރު ކުރިއަށް އޮތް ތަނުގައި މި ޕޯޓަލް މެދުވެރިކޮށް މާބަނޑު އަންހެނުންގެ ސިއްހަތާއި ގުޅޭ މައުލޫމާތު ވެސް ލިބޭނެ ކަމަށެވެ. “ކުރިމަގުގައި މި ޕޯޓަލް އިތުރަށް ފުޅާކޮށް، މާބަނޑު އަންހެނުންގެ ސިއްޙަތާއި ގުޅޭ މައުލޫމާތުތަކާއި، ޑޮކްޓަރަށް ދައްކަމަންދާ ގޮތުގެ ރެކޯރޑުތަކާއި، ހަދާފައިވާ ޓެސްޓުތަކާއި ޑައިގްނޯސިސްތަކުގެ ތަފްސީލުތައް ފެންނާނެ” ނާޒިމް ވިދާޅުވިއެވެ.
މި ނިޒާމުގެތެރެއިން އެއްކުރެވޭ މައުލޫމާތު އާއްމުންނަށް ބެލޭނެ ޕޯޓަލްއެއް ގާއިމު ކުރެވިފައިވަނީ މިނިސްޓްރީ އޮފް ހެލްތާއި ދުނިޔޭގެ ސިއްހަތު ޖަމްއިއްޔާ ގުޅިގެންނެވެ.
ޕްރައިމަރީ ހެލްތު ކެއަރ މޮޑިއުލް ރޯލްއައުޓް ކުރަމުންދާ އަތޮޅު ތަކުގައި ދިރިއުޅޭ ފަރާތްތަކަށް އެފަރާތެއްގެ މައުލޫމާތު މި ޕަބްލިކް ޕޯޓަލް އިން ފެންނަން ހުންނާނެއެވެ. އަދި މީގެ އިތުރުން ޕްރައިމަރީ ހެލްތު ކެއަރ ޕްރޮގްރާމްގައި އެންރޯލްވެފައިވާ ފަރާތްތަކުގެ ތެރެއިން ފޮލޯއަޕް ހަދަންޖެހޭ ފަރާތްތަކަށް ޑޮކްޓަރަށް ދައްކަންޖެހޭ ދުވަސް ކައިރިވުމުން ނޮޓިފިކޭޝަނެއް ލިބިގެންދާނެއެވެ. ކުރިމަގުގައި މި ޕޯޓަލް އިތުރަށް ފުޅާކޮށް، އާންމު ޞިއްޙަތާއި ގުޅުން ހުރި މައުލޫމާތުތަކުގެ އިތުރުން ޑޮކްޓަރަށް ދައްކައިގެން ހޯދަމުންދާ ފަރުވާ އާއި ޑައިގްނޯސްޓިކްސް ޓެސްޓު ތަކުގެ ނަތީޖާތައްވެސް ފެންނަންހުންނާނެއެވެ.