ރާއްޖޭގައި ހިންގާ އެންމެ ކާމިޔާބު ޑޮމެސްޓިކް އެއާޕޯޓަކީ ބ. ދަރަވަންދޫ އެއާޕޯޓު ކަމަށާއި އެއާޕޯޓުގެ ވަސީލަތްތައް ތަރައްގީކުރުމަށް އެ ތަން ތަރައްގީކޮށްފައިވާ ކުންފުނި އަތުން އެއާޕޯޓު ނަގައި އައިލެންޑް އޭވިއޭޝަން (އައިއޭއެސް)އާ ހަވާލުކުރަން ނިންމާފައިވާ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.
ވީ ކިހިނެއް؟ - ބ. އަތޮޅަށް ކުރައްވަމުން ގެންދަވާ ދަތުރުފުޅުގައި މިރޭ ދަރަވަންދޫ ރައްޔިތުންނާ ބައްދަލުކުރައްވައި ރައީސް ވިދާޅުވީ ދަރަވަންދޫ އެއާޕޯޓުން ހިދުމަތް ދިން ނަމަވެސް އެއާޕޯޓަށް އިތުރު ތަރައްގީ ގެނައުމަށް މަސައްކަތްތައް ކުރެވިފައި ނެތް ކަމަށެވެ.
ތަފްސީލް - މިހާރު ވެސް ހިންގާ އެއާޕޯޓުތައް ތަރައްގީ ކުރުމަށް ވެވަޑައިގެންފައިވާ ވައުދުގެ ދަށުން ދަރަވަންދޫ އެއާޕޯޓު ވެސް ތަރައްގީ ކުރަން ނިންމާފައިވާކަން ރައީސް ފާހަގަ ކުރެއްވި އެވެ.
ދަރަވަންދޫ އެއާޕޯޓު ތަރައްގީކުރީ ކޯސްޓްލައިން ހޮޓެލްސް އެންޑް ރިސޯޓްސް އިންނެވެ. އެއާޕޯޓު ހުޅުވާ ހިދުމަތް ދޭން ފެށީ 2012 ވަނަ އަހަރު އެވެ.
ގިނަ ރިސޯޓުތަކެއް އޮންނަ ބ. އަތޮޅުގައި މިހާރު އޮތް ހަމައެކަނި އެއާޕޯޓަކީ ދަރަވަންދޫ އެއާޕޯޓެވެ. ނަމަވެސް އެއާޕޯޓުގެ ޖާގައިގެ ދަތިކަމާއި ހިދުމަތް ދޭން ހުންނަ ވަސީލަތްތައް މަދުކަމުގެ ޝަކުވާ ބޮޑެވެ.
ރައީސް މިރޭ ވިދާޅުވީ ދަރަވަންދޫ އެއާޕޯޓަށް އިންވެސްޓުކޮށްފައިވާ ކުންފުންޏާ މަޝްވަރާކޮށް ދެ ފަރާތަށް އެއްބަސްވެވޭ ގޮތަކަށް އެ ކުންފުނި އަތުން އެއާޕޯޓު ނަގައި އައިލެންޑް އޭވިއޭޝަނާ ހަވާލުކޮށް، ސަރުކާރުން ބޭނުންވާ ފެންވަރަކަށް  އެއާޕޯޓު ތަރައްގީކޮށް، އޮޕަރޭޓު ކުރަން ނިންމާފައިވާ ކަމަށެވެ.
"އެކަން ގަވައިދާ އުސޫލުތަކާ އެއްގޮތަށް ވަރަށް އަވަސްމިނެއްގައި ކުރިއަށް ގެންދާނަން. އެ ތަނަށް އިންވެސްޓުކޮށްފައިވާ ފަރާތާއެކު އެއްބަސްވުމަކަށް އަންނަން،" ރައީސް ވިދާޅުވި އެވެ.
ރައީސް ވިދާޅުވީ އެއާޕޯޓު ތަރައްގީކުރުމުގެ މަސައްކަތަށް އައިލެންޑް އޭވިއޭޝަން އޮތީ ތައްޔާރަށް ކަމަށާއި އެއާޕޯޓު ތަރައްގީވުމުން އޭގެ ހެޔޮ އަސަރު މުޅި ބ. އަތޮޅަށް ވެސް ކުރާނެ ކަމަށެވެ.