ކަރަންޓަކީ އަބަދުވެސް ކެނޑޭ އެއްޗެއް ކަމަށާއި، އެހެންކަމުން އެއީ ކުއްލި މައްސަލަ ހުށައަޅަންޖެހޭ ކަމެއް ނޫން ކަމަށް ޕީއެންސީގެ ޕީޖީ ލީޑަރ އިބްރާހިމް ފަލާޙް ވިދާޅުވެއްޖެއެވެ.
ފަލާޙް މިހެން ވިދާޅުވެފައިވާއިރު، މާލޭ ސަރަހައްދުން އިއްޔެ ކަރަންޓު ކެނޑުނު މައްސަލައިގައި އެމްޑީޕީން މިއަދު މަޖިލީހަށް ހުށައެޅި ކުއްލި މައްސަލަ ޕީއެންސީގެ މެޖޯރިޓީ އޮންނަ މަޖިލީހުން ވަނީ ބޭރުކޮށްލައިފައެވެ.
މިއަދުގެ ޖަލްސާގައި ކުއްލި މައްސަލައާ ގުޅޭގޮތުން ވާހަކަފުޅު ދައްކަވަމުން ފަލާހު ވިދާޅުވީ، ކަރަންޓު ކެނޑުމުން މަޖިލީހަށް ކުއްލި މައްސަލައެއް ހުށަހަޅަންވާނީ ސަރުކާރުގެ އިހުމާލުން އެފަދަ ކަމެއް ހިނގިކަމަށްވާނަމަ ކަމަށެވެ.
“މިފަދަ ހާދިސާތަކަކީ ގައުމެއްގެ ހައިސިއްޔަތުން، ރަށެއްގެ ހައިސިއްޔަތުން އަދި ގެއެއްގެ ހައިސިއްޔަތުން ވެސް ހިނގައިފާނެ ކަންކަން، މިއީ އަޅުގަނޑުމެން މިހައި މުހިންމު މަސައްކަތެއް ކުރާތަނަކަށް ކުއްލި މައްސަލައެއްގެ ގޮތުގައި ނޫނީ އެނޫން ވެސް ގޮތަކަށް ހުށަހަޅާ މައްސަލަތަކަކީ ހަގީގަތުގައި އެކަމުގައި ވެސް ކޮންމެވެސް ފައިދާއެއް މަންފާއެއް އޮތް ކަމަކަށް ވާންވާނެ.“ ފަލާހު މިއަދު ވިދާޅުވިއެވެ.
ފަލާޙް މިހެން ވިދާޅުވެފައިވާއިރު، މާލެ ސަރަހައްދުން އިއްޔެ ފަސްގަނޑިއިރަށް ކަރަންޓު ކެނޑުނު މައްސަލަ ސީރިއަށް މައްސަލައެއްގެ ގޮތުގައި ތަހުގީގު ކުރުމަށް ރައީސް މުޢިއްޒު ވަނީ ފުލުހުންނަށް އަންގަވާފައެވެ.
އަދި ފުލުހުން ބުނެފައިވަނީ، ކަރަންޓު ކެނޑެން ދިމާވި ސަބަބު ދެނެގަތުމަށް މައްސަލަ ތަހުގީގު ކުރަމުންދާ ކަމަށެވެ.