ރައްޔިތުންގެ މިލްކް ޕީ.ޕީ.އެމް. އިން އެކަނި ބޭނުންކުރާކަށް ބޭނުމެއް ނޫންކަމަށާއި އެޕާޓީއަކީ ޤާނޫނާއި އެއްގޮތަށް އަމަލުކުރަމުން އަންނަ ޕާޓީއެއްކަމަށް ޕީ.ޕީ.އެމް.ގެ އިންތިޤާލީ ރައީސް މައުމޫނު އަބްދުލް ޤައްޔޫމް ވިދާޅުވެއްޖެއެވެ.
ރޭ ޕީ.ޕީ.އެމް. އިން އާޓިފިޝަލް ބީޗްގައި ބޭއްވި ބޮނޑިބަތް ކެއުމުގެ ހަފްލާގައި ވާހަކަފުޅު ދައްކަވަމުން ޤާނޫނުން އެންމެންނަށް ހަމަހަމަ ހައްޤުތަކެއް ލިބިދޭކަމަށާއި ވަކި ބަޔަކު ބޭނުންވާ ގޮތަކަށް ވަކި ތަނެއްގައި ވަކި ގޮތަކަށް ތިބުމުގެ އިހުތިޔާރެއްނެތްކަމަށް ރައީސް މައުމޫނު ވިދާޅުވިއެވެ. ރައީސް މައުމޫނު މިހެން މިވިދާޅުވީ އެމް.ޑީ.ޕީ. އިން އުސްފަސްގަނޑުގައި ހިންގަމުންދާ ސިޔާސީ ހަރަކާތްތައް ހުއްޓުވުމަށް ޕީ.ޕީ.އެމް. ވެސް ހިމެނޭ ކޯލިޝަން ސަރުކާރުން މަސައްކަތް ކުރަމުންދާ ދަނޑިވަޅެއްގައެވެ. އެގޮތުން އެމް.ޑީ.ޕީ. އިން އުސްފަސްގަނޑުގައި މިހާރު ހިންގަމުންދާ ހަރަކާތްތަކަށް އިޝާރަތްކުރައްވާ މައުމޫން ވިދާޅުވީ އެހައްޤު ޕީ.ޕީ.އެމް. އަށް ލިބުނު ނަމަވެސް އެޕާޓީއަކީ ވަރަށް ހަރުދަނާ ޕާޓީއެއް ކަމަށާއި އެހެން ބައެއްގެ ހައްގުތަކަށް އުނިކަމެއް ލިބޭ ގޮތަށް ހަރަކާތްތައް ނުހިންގާނެ ކަމަށެވެ.