އިސްތިމާރީ އިސްރާއީލުގެ
އުދުވާނީ ބާރުތަކުން ހުއްޓާނުލާ ޣައްޒާއަށް ދެމުންގެންދާ އުދުވާނުތަކުގައި
ވޭތުވެދިޔަ 24 ގަޑިއިރުގެ ތެރޭގައި
ޣައްޒާއިން 33 މީހުން ޝަހީދުކޮށްލައިފިއެވެ.
ޣައްޒާގެ އެކި
ހިސާބުތަކަށް ވަރުގަދައަށް ބޮންއަޅައި އަދި އެއްގަމުމަގުން ޓެރަރިސްޓު ސިފައިން
ދެމުންގެންދާ ހަމަލާތަކުގައި 33 މީހުން ޝަހީދުވެ 137 މީހުން ޒަޚަމްވެފައިވާ ކަމަށް
ޣައްޒާގެ ހެލްތު މިނިސްޓްރީން ބުނެއެވެ.
އިސްތިއުމާރީ
ޓެރަރިސްޓުން ފޭއިތުވި 24 ގަޑިއިރުގެ ތެރޭގައި އެންމެ ވަރުގަދައަށް
ބޮންއަޅާފައިވަނީ ޣައްޒާގެ އުތުރުގެ ނުސައިރަތު ރެފިއުޖީ ކޭމްޕަށެވެ.
އެ ކޭމްޕްގައި
އާންމުންގެ ގެތަކަށާއި، އާންމުން ދިރިއުޅެމުންދާ އެހެން އިމާރާތްތަކާއި، މިސްކިތްތަކާއި،
އަދި ޕަބްލިކް އިމާރާތްތަކަށް އިސްރާއީލުގެ ޖެޓްތަކާއި ޑްރޯންތަކުން ވަރުގަދައަށް
ބޮންއެޅުމުގެ ސަބަބުން މިހާތަނަށް 29 މީހަކު ޝަހީދުވެފައިވާކަން ކަށަވަރު
ވެފައިވާއިރު، މީހުން ޕެރަމެޑިކްސްއާއި ރެސްކިއު ޓީމުތަކުން އަދިވެސް ގެންދަނީ
ވެއްޓިފައިވާ ގެތަކާއި އިމާރާތްތަކުގެ ދަށުން މަރުވެފައިވާ މީހުންގެ ހަށިތައް
ނެރެމުންނެވެ.
ގިނަމީހުން
މަރުވެފައިވަނީ ގެތަކުގެ އެތެރޭގައި ތިއްބައި ބޮންއެޅުމުގެ ސަބަބުންނެވެ.
އަނެއްބައި މީހުން މަރުވެފައިވަނީ ސަލާމަތް ހޯދުމަށް ގެއިން ނުކުންނަ ވަގުތު
ޑްރޯން ހަމަލާތައް ދީގެންނެވެ. އަދި މީހުން ސަލާމަތްކުރަން އާންމުން އެއްވާ
ވަގުތުވެސް ހަމަލާތައް ދީ އެތައްބަޔަކު ޝަހީދުކުރަމުން ގެންދެއެވެ.
މީހުން
ސަލާމަތްކުރަންދާ ޕެރަމެޑިކްސް ޓީމުތަކަށްވެސް، އިސްރާއީލުގެ ޓެރަރިސްޓު ސިފައިން ހުރަސްއަޅަމުން
ގެންދެއެވެ.
ޣައްޒާގެ އުތުރުގައި
ހުންނަ ކަމާލް އަދްވާން ހޮސްޕިޓަލަށް މެދުނުކެނޑި ޓެރަރިސްޓު ހަމަލާތައް
ދެމުންގެންދާއިރު، މިއަދު ދިން ޑްރޯން ހަމަލާއެއްގައި ހޮސްޕިޓަލުގެ އައިސީޔޫގެ
ޑިރެކްޓަރަށް ޑްރޯން ހަމަލާއެއްދީ ޝަހީދު ކޮށްލާފައި ވެއެވެ.
ޚާން ޔޫނިސްއަށް ދިން
ހަމަލާއެއްގައި 4 މީހުން ޝަހީދުކޮށް އެތައްބަޔަކު ޒަޚަމްކޮށްލާފައި ވެއެވެ.
ނުސައިރަތު ރެފިއުޖީ ކޭމްޕްގެ
އިތުރުން، ދީރުލް ބަލާހާއި، ގާޒާ ސިޓީގެ ޚާން ޔޫނިސް އަދި އެހެން ރަށްތަކަށްވެސް
ކެނޑިނޭޅި އިސްރާއީލުން ގެންދަނީ ހަމަލާތައް ދެމުންނެވެ.
ލުބުނާނަށް
ދެމުންގެންދިޔަ ހަމަލާތައް ހުއްޓާލުމާއެކު އިސްރާއީލުން ޣައްޒާއަށް ދެމުންގެންދާ
އުދުވާނީ ހަމަލާތައް އެތައްގުނަ އިތުރުކޮށް ވަރުގަދަ ކޮށްފައިވާ ކަމަށް މީޑިއާ
ވަސީލަތްތަކުން ގެންދަނީ ރިޕޯޓް ކުރަމުންނެވެ.