ޕަލްސް ކުންފުނިން މުއައްޒަފުންނަށް ފޮނުވި މެމޯ ކިޔާލުމުން، ރައީސް މުއިއްޒުގެ ފަރާތުން ފަތުރުވެރިކަމުގެ ދާއިރާއަށް އޭނާ މިކުރިމަތި ކުރުވި ނިކަމެތިކަން އިހްސާސް ވެގެން ދިޔައެވެ. އިހްސާސް ކުރެވިގެން ދިޔައީ އަސަރާއި ހިތްދަތިކަމާއި، މި ވެރިކަމުން ލިބެމުންދާ ގިލަންވެރިކަމެވެ.
ޑޮލަރު މާރުކުރަން މަޖުބޫރުކުރުމާ ގުޅިގެން މުސާރަ ދެވޭނީ ދިވެހި ފައިސާއިން ކަމަށް ބުނެ ފޮނުވި މެމޯގައި އޮތީ މުއިއްޒު ކުރިމަތި ކުރުވި އަނިޔާވެރި ހާލަތެވެ. އެ މެމޯގައި އޮތީ އެމްއެމްއޭއިން މިހާރު އޮތް އުސޫލު ބަދަލުނުކޮށްފި ނަމަ ޑޮލަރު ތާށިވެ، މުސާރަ އާއި ސާވިސް ޗާޖު ޑޮލަރުން ނުދެވޭނެ ކަމުގެ ވާހަކައެވެ.
“މާރުކުރަން ޖެހޭ ޑޮލަރުގެ އަދަދަކީ މުޅި ޖުމްލަ އާމްދަނީގެ 30 ޕަސެންޓާއި 60 ޕަސެންޓާ ދޭތެރޭގެ އަދަދެއް. ޑޮލަރުން ބަލާ ކަމުގައި ވަނީ ނަމަ މިއާ ގުޅިގެން ރިސޯޓުގެ އޮޕަރޭޝަނަށް ގޮންޖެހުންތަކާ ކުރިމަތިވާނެ،” އެ މެމޯގައި ވެ އެވެ.
ޑޮލަރު މާރުކުރަން ޖެހުމުގެ އިތުރުން، އެއާޕޯޓު ޓެކްސްތަކާއި ގްރީން ޓެކްސް ބޮޑުކުރުމުން އިތުރު ދަތިތަކާ ކުރިމަތިވާނެ ކަމަށް ޕަލްސް ކުންފުނިން މުވައްޒަފުންނާ ހިއްސާކޮށްފައި ވެ އެވެ.
އެ ގޮތުން ރާއްޖެއަށް ހަފުތާއަކަށް ޗުއްޓީ ހޭދަކުރަން އަންނަ ހަތަރު މީހުންގެ އާއިލާއެއްގެ މިސާލު ދެމުން މެމޯގައި ބުނީ، އިކޮނޮމީ ކްލާހުގައި ދަތުރުކުރާ ނަމަ 360 ޑޮލަރު އަދި ބިޒްނަން ކްލާހުން ނަމަ 700 ޑޮލަރު ދައްކަން ޖެހޭނެ ކަމަށެވެ.
މި ބަދަލާ ގުޅިގެން އެ ކުންފުންޏާ އެކީ މަސައްކަތް ކުރާ ބޭރުގެ ޓުއާ އޮޕަރޭޓަރުން ވެސް ނުރުހުންވެ، މިއަށް ވުރެ އަގު ހެޔޮ މަންޒިލުތައް އިހުތިޔާރުކޮށް ރާއްޖެއަށް ޑިމާންޑަށް އަސަރުކުރާނެ ކަމަށް ބުނެފައިވާ ކަމަށް ޕަލްސް ކުންފުނިން ފާހަގަކުރި އެވެ.
އެހެން ކަމުން، ޑިމާންޑު ހިފެހެއްޓުމުގެ ގޮތުން އަގު އިތުރު ވުމުގެ ބުރަ ނަގައި، ރޫމް ރޭޓުތަކަށް ބަދަލެއް ނާންނަ ގޮތަށް ބަދަލުތައް ގެންނަން މަޖުބޫރުވެފައިވާ ކަމަށް ވެސް ޕަލްސް ކުންފުނިން މުވައްޒަފުން ގާތު ބުނެފައި ވެ އެވެ.
ރާއްޖެއަކީ މިހާރު ދުނިޔޭގައި އެންމެ މަގުބޫލު މަންޒިލެއް ނޫނެވެ.
މި މެމޯ ކިޔާލުމުން، ލޮލުން ކަރުނަ ހިލެއެވެ. ފެންނަމުންދަނީ ބައެއްގެ ވިޔަފާރި ރައީސް މުއިއްޒުގެ ފުށި ދިއްގަރުފަޅު އެޅުމަށް ފުނޑު ފުނޑު ކޮށްލާތަނެވެ. އޭނާގެ ނާގާބިލު ސަރުކާރު ހިފެހެއްޓުމަށް ބަޔަކު ކޮށާ ކުދި ކުދި ކުރާ މަންޒަރެވެ. ފޭރޭ މަންޒަރެވެ. ޑޮލަރުން ލިބުނު ފައިދާއިން އެތައް މުއައްޒަފުންގެ އާއިލާ ބިކަ ކޮށްލި މަންޒަރެވެ. މާދަމާ އާއިލާ ގޮަވައިގެން މަންމަ މާމަ ބަލިވެގެން ބޭސް ފަރުވާއަށް ދާނެ ޑޮލަރެއް ޖީބަކު ނުހުންނާނެއެވެ. ބޭންކަކުން އަމުދުން ނުލިބޭނެއެވެ. މާލެތެރެއިން ހުސްވެ، ރޭޓް 30ރ އަށް ވެއްޓޭނެއެވެ. މި ހިތްދަތިކަން ތަހައްމަލު ކުރަން މި ޖެހުނީ، ވެރިކަން ކުރުމުގެ ޤާބިލު ކަމެއް ނެތް، ބޭރު ދުނިޔެއާއި ގުޅުން ކުޑަ ތަންދޮރު ނުދަންނަ މީހަކު ވެރިކަމަށް އައިސް ހޭވި ހަޑިންނެވެ.