ރާއްޖެ އާއި އެސްޓޯނިއާ މެދުގައި މައުލޫމާތު ބަދަލުކުރުމާއި، މޫސުމީ ބަދަލުތަކާއި، ތިމާވެއްޓާއި، ހަކަތައާއި ބެހޭ ދާއިރާތަކުން އެއްބާރުލުން ދިނުމަށް އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ ރައީސް ޑރ. މުހައްމަދު މުއިއްޒު މިހާރު އެސްޓޯނިއާއަށް ކުރައްވާ ރަސްމީ ދަތުރުފުޅުގެ ތެރެއިން އެ ގައުމުގެ މިނިސްޓާ އޮފް ކްލައިމެޓް ޔޯކޯ އަލެންޑާ އާއި އެކު ބޭއްވި ބައްދަލުވުމުގެ ތެރެއިންނެވެ.
މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފޮރިން މިނިސްޓަރު ޑރ އަބްދުﷲ ހަލީލެވެ. އެސްޓޯނިއާގެ ފަރާތުން ސޮއިކުރެއްވީ އެސްޓޯނިއާގެ ކްލައިމެޓް މިނިސްޓަރު ޔޯކޯ އަލެންޑާއެވެ.
ރައީސް ޑރ. މުއިއްޒާއި އެސްޓޯނިއާގެ ކްލައިމެޓް މިނިސްޓަރު ޔޯކޯ އަލެންޑް ބޭއްވި ބައްދަލުކުރެއްވުމުގައި ދެބޭފުޅުން ދެއްކެވި ވާހަކަފުޅުގައި، އިޔާދަކުރަނިވި ހަކަތައާއި ޑިޖިޓަލް އީޖާދުތަކާއި ތިމާވެށީގެ ވިލުންތެރިކަމުގެ ދާއިރާއިން ގުޅުން ބަދަހިކުރުމުގެ މުހިންމުކަން ފާހަގަކުރައްވާފައިވާކަމަށް ރައީސް އޮފީހުން ބުނެއެވެ. އެގޮތުން ކުރިމަގުގައި ވެސް ދެގައުމުގެ މެދުގައި މި އެއްބާރުލުން ދެމުން ގެންދާނެކަމުގެ އުއްމީދު ދެބޭފުޅުން އައުކުރެއްވިކަމަށް ރައީސް އޮފީހުން ބުނެއެވެ.
މި ބައްދަލުކުރެއްވުމުގައި ދެޤައުމުގެ ފަރާތުންވެސް ވަނީ ގުޅިގެން މަސައްކަތްކުރުމަށްވެވިފައިވާ އެއްބަސްވުންތަކާއިމެދު އުންމީދު އާކޮށް، ދެޤައުމުން އިސްކަންދޭ ކަންކަން އިތުރަށް ފުޅާކުރުމުގެ ޝައުޤުވެރިކަން ފާޅުކުރިކަމަށްވެސް ރައީސް އޮފީހުން ވަނީ ބުނެފައެވެ.