ޔަމަނުގެ ހަތިޔާރުއެޅި ޖަމާއަތް، ޙޫޘީންނަކީ ޓެރަރިސްޓު ޖަމާއަތެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ކަނޑައަޅުއްވައިފިއެވެ. ޓްރަމްޕް ވަނީ ޙޫޘީން ޓެރަރިސްޓް ޖަމާއަތެއްކަމުގައި ކަނޑައެޅުމަށް ގަރާރެއްގައި އިއްޔެ ސޮއިކުރައްވާފައެވެ. އެ ގަރާރުގައި ސެކްރެޓަރީ އޮފް ސްޓޭޓް މާކޯ ރޫބިއޯއަށް އަންގާފައިވަނީ ޑިރެކްޓަރު އޮފް ނޭޝަނަލް އިންޓެލިޖެންސާއި ޓްރެޝަރީގެ ސެކްރެޓަރީއާ މަޝްވަރާކުރުމަށް ފަހު 30 ދުވަހުގެ ތެރޭގައި އެ ކަމާ ގުޅޭ ރިޕޯޓެއް ހުށަހެޅުމަށެވެ. އެއަށް ފަހު ރޫބިއޯއަށް ލިބޭނީ އަންސާރު اللهގެ ނަމުން ވެސް މަޝްހޫރު އެ ޖަމާއަތަށް ކަނޑައެޅުމާ ގުޅޭ ގޮތުން "އެކަށީގެންވާ ހުރިހާ ފިޔަވަޅެއް އެޅުމަށް" 15 ދުވަސް ކަމަށް ވެސް އެ ގަރާރުގައިވެއެވެ. ޓްރަމްޕްގެ އަމުރު ނެރުނީ ޣައްޒާގައި އިސްރާއީލުން ހަނގުރާމަ ފެށި ފަހުން ޙޫޘީން އަތުލައިގެން ގެލެކްސީ ލީޑާ ކާގޯ އުޅަނދުގެ ފަޅުވެރިން ދޫކޮށްލިކަން ޙޫޘީން އިއުލާންކުރިތާ ގަޑިއިރުތަކެއް ފަހުންނެވެ. ޓްރަމްޕް އެންމެ ފުރަތަމަ ވެރިކަމުގައި ހުންނެވިއިރު، ދައުރު ނިމުމަކާ ގާތްވެފައިވަނިކޮށް ވެސް 2021 ވަނަ އަހަރު ވަނީ ހޫތީންނަކީ ޓެރަރިސްޓުން ކަމަށް ކަނޑައަޅާފައެވެ. ނަމަވެސް، ޖޯ ބައިޑެން ވެރިކަމާ ހަވާލުވެވަޑައިގަތުމަށް ފަހު އެ ނިންމެވުން ވަނީ އުވާލައްވާފައެވެ. ބައިޑަން އެގޮތަށް ނިންމެވީ ޔަމަންގެ ވެރިރަށް ސަންއާ ފަދަ ބޮޑެތި ސަރަހައްދުތަކުގައި ވެސް ސަރުކާރު ހިންގަމުން އައީ ހޫތީންނަށް ވާތީ އެ ސަރަހައްދުތަކަށް އެހީގެ ސާމާނު ފޯރުކޮށްދިނުން ފަދަ ކަންކަން ހުއްޓާލައި އެހީދޭ ޖަމާއަތްތަކުން ޔަމަނުން ފައިބަން ޖެހިދާނެކަމުގެ ކަންބޮޑުވުން އޮތުމުންނެވެ. ނަމަވެސް، މިދިޔަ އަހަރުގެ އޮކްޓޫބަރު ހަތްވަނަ ދުވަހުން ފެށިގެން އިސްރާއީލުން ފަލަސްތީނުގެ ޣައްޒާއަށް ހަމަލާދޭން ފެށުމާ އެކު ހޫތީން ރަތް ކަނޑާއި ގަލް އޮފް އަދާންއަށް ނުކުމެ އާގުބޯޓުތަކަށް ހަމަލާދޭން ފެށުމުން އެ ޖަމާއަތަކީ "ސްޕެޝަލީ ޑެސިގްނޭޓެޑް ޓެރަރިސްޓް" (އެސްޑީޖީޓީ) ޖަމާއަތެއް ކަމަށް ބައިޑެންގެ ސަރުކާރުން އަލުން ކަނޑައެޅިއެވެ. ސްޕެޝަލީ ޑެސިގްނޭޓެޑް ޓެރަރިސްޓް ޖަމާއަތެއްގެ ދަރަޖައަކީ "ފޮރިން ޓެރަރިސްޓް އޯގަނައިޒޭޝަން" ގެ ދަރަޖައަށްވުރެ ދަށް ދަރަޖައެކެވެ. ސްޕެޝަލީ ޑެސިގްނޭޓެޑް ޓެރަރިސްޓުންނަށް އިންސާނީ އެހީ ދިނުން ފަދަ ކަންކަން ކުރުމުގެ ފުރުސަތު އޮވެއެވެ. ނަމަވެސް، ފޮރިން ޓެރަރިސްޓް އޮގަނައިޒޭޝަނެއްގެ ގޮތުގައި ކަނޑައަޅައިފި ނަމަ، އެ ބަޔަކަށް އެއްވެސް ބާވަތެއްގެ އެހީތެރިކަމެއްދޭ ބަޔަކަށް ވެސް ދަތިކުރުމުގެ ފިޔަވަޅު އެޅުމުގެ ބާރު އޮންނާނެއެވެ. ވައިޓް ހައުސްއިން ނެރުނު ބަޔާނުގައި ބުނެފައިވަނީ ބައިޑަންގެ "ބަލިކަށި ސިޔާސަތުގެ" ސަބަބުން އެމެރިކާގެ ކަނޑުގެ ސިފައިންގެ ހަނގުރާމަ މަނަވަރުތަކަށް ޙޫޘީން އެތައް ފަހަރަކު ހަމަލާދީ ގެއްލުން ދީފައިވާ ކަމަށެވެ.