ކީރިތި ޤުރުއާނަކީ މާތް ﷲގެ ކަލާމްފުޅެވެ. ސަމާވީ ފޮތެއްގެ ގޮތުގައި ބިމަށް ފޮނުވުނު އެންމެ ފަހުގެ ދުސްތޫރެވެ. ވަލުޖަނަވާރާއި، ގަސްގަހާގެއްސާއި، މަސްމަހާމެއްސާއި، ހިލަގަލާފަރުބަދައާއި، އިރުހަނދާތަރިތަކާއި، މި ނޫން ވެސް އެންމެހައި މަހުލޫގާތްތަކާ މެދު އިންސާނާ ބަހައްޓަންޖެހޭ ގުޅުން ކަނޑައަޅާ ބަޔަންކޮށްފައިވާ ޤުދުރަތީ ޤާނޫނެވެ. އިންސާނިއްޔަތަށް ބޭނުންވާ އަމާންކަމާއި އޮމާންކަމާއި ސުލްހަމަސަލަސްކަމަށް އެ ފޮތް މަގުދައްކައެވެ. މުއުމިނުންނަށް ޓަކައި އޭގައި ޝިފާއެއް ވެއެވެ. އީމާނުގެ އަހުލުވެރިންނަށް އުފާވެރި ކަމުގެ ހަބަރު ދެއްވައެވެ. ކާފިރުވި މީހުންނަށް ވައީދުގެ އިންޒާރު ކުރައްވައެވެ. އެހެންކަމުން ކީރިތި ގުރްއާނަށް ލޯބިކުރުމީ އީމާންކަމުގެ އަލާމާތެކެވެ. އަދި އެފޮތަށް ރުޅިއެރުމީ ކާފިރުކަމެވެ. ކީރިތި ގުރްއާނަކީ އިތުރު އެއްވެސް މަޚުލޫޤެއްގެ ހިއްސާއެއް ނެތް، އިލާހީ ރިސާލަތެވެ. އެންމެހައި މަޙުލޫޤުންގެ ހުރިހާ ކަމެއް އެންމެ މޮޅަށް ދެނެވޮޑިގެންވާ އަލްޙަކީމުގެ ފަރާތުން އެ މަޚުލޫޤުންނަށް ފޮނުއްވެވި މަގުޗާޓެވެ. އެއް މަޚުލޫޤެއްގެ ޙައްޤު ކަނޑައެޅުމުގައި އެހެން އެއްވެސް މަޚުލޫޤަކަށް އުނިކަމެއް ނާންނާނެ ގޮތަށް ރާއްވަވައިފައިވާ ޤަވާޢިދުތަކެކެވެ. މަތިވެރި އިލާހެއްގެ ކިބައިން ނޫނީ މިހާ ފުރިހަމަ ގޮތެއްގައި އެއްވެސް އުޞޫލުތަކެއް ކަނޑައެއް ނޭޅޭނެއެވެ. އެހެންނޫނީ ފެންނަން ހުންނާނީ ފުށުއެރުންތަކެވެ. އެއް ކަމެއް އަނެއް ކަމަކާ ނުބައްދަލު އެތައް ކަމެކެވެ. މި ވާހަކަ ބަޔާން ކުރައްވައި ކީރިތި ޤުރުއާނުގައި ﷲ ވަޙީކުރައްވައިފައި ވެއެވެ. ﴿أَفَلَا يَتَدَبَّرُونَ الْقُرْآنَ وَلَوْ كَانَ مِنْ عِندِ غَيْرِ اللَّهِ لَوَجَدُوا فِيهِ اخْتِلَافًا كَثِيرًا‏﴾ ‎( النساء: ٨٢)‏ މާނައީ: "ފަހެ، ޤުރުއާނާމެދު އެއުރެން ވިސްނައި ފިކުރު ނުކުރަނީހެއްޔެވެ؟ އެ ޤުރުއާނަކީ، اللَّه ނޫން އެހެން ފަރާތަކުން އައި އެއްޗެއް ކަމުގައި ވީ ނަމަ، ގިނަވެގެންވާ ތަފާތުތައް އެއިން އެއުރެންނަށް ފެނުނީހެވެ." ކީރިތި ގުރުއާނުގައި އަންގަވައިފައި އެ ވާފަދައިން އެއްވެސް ޚިލާފެއް އެ ފޮތުގެ އެއްވެސް ހިސާބަކުން ފެންނާން ނެތީ އެކަންޏެއް ނޫނެވެ. އަދި ކިޔެއް އެ ފޮތުގައި ބަޔާން ކުރާ އެއްވެސް ކަމަކާ ދުނިޔެ ހިނގުމުގެ ނިޒާމާ ވެސް ފުށުއެރުމެއް ނުވަނީއެވެ. އިންސާނީ ތަބީއަތުގެ އަސްލާ ވެސް ޚިލާފުކަމެއް ނުފެންނަނީއެވެ. ޒަމާނީ ޢިލްމީ ހޯދުންތަކުން ނުކުންނަ އެކިއެކި ނަތީޖާތަކާއި ކަންކަމުގެ ޙަޤީޤަތްތަކުގެ ވާހަކަ ހަމަ އެ ގޮތަށް ރަނުންރަނަށް ބަޔާންވެގެން ވާތީ އެބަ ފެނެއެވެ. މި ކަންކަމުން ތާޒާވެ އާރޯވަނީ އީމާންތެރި ހިތްތަކުގެ ތަޤުވާއެވެ. ނިފާޤުގެ ހިތްތަކަށް ބަލިމަޑުކަން އިތުރުވެ ޝައްކުގެ މަގަށް ވެއްޓިދެއެވެ. ކީރިތި ގުރްއާން ކިޔެވާ ހިނދު ކަނުލައި އަޑު އެހުމަކީ، އޭގެ ސަބަބުން އެ މީހަކަށް މާތް ﷲ ރަޙުމަތްލައްވާނޭ ކަމެކެވެ. އަރަބި ބަސް ނޭނގުމުގެ ސަބަބުން ކިޔެވޭ އާޔަތްތަކުގެ މާނަ ނޭނގުނު ކަމުގައި ވިޔަސް މެއެވެ. މި ކަން ބަޔާންކުރައްވައި އެނގެވި ބަސްފުޅުގައި ވަނީ އަންނަނިވި ފަދައިންނެވެ. ﴿وَإِذَا قُرِئَ الْقُرْآنُ فَاسْتَمِعُوا لَهُ وَأَنصِتُوا لَعَلَّكُمْ تُرْحَمُونَ﴾ ‎﴿الأعراف: ٢٠٤﴾‏ "އަދި ޤުރުއާން ކިޔަވާހިނދު ތިޔަބައިމީހުން ހަނުތިބެ، އެއަށް ކަނުލައި އަހާށެވެ! (އެއީ) ތިޔަބައިމީހުންނަށް ރަޙުމަތްލެއްވުމަށް ޓަކައެވެ." ކީރިތި ގުރްއާނަކީ މާޒީވެދިޔަ ޒަމާންތަކުގެ ވާހަކަ އެންމެ ޞައްޙަ ގޮތުގައި ކިޔައިދޭ ފޮތެވެ. އެންމެ އިބުރަތްތެރި ރިވެތި ވާހަކަ ބާޔާންވެފައި އޮތީ އެ ފޮތުގައެވެ. މާތް ﷲ ވަޙީކުރެއްވި ބަސްފުޅެއްގެ މާނައިގައި ވެއެވެ. "އެންމެ ރިވެތި ވާހަކަތައް، ތިމަންރަސްކަލާނގެ ކަލޭގެފާނަށް ކިޔައިދެއްވަމެވެ." ވިސްނާ މީހުންނަށް މަންފާދެނިވި މުހިންމު ފިލާވަޅުތަކެއް އޭގައި ކިޔައިދެއެވެ. އޭގެ ސަބަބުން އީމާން ކަމުގެ ހިތްތަކަށް ތާޒާކަން ގެނުވައެވެ. (ޔޫސްފު: 3) ކީރިތި ޤުރުއާނުގެ އެންމެ ހިތްގައިމު ކަމަކީ އެ ފޮތުން ކިޔަވާ ކޮންމެ އަކުރަކަށް އަޖުރު ލިބޭ ގޮތައް އޮންނަ އޮތުމެވެ. ކީރިތި ޤުރުއާން ކިޔެވުމުގެ ނިޔަތުގައި ކިޔަވައިފި ކޮންމެ އަކުރަކަށް 10 ސަވާބު އެ މީހެއްގެ އަމަލުނާމާގައި ލިޔުއްވާނެކަމަށް ޞައްޙަ ޙަދީޘުގައި ވެއެވެ. އެ ކަން ބަޔާންކުރެއްވި ޙަދީޘްފުޅުގެ މާނައިގައި ވަނީ އަންނަނިވި ފަދައިންނެވެ. ”ﷲގެ ފޮތުން އެންމެ އަކުރެއް ކިޔަވައިފި މީހަކަށް ހެޔޮ ކަމެއް ވެއެވެ. ކޮންމެ ހެޔޮ ކަމެއް އޭގެ ދިހަ ހެޔޮކަން ފަދައެވެ. "الـم" އެއީ އެންމެ އަކުރެއް ކަމުގައި ތިމަންކަލޭގެފާނު ވިދާޅެއް ނުވަމުއެވެ. އެހެނެއް ކަމަކު ”ا“ އަކީ އަކުރެކެވެ. ”ل“ އަކީ އަކުރެކެވެ. އަދި ”م“ އަކީ ވެސް އަކުރެކެވެ.“ (ރަވާހު ތިރިމިޒީ) ޤުރުއާން ކިޔެވުމުގެ ދަރުމައާއި ސަވާބުގެ ގިނަކަން ނިކަން ދެކޭށެވެ! މުއުމިނު އަޅާއަށް ދަރުމައާއި އަޖުރު ފަސޭހައިން ލިބޭނެ މަގެއް ﷲ އެ ވަނީ ލައްވައިފައެވެ. ގުރްއާނާ ކައިރިވެ އުޅުނު ވަރަކަށް އެ މީހެއްގެ އީމާންތެރިކަން ތާޒާ ވެއެވެ. އަދި ޤުރްއާނާއި ދުރުވެ އޭގެ ޙުކުމްތަކަށް އެއްވެސް ފަރުވާލެއް ނުބަހައްޓައި ތިބާގެ ހަވާނަފުސަކީ އިލާހު ކަމުގައި ހިފައިފި މީހާގެ ޝަކުވާ ﷲގެ ހަޒްރަތުގައި ގިޔާމަތް ދުވަހުން ރަސޫލުﷲގެފާނު ކުރައްވާނެތެވެ. އެކަން ވަނީ ކީރިތި ޤުރުއާނުގައި މާތް ﷲ އަންގަވައިފައެވެ. ﴿وَقَالَ الرَّسُولُ يَا رَبِّ إِنَّ قَوْمِي اتَّخَذُوا هَـٰذَا الْقُرْآنَ مَهْجُورًا﴾ ‎(الفرقان: ٣٠) މާނައީ: "ރަސޫލާ ވިދާޅުވިއެވެ. (އެބަހީ ޤިޔާމާތްދުވަހުން ވިދާޅުވާނެތެވެ.) އޭ އަޅުގެ ވެރިރަސްކަލާކޮ! ހަމަކަށަވަރުން، ތިމަންއަޅާގެ ޤައުމުގެ މީހުން، މި ޤުރުއާނަކީ އެއްކިބާކޮށްލާފައި ވާ އެއްޗެއް ކަމުގައި ހަދައިފޫއެވެ." އަޅަމެންނަކީ އެފަދަ ޝަކުވާއެއް ރައްދުވާ ބަޔަކު ކަމުގައި ނުލައްވާނދޭވެ! ވީމާ ޤުރުއާނަކީ އަހަންމިއްޔަތުކަން ދެވިފައި އޮއް ފޮތެކެވެ. އެއަށް އިޙްތިމާމުކުރާށެވެ. އެ ފޮތާ ގާތްވެ އުޅޭށެވެ. ޤުރުއާނާ ތިމާ ބަހައްޓާނެ ގާތްކަމާއި އުޅޭނެ ދުރުމިން އިހްތިޔާރުކުރާނީ ކޮންމެ މީހަކު ވެސް އެމީހަކު އަމިއްލައަށެވެ!