ފުރަތަމަ ކަމަކަށް ބުނެލަން އޮތީ އެއްވެސް ކަމެއްގައި ދުޢާކުރުން ހުއްޓައިނުލާށެވެ! އެއީ ކޮންމެ ކަމެއްގައި ނަމަވެސްމެއެވެ. ބައްޔަކުން އަރައިނުގަނެވޭނެ ކަމަށް ބެލެވުނު ކަމުގައިވީނަމަވެސްމެއެވެ.  
ވަރަށް ގިނައިން ކުރެވޭ ސުވާލެކެވެ. "ދެން ގަދަނުވާނެ ކަމަށް ޔަޤީންކުރެވޭ މީހަކަށް ޝިފާދެއްވެވުން އެދިގެން ދުޢާކުރުމުގެ ބޭނުމަކީ ކޮބައިހެއްޔެވެ؟" އެހެންވެ މިރޭވެސް މިމިވާހަކަ ދައްކައިލާނަމެވެ.  
އެމީހާގެ ޞިއްޙީ ޙާލަތަށް ބަލައި ދެން ގަދަ ނުވާނެކަމަށާއި މަދު ދުވަސްކޮޅެއްގެ ތެރޭގައި މަރުވާނެ ކަމަށް ޑޮކްޓަރުން ބުނާ މީހުން އެހެން ބުނާފަހުން ކިތައް އަހަރުވަންދެން ދުނިޔޭގައި އެބަ އުޅޭ ހެއްޔެވެ؟ އެހެން އެވަނީ ކީއްވެގެން ހެއްޔެވެ؟ އެއީ އެންމެހައި ބާރުތަކެއް ﷲ ތަޢާލާއަށް ލިބިވޮޑިގެންވާތީއެވެ. ކޮންމެ މީހަކުވެސް މަރުވާނީ އެމީހަކު މަރުވުމަށް ލިޔުއްވަވާފައިވާ ވަޤުތުގައިކަމަށްވާތީއެވެ.  
ދެން އޮތީ އެފަދަ ޙާލުގައިވާ މީހުންނަށް ޝިފާ ދެއްވެވުން އެދި ދުޢާކުރުމުގެ މައްސަލައެވެ. އެފަދަ ޙާލުގައި ވަނިކޮށްވެސް ޝިފާ ދެއްވެވުން އެދި އެމީހަކު ދުޢާކުރާނަމަ، އަދި އެމީހާއަށްޓަކައި އެހެން މީހުން ދުޢާކުރާނަމަ އެކަމުން އެކަމުން އަންގައިދެނީ އެމީހަކު ﷲ ތަޢާލާގެ ޙަޟްރަތުން އުންމީދުކަނޑައިނުލާކަމެވެ.  
ﷲ ތަޢާލާގެ ޙަޟްރަތުން އުންމީދު ކަނޑައިނުލުމަކީވެސް ޘަވާބު ދެއްވަވާ އަޅުކަމެކެވެ. ދެންވާ ގޮތަކީ އެމީހަކު ބަލީގައި މަރުވިނަމަވެސް އެމީހަކަށް ސުވަރުގެ މިންވަރުކުރައްވަވާ ސަބަބަކީ ﷲ ތަޢާލާގެ ޙަޟްރަތުން އުންމީދުކުކަނޑާނުލައި ދުޢާކުރުން ކަމުގައިވެސް މިންވަރުކުރައްވަވައިފާނެތެވެ. އިން ޝާ ﷲ 
ޑޮކްޓަރުން އުންމީދުކަނޑާލާފައިވީނަމަވެސް ދެން ގަދަނުވާނެ ކަމަށް ޤަބޫލުކުރުމެއް ނެތެވެ. އަދި ޝިފާއަށް އެދި ދުޢާނުކޮށް ހުރެގެންވެސް ނުވާނެއެވެ. ދުޢާކުރުމުން ލިބެން އޮތް ފައިދާ މާބޮޑެވެ! އިން ޝާ ﷲ
 
- މުފްތީ މެންކުގެ ދަރުސަކުން