އަޅުގަނޑުމެންގެ ތެރޭގައި ތެދުވެރިން ދަނީ ނެތެމުންނެވެ. އިޚްލާޞްތެރިކަން ދަނީ ގެއްލިހުސްވަމުންނެވެ. ކުރިމަތީގައި ވިދައިބަބުޅަނީ މަކަރުވެރިކަމެވެ. އެންމެ ރީތިވެފައި ވިދުވަރު ގަދަވަނީ މަކަރުވެރިކަން ބޮޑުވީވަރަކުން ކަމަށްވެސް މިވަނީވެފައެވެ. 
އެގޮތަސް އެކަން ވެގެން އެދިއައީ ތެދުވެރި އިޚްލާޞްތެރިން މަދުވެފައި މަކަރުވެރިން ގިނަވާވަރުންނެވެ. ނަމަވެސް އަޅުގަނޑު މިކިޔައިދެނީ ތެދުވެރިވެ އިޚްލާޞްތެރިވުމުން އަންހެންކުއްޖަކަށް ލިބިގެންދިއަ ބޮޑު ތަނަވަސްކަމާއި އުފާވެރިކަމުގެ ވާހަކައެކެވެ. 
އޭނާއަކީ ޢުމުރުން 24 އަހަރުގެ އެކަނިވެރިމައެކެވެ. ނިޞްބަތްވަނީ ވަރަށް ފަޤީރު ޢާއިލާއަކަށެވެ. ވަރިކުރީންސުރެ ދަރިފުޅުގެ ބައްޕަ އެންމެ ރުފިޔާއެއްވެސް ނުދޭތަނުގައި ދަރިފުޅު ދެކެލަންވެސް ނުދެއެވެ. ހުރީ މިޒަމާނަށް ބަލާއިރު ކިޔެވިފައެއް ނޫނެވެ. ވީމާ ރަނގަޅު ވަޒީފާއެއް ލިބޭނެ ގޮތެއްވެސް ނެތެވެ. 
އެކިމީހުންގެ ގާތުގައި މަސައްކަތެއް ލިބެތޯ އާދޭސްކުރަމުންދަނިކޮށް މަސައްކަތެއް ލިބުނީ ގެއަކުންނެވެ. އެގޭގައި ގޭގެ މަސައްކަތްކުރުމުގެ އިތުރުން މުސްކުޅި، ބަލި ފިރިހެނަކު ބަލަހައްޓަންވެސް ޖެހުނެވެ. އެމަސައްކަތްވެސް އޭނާ ކުރަމުން އައީ އަންހެނަކަށްވެ ހުރެ ކުރެވޭނެ އެންމެ ރަނގަޅަކަށެވެ. އެހެންވެ ރަނގަޅު މުސާރައެއްވެސް ދިނެވެ. 
ދުވަސްކޮޅެއްފަހުން މައްސަލަޖެހެން ފެށިއެވެ. އެއީ މުސްކުޅި މީހާގެ އަނބިމީހާއަކީ އެއުމުރުގައިވެސް އޭނާގެ ފިރިމީހާދެކެ ލޯބިވާ މީހަކަށްނުވާއިރު އެހެން މީހަކު ފިރިމީހާއަށް އަޅައިލާތީއެވެ. ނަމަވެސް ފައުޅުގައި އެއްޗެއް ބުނާކަށް ނުކެރެއެވެ. ކަމެއްކުރާކަށްވެސް ނުކެރެއެވެ. 
ފުރަތަމަ ވިސްނައިދޭން މަސައްކަތްކުރީ އޭނާގެ ފިރިމީހާއަކީ ވަރަށް ޚުލްޤް ނުބައި މީހެއްކަމަށާއި މާބޮޑަށް ކައިރިވެ އުޅެން ނުވާނެކަމަށެވެ. އޭނާ އެކަމަކަށް ސަމާލުކަމެއް ނުދެއެވެ. ސަމާލުވާނެކަމަށް ބުނެއެވެ. ނަމަވެސް ޢަމަލުން އެފަދަ ކަމެއް ނުދައްކައެވެ. އޭނާ މަސައްކަތްކުރަމުން އައީ ތެދުވެރިކަމާއިއެކު މަސައްކަތްކުރެވޭތޯއެވެ. ކުރާ މަސައްކަތުގައި އިޚްލާޞްތެރިވެވޭތޯއެވެ. 
ލިބިފައި ހުރި އެންމެ ދަރިފުޅުވެސް މަންމަފަދައިން ބައްޕައަކަށް އަޅައެއް ނުލައެވެ. އެހެންވެ އޭނާ ގޮވައިގެން ހޮސްޕިޓަލަށް ދާންޖެހެނީވެސް އޭނާއަށެވެ. އެއީވެސް ބުރަކަމެއްކަމަށް ނުދެކި އެކަން އައީ ކުރަމުންނެވެ. 
އޭނާއަށް ޚިދުމަތްކުރާތާ 10 އަހަރުފަހުން އެމިހާ ވަރަށް ބޮޑަށް ބަލިވިއެވެ. ދެން ގަދަނުވެދާނެކަމަށް އޭނާއަށް ވިސްނުމުން ނަމަވެސް އޭނާގެ އެއްބަނޑުއެއްބަފާ ކޮއްކޮއާއި އަނބިމީހާ އާއި ދަރިފުޅުވެސް ބައިތިއްބާފައި ކޮއްކޮ ގާތުގައި ބުނީ އޭނާގެ އަލަމާރީގެ ވަތްގަނޑުގައި އޮތް ސިޓީއުރައެއް ގެނެސްދިނުމަށެވެ. 
ގެނެސްދިނުމުން ބޮޑު އުރައެއްގެ ތެރެއިން ކުޑަ ދެއުރަ ނަގާފައި އެއްއުރަ އޭނާގެ ދަރިފުޅަށް ދިއްކޮށްލިއެވެ. އަނެއްއުރަ އޭނާ ބަލައިދިން އަންހެންކުއްޖާއަށް ދިއްކޮށްލިއެވެ. ބުންޏެވެ. 
"ބައްޕަ ދެން މާގިނަ ދުވަހު ދުނިޔޭގައި އޮންނާނެ ކަމަކަށް ނުދެކެމެވެ. އެހެންވެ ގެއާއި މުދަލުގެ ކަންކަން ތިއޮތީ ހަމަޖައްސައިފައެވެ. ގޯތީގައި މިހިރަ ދެގެއިން އެއްގެ ދަރިފުޅަށާއި މަންމައަށެވެ. އަނެއްގެ އަހަރެން ބަލައިދިން ޝަހީދާއަށެވެ. އެކައުންޓުގައި ހުރި ފައިސާވެސް ދެކުދިންނަށް އެއްވަރަށެވެ. އެހެންވީމާ މިއަދުން މިއަދަށް ބާކީހުރިވަރު ބަލާށެވެ. ޚަރަދުކުރަންވާނީ އެއްކުއްޖަކު އަނެއްކުއްޖަކަށް އަންގައިގެންނެވެ. ބައްޕަ މަރުވާއިރު ހުރި ފައިސާއެއް ދެދަރިން (ދަރިފުޅާއި އެނާ ބަލައިދިން އަންހެން މީހާ) އެއްވަރަށް ބަހައިލާށެވެ. 
އަނބިމީހާއަކަށް މުދަލުން ބައެއް ނުއަޅަމެވެ. އެއީ މިގޯތީގައި ހުރި ދެގެ ވަރުގެ ގެއެއް އޭނާގެ މައިންބަފައިންގެ ގޯތީގައި އަޅައިދީފައި ހުންނާނެތީއެވެ. އެގެއިން ކުއްޔަށް ލިބުނު ލޯލާރިއެއްގައިވެސް މިއަދާއި ހަމައަށް ޖެހިފައެއް ނުވާނެއެވެ. އެކަމަކުވެސް އަހަރެން ބަލިޙާލުގައި ހޭދަމިކުރި 12 އަހަރު އަހަރެންނަށް އަޅައިލަންކުރީ ކޮންކަމެއްކަން ނިކަން ބުނެދީބަލާށެވެ. ބަހެއް ބުނި ނަމަވެސް ބުނެފައިވަނީ އަހަރެން ދުނިޔޭގައި އޮންނާތީ އުނދަގުލަކަށްވެގެން އުޅޭހެން ހީވާ ގޮތަކަށެވެ. އެކަމަކުވެސް އެއްވެސް ޝަކުވާއެއް ނެތެވެ. އެންމެންނަށް ހަމަ ހިތްޙަލާލެވެ. 
އެންމެ އުފާވަނީ އެއްވެސް މީހަކަށް އަހަރެންނަށް ޚަރަދެއްކުރަން ނުޖެހި މަރުވެދާނެކަމަށް އުންމީދުކުރެވޭތީއެވެ. ދެން އެކަން އިރާދައިގައިވާން އޮތް ގޮތަކަށް ވެދާނެތާއެވެ." 
އެހިސާބަށް ބުނެވުނުތަނާ ދޮޅިފުރާ ނޭވާއެއްލާފައި ދުނިޔެއަށް އަލްވިދާޢުކިޔައިފިއެވެ. ނިޔާވުމުން ދަރިފުޅާއި އަނބިމީހާގެ މޫނުމަތިން ފެނުނީ އުފާވެރިކަމެވެ. ދެރަވެ ކަރުނައެޅީވެސް ޝަހީދާއެވެ. އެއީ އެހައި ގިނަ ދުވަސްވަންދެން ބައްޕައެއްފަދައިން ބެލި މުސްކުޅިއަކު ވަކިވެދިއަކަމުގެ ހިތާމައިގައެވެ. 
މިއަދުނޫހުގެ ކިޔުންތެރިންގެ ގާތުގައި ބުނެލަން ބޭނުންވަނީ ކުރާ ކޮންމެ މަސައްކަތެއްގައިވެސް ތެދުވެރިވާށެވެ. އިޚްލާސްތެރިވެ އިޙްސާންތެރިވާށެވެ! ދެދުނިޔޭގައި ނުވަތަ އާޚިރަތުގައި އެމީހަކަށް އުފާވެރިކަން ދެއްވަވާނެތެވެ. އިން ޝާ ﷲ 
އަޅުގަނޑުގެ އެކުވެރި ޝަހީދާ އޭނާގެ އެންމެ މުހިންމު ޢުމުރުގެ 10 އަހަރު ޤުރްބާންކުރީ މުސްކުޅި ފިރިހެނަކަށް އިޚްލާޞްތެރިކަމާއިއެކު ޚިދުމަތްކުރާށެވެ. މިއަދު އޭނާއަކީ ގެދޮރާއި ގޯތި ލިބި އަދި ފައިސާވެސް ލިބި އުފަލުގައި ޒަވާޖީ ޙަޔާތްވޭތިކުރަމުން އަންނަ އަންހެނެކެވެ. ހަމަ އެންމެ ކަމަކުންނެވެ. އިޚްލާޞްތެރިކަމުގެ ސަބަބުންނެވެ.
 
- މަޒީނާ / މިއަދުނޫހުގެ ކިޔުންތެރިއެއް