ރައީސް ޑރ. މުހައްމަދު މުއިއްޒުގެ ވެރިކަމުގެ ފަސް އަހަރުގެ ދައުރު ނިމުމުގެ ކުރިން "ރަސްމާލޭ"ގައި މީހުން އާބާދުވާން ފަށާނެކަން ޔަގީން ކުރެވޭ ކަމުގައި އިންފްރާސްޓްރަކްޗާ މިނިސްޓަރު ޑރ.އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ "ދިޔަރެސް" އަށް ދެއްވިއިންޓަވިއުއެއްގައެވެ.
މިނިސްޓަރު ވިދާޅުވީ 2023 ވަނަ އަހަރު ވެރިކަން ބަދަލުވުމަށް ފަހު ރަސްމާލެ މަޝްރޫއު ބަޖެޓުގައި ހިމެނުމަށް ހުށަހެޅި ނަމަވެސް އެމްޑީޕީގެ އަޣުލަބިއްޔަތު އޮތް 19 ވަނަ މަޖިލީހުން ބަޖެޓު ފާސްކޮށްފައިވަނީ އެ މަޝްރުއު ބަޖެޓުން އުނިކުރުމަށް ފަހު ކަމަށެވެ.
ބަޖެޓުގައި އެ މަޝްރޫއު ހިމެނިފައި ނުވުމުން މިނިސްޓްރީގެ ތެރެއިން މަސައްކަތް ކުރިއަށް ގެންދިއުމަށް ދަތި ކަމަކަށް ވެގެންދިޔަ ކަން މިނިސްޓަރު ފާހަގަ ކުރެއްވިއެވެ. އެހެންކަމުން މަޝްރޫއު ކުރިއަށް ގެންދެވޭތޯ މަސައްކަތް ކޮށްފައިވަނީ ތަފާތު އެކި މޮޑަލްތަކުގެ އެކި ކުންފުނިތައް މެދުވެރިކޮށް ކަމަށާއި، އޭގެތެރޭގައި ވަރަށް ގިނަ ގޮންޖެހުންތަކާ ކުރިމަތިވި ކަމަށް މުއްތަލިބް ވިދާޅުވިއެވެ.
އެހެންނަމަވެސް ބައެއް ކޮންޓްރެކްތަރުން މޮބިލައިޒްކުރެވިގެން މަސައްކަތް ކުރިއަށްދާ ކަމާއި ބައެއް ކޮންޓްރެކްޓަރުންނާއެކު އެއްބަސްވުމަކަށް އައުމަށް ކައިރިވެފައިވާތީ ވަރަށް އަވަހަށް މަސައްކަތް ފެށިގެން ބާރަށް ކުރިއަށް ދާނެ ކަމަށް އުންމީދު ކުރައްވާ ކަމަށެވެ.
މިއީ މޮޑިއުލާ އިންޓަގްރޭޓެޑް ކޮންސްޓްރަކްޝަން މެތަޑެއް ބޭނުން ކުރާ ޕްރޮޖެކްޓެއް ކަން ފާހަގަ ކުރައްވައި މިނިސްޓަރު ވިދާޅުވީ އެންމެ ފުރަތަމަ ކަމަކަށް ވާނީ ބިން ކަނޑައަޅައި ފެކްޓްރީ ގާއިމް ކުރުމުގެ މަސައްކަތް ކަމަށެވެ. އަދި ފެކްޓްރީ ގާއިމް ކުރުމަށް ފަހު ވަރަށް ބާރު ސްޕީޑުގައި މަސައްކަތް ކުރިއަށްދާނެ ކަމަށް މިނިސްޓަރު ވިދާޅުވިއެވެ.
"މި ދެންނެވި ޕްރޮޖެކްޓަށް ބޭނުންވާ ވަރަށް ބިން ހިއްކުމާ އެއްކޮށް އެތަނުގައި މި ދެންނެވި ބޯހިޔާވަހިކަން ގެދޮރުވެރިކަން އިމާރާތް ކުރުމާ އެއްކޮށް ބޭނުންވާ އަސާސީ ޚިދުމަތްތައް ގާއިމް ކުރުމުގެ މަސައްކަތް ފެށިގެންދާނެ. ހަމަ އެއާ އެއްކޮށް ބިން ހިއްކެމުންދާއިރު އިތުރު މަސައްކަތްތައް ވެސް ކުރިއަށް ދާނެ. އެހެންވީމަ އަޅުގަނޑުމެންނަށް ވަރަށް ބޮޑަށް އެބަ ޔަގީން ކުރެވޭ މި ދައުރު ނިމުމުގެ ކުރިން އެތަނުގައި މީހުން އާބާދުވެ ދިރިއުޅެން ފަށާނެ ކަމަށް" މިނިސްޓަރު ވިދާޅުވިއެވެ.
ރަސްމާލެ މަޝްރޫއަކީ މި ސަރުކާރުގެ އެންމެ ބިޔަ މަޝްރޫއެވެ. މުޅި ހުޅުމާލެ އަށްވުރެ ތިންގުނަ ބޮޑު ސަރަހައްދެއް ކަމަށްވާ ރަސްމާލޭގައި، ގާތްގަނޑަކަށް 240،000 އަށްވުރެއް ގިނަ މީހުން އާބާދު ކުރެވޭނެ ކަމަށް ލަފާކޮށްފައިވެއެވެ.