ގެދޮރުވެރިކަމާއި ގުޅޭގޮތުން ސަރުކާރުން ކުރިއަށްގެންދަވާ މަސައްކަތްތަކާއި ގުޅޭގޮތުން މައުލޫމާތު ސާފުކުރުމަށް ހާއްސަ ފޯނު ނަމްބަރުތަކެއް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ތައާރަފްކުރައްވައިފިއެވެ.
ގެދޮރުވެރިކަމާބެހޭ މަޢުލޫމާތު ސާފުކުރުމަށް ހާއްސަ ނަމްބަރުތަކެއް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ތައާރަފްކުރައްވާފައި މިވަނީ ގެދޮރުވެރިކަމާބެހޭ މަސައްކަތްތައް އެ ވުޒާރާގެ ދަށަށް ބަދަލު ކުރެއްވުމާއި ގުޅިގެންނެވެ.
ސަރުކާރުން ކުރިއަށްގެންދަވާ، ގެދޮރުވެރިކަމާބެހޭ މަސައްކަތްތައް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ ދަށަށް ބަދަލުކުރެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބުރާސްފަތި ދުވަހު ކެބިނެޓަށް ގެންނެވި ބަދަލުތަކުގެ ތެރެއިންނެވެ. މިބަދަލާއެކު އެ ވުޒާރާގެ އޮނިގަނޑަށް ބަދަލުތަކެއް ގެންނަވާ، ޚިދުމަތްތައް ރައްޔިތުންނަށް ވީހާވެސް ފަސޭހައިން ދެވޭނެ އިންތިޒާމު ހަމަޖެއްސެވުމަށް ދަނީ މަސައްކަތް ކުރައްވަމުންނެވެ. މިގޮތުން މިވަގުތު ހިންގަމުންދާ ގެދޮރުވެރިކަމާބެހޭ އެއްވެސް މަސައްކަތާއި ގުޅޭގޮތުން މަޢުލޫމާތު ސާފުކުރެއްވުމަށް އެދޭނަމަ، އެވުޒާރާގެ ރަސްމީ ނަންބަރުތައް ކަމުގައިވާ، 4004900 އަދި 4004901 ނަމްބަރު މެދުވެރިކޮށް ހޯއްދެވޭނެކަމަށް އެވުޒާރާއިން ވިދާޅުވެއެވެ. އަދި ގެދޮރުވެރިކަމާބެހޭ މަސައްކަތްތައް އިމާރާތްކުރުމާބެހޭ ވުޒާރާގެ ދަށަށް ބަދަލުވީނަމަވެސް، އެމަސައްކަތްތައް އަދި ޚިދުމަތަކަށް ބަދަލު ނާންނާނެކަމަށްވެސް އެ ވުޒާރާއިން ވިދާޅުވެއެވެ.
ކެބިނެޓަށް ގެންނެވި ބަދަލުތަކުގެ ތެރެއިން ރައީސުލްޖުމްހޫރިއްޔާ ވަނީ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓު އުވާލައްވާ، އެވުޒާރާއިން ކުރަމުންދިޔަ މަސައްކަތްތައް އެހެން ވުޒާރާތަކަށް ބަދަލުކުރައްވާފައެވެ. އެގޮތުން ރާއްޖޭގެ ބިން ބޭނުންކުރުމާ ގުޅޭ މަސައްކަތްތަކާއި، ރާއްޖޭގެ އަރބަން ސަރަހައްދުތައް ތަރައްޤީކުރުމާބެހޭ މަސައްކަތްތަކާއި، ޤައުމީ ތަރައްޤީ ރޭވުމާބެހޭ މަސައްކަތްތަކާއި، ތަފާސްހިސާބުގެ މަސައްކަތްތައް، މިނިސްޓްރީ އޮފް ފިނޭންސް އެންޑް ޕްލޭނިންގއިން ކުރައްވަމުން ގެންދަވާގޮތަށް ވަނީ ހަމަޖައްސަވާފައެވެ. އަދި ރާއްޖޭގެ ހިޔާވަހިކަމުގެ ސިޔާސަތު ކަނޑައެޅުމާބެހޭ އެންމެހާ މަސައްކަތްތަކާއި، ސޯޝަލް ހައުސިންއާބެހޭ އެންމެހާ މަސައްކަތްތައް، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ކުރައްވަމުން ގެންދަވާގޮތަށް ވަނީ ހަމަޖައްސަވާފައެވެ. މީގެ އިތުރުން، މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ ދަށުން ހިނގަމުންދިޔަ، "މޯލްޑިވްސް ބިއުރޯ އޮފް ސްޓެޓިސްޓިކްސް" މިނިސްޓްރީ އޮފް ފިނޭންސް އެންޑް ޕްލޭނިންގެ ދަށަށް ވަނީ ބަދަލުކުރައްވާފައެވެ.