ލޮބުވެތި މުސްލިމުންނޭވެ! ހިތްތަކަށް ހިތްހަމަޖެހުން ލިބޭ ސަބަބުތަކުގެ ތެރޭގައި ކީރިތި ޤުރްއާނާ މެދު ވިސްނައި ފިކުރުކޮށް އެ ފޮތް ކިޔެވުން ހިމެނެއެވެ. މިއީ ހިތާމަތައް ފިލުވައި، ކަންބޮޑުވުންތަކާއި ހިތްދަތިކަން ދުރުކުރުމުގައި އެންމެ މަތިވެރި ސަބަބުތަކުގެ ތެރޭގައި ހިމެނޭ ކަމެކެވެ. ކީރިތި ޤުރްއާން ކިޔެވުމުން އަޅާގެ ހިތަށް ހަމަޖެހުން ލިބެއެވެ. މާތް ﷲ ވަޙީކުރައްވައިފައި ވެއެވެ. ---- މާނައީ: " އެއުރެންނީ، إيمان ވި މީހުންނެވެ. އަދި الله ހަނދުމަކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ، الله ހަނދުމަކުރުމުން ނޫންހެއްޔެވެ؟" 
ހިތްހަމަޖެހުން ލިބޭ ސަބަބުތަކުގެ ތެރޭގައި ހެނދުނާއި ހަވީރުގެ ޒިކުރުތަކާއި، ނިދުމުގެ ކުރިން ކުރާ ޒިކުރުތަކާއި، ދުވާލާއި ރޭގަނޑުގެ އެހެނިހެން ވަގުތުތަކުގައި ކުރާ ޒިކުރުތައް ހިމެނެއެވެ. މި ޒިކުރުތަކުން މުސްލިމު އަޅާ، މާތް ﷲ ގެ ވާގިފުޅާއެކު، ޖިންނި ޝައިޠާނުންނާއި އިންސާނުންގެ ތެރެއިންވާ ޝައިޠާނުންގެ ނުބައިކަމުން ރައްކާތެރިވެއެވެ. އަދި އެ ޒިކުރުތަކުގެ މާނައާ މެދު ވިސްނައި، އޭގެ ނަތީޖާއާއި ފައިދާތައް ޔަޤީންކުރާ ނަމަ، އަޅާއަށް މާއްދީ އަދި މަޢުނަވީ ބާރު އިތުރުވެއެވެ. ބޮޑެތި މުޞީބާތްތަކާއި ދަތިއުނދަގޫތަކާ ކުރިމަތިވާ ހިނދު، އަންނަނިވި ދުޢާ ކިޔުމަށް ކީރިތި މާތް ނަބިއްޔާ ޞައްލަﷲ ޢަލައިހިވަސައްލަމަ އިރުޝާދުދެއްވައިފައި ވެއެވެ. (لَا إِلَـٰهَ إِلَّا اللهُ الْعَظِيْمُ الْـحَلِيْمُ، لَا إِلَـٰهَ إِلَّا اللهُ رَبُّ الْعَرْشِ الْعَظِيْمِ، لَا إِلَـٰهَ إِلَّا اللهُ رَبُّ السَّمَـٰوَاتِ وَرَبُّ الْأَرْضِ وَرَبُّ الْعَرْشِ الْكَرِيـْمِ)[1] މާނައީ:"މަތިވެރި އަދި ޙަލީމުވަންތަ މާތް ﷲ ފިޔަވައި ޙައްޤުވެގެން އަޅުކަމެއްވެވޭ އެހެން އިލާހަކު ނުވެއެވެ. މަތިވެރި ޢަރުޝީގެ ވެރި މާތް ﷲ ފިޔަވައި ޙައްޤުވެގެން އަޅުކަމެއްވެވޭ އެހެން އިލާހަކު ނުވެއެވެ. އުޑުތަކާއި ބިމާއި މާތްވެގެންވާ ޢަރުޝީގެ ވެރި މާތް ﷲ ފިޔަވައި ޙައްޤުވެގެން އަޅުކަމެއްވެވޭ އެހެން އިލާހަކު ނުވެއެވެ."