ވެލާނާ އިންޓަނޭޝަނަލް އެއާޕޯޓުގައި މިއަދު ދެ ބިދޭސީންގެ މެދުގައި ހިނގި ހަމަނުޖެހުމާއި ގުޅިގެން މީހަކު ހައްޔަރުކޮށްފިއެވެ.
ފުލުހުން ބުނީ އެއާޕޯޓަށް ދިޔަ ބައެއްގެ ދެމެދުގައި ހަމަނުޖެހުމެއް ހިންގައިގެން ރިޕޯޓުކޮށްފައިވަނީ މިއަދު 15:15 ހާއިރުކަމަށެވެ.
ފުލުހުން ބުނީ މި ހަމަނުޖެހުން ހިންގާފައި ވަނީ ވޯކް ވިސާގައި ރާއްޖޭގައި އުޅޭ ސްރީލަންކާ ބައެއްގެ ދެމެދުގައި ކަަމަށާއި މި ހަމަނުޖެހުން ހިންގީ ޓެކްސީ ޑްރޮޕް ޕޮއިންޓްގައި ކަމަށެވެ.
މި މައްސަލައާ ގުޅިގެން އެތަނުން އެކަކު ވަނީ ފުލުހުންގެ ބެލުމުގެ ދަށަށް ގެންގޮސްފައިވާއިރު ފުލުހުން ދަނީ މި މައްސަލަ ތަހުގީގު ކުރަމުންނެވެ.
ރާއްޖޭގައި އުޅޭ ބިދޭސީންގެ މެދުގައި ހިނގާ މިފަދަ ހަމަނުޖެހުންތަކުގައި އާންމު އިޖްތިމާއީ މިންގަނޑަށް ނުފެތޭ ބަސް ބޭނުންކޮށް، ޕަބްލިކް ސަރަހައްދުތަކުގައި މިފަދަ ހަމަނުޖެހުންތައް ހިންގާ މައްސަލައަކީ މީގެ ކުރިންވެސް ފެންމަތިވާ މައްސަލަތަކެވެ. އަދި މިކަމަކީ އާންމުންގެ ކަންބޮޑުވުންތައް ހުރި މައްސަލައެއް ކަން ފާހަގަކޮށްލެވެއެވެ.