އިޒްރޭލުގެ ހަނގުރާމަމަތީ މަތިންދާބޯޓުތަކުން ލުބްނާނުގެ ވެރިރަށް ބެއިރޫތުގެ މެދުތެރެއަށް ރޭ ފަތިހު ވަރުގަދަ ވައިގެ ހަމަލާތަކެއްދީ، މީހުން ދިރިއުޅޭ އިމާރާތްތަކެއް ސުންނާފަތިކޮށްލައިފި އެވެ.
މިއީ ފާއިތުވި އެތައް އަހަރެއްގެ ތެރޭގައި ލުބުނާނުގެ ވެރިރަށަށް ދިން އެންމެ ވަރުގަދަ ހަމަލާތައް ކަމަށް އޮފިޝަލުން ސިފަކުރައްވާއިރު، މިއީ ސަރަހައްދީ ހަނގުރާމަ އިތުރަށް ފުޅާވެގެންދިޔަ ކަމެކެވެ.
ލުބުނާނުގެ ކަމާބެހޭ ފަރާތްތަކުން ބުނި ގޮތުގައި، މެދުތެރޭގެ އަވަށްތަކުގައި ހުރި އެޕާޓްމަންޓް އިމާރާތްތަކަށް ދިން ހަމަލާތަކުގައި މަދުވެގެން 10 މީހުން މަރުވެފައިވެ އެވެ. އަދި އެ ސަރަހައްދަށް ބޮޑެތި ގެއްލުންތަކެއް ލިބިފައިވާ ކަމަށް މަންޒަރު ދުށް މީހުން ބުންޏެވެ.
"މިއީ ހަމައެކަނި މީހުންނަށް އަނިޔާކޮށް، ބިރުގަންނުވައި، ކުޑަކުދިން ބިރުގަންނުވަން ހިންގާ އޮޕަރޭޝަނެއް،" އެ ސަރަހައްދުގައި ދިރިއުޅޭ އަބޫ ހަލީލް ބުންޏެވެ.
އޭނާ ބުނި ގޮތުގައި، އެ ސަރަހައްދުގައި އަސްކަރީ އެއްވެސް އަމާޒެއް ނެތެވެ.
މި ހަމަލާތައް ދީފައިވަނީ އީރާނުގެ މަދަދުލިބޭ ހިޒްބުއްލޯ ޖަމާއަތާ ދެކޮޅަށް އިޒްރޭލުން ކުރިއަށްގެންދާ ކެމްޕޭން ވަރުގަދަކޮށް، އެމެރިކާ އާއި އިޒްރޭލުން އީރާނާ ދެކޮޅަށް ކުރާ ހަނގުރާމައާ ގުޅުންހުރި އޮޕަރޭޝަންތަކެއް ކުރިއަށްގެންދާ ދަނޑިވަޅެއްގަ އެވެ.
އީރާނުގެ ސަލާމަތީ ކަންތައްތަކާ ބެހޭ އިސްވެރިޔާ އަލީ ލާރިޖާނީ އަވަހާރަކޮށްލިތާ އެއް ދުވަސް ފަހުން، އީރާނުގެ އިންޓެލިޖެންސް މިނިސްޓަރު އިސްމާއީލް ހަތީބު ވެސް މަރާލާފައިވާ ކަމަށް އިޒްރޭލުން ވަނީ ބުނެފަ އެވެ. އީރާނުން ލާރިޖާނީގެ މަރު ކަށަވަރުކޮށްދީ، އޭގެ ބަދަލުހިފުމުގެ ގޮތުން އިޒްރޭލަށް މިސައިލް ހަމަލާތަކެއް ދީފައިވެ އެވެ. މި ހަމަލާތަކުގައި ތެލް އަވީވް ކައިރިން ދެ މީހަކު މަރުވި އެވެ.
އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ މި މަރުތަކުގެ ސަބަބުން ގައުމު ބަލިކަށި ނުވާނެ ކަމަށާއި އީރާނަކީ ވަކި ފަރުދަކަށް ބަރޯސާވާ ގައުމެއް ނޫން ކަމަށެވެ.
މި ހަމަނުޖެހުންތައް މައިތިރިވާނެ ކަމުގެ އެއްވެސް ނިޝާނެއް ނުފެންނައިރު، އީރާނުގެ އާ ރޫހާނީ ލީޑަރު މުޖްތަބާ ހާމަނާއީ ވަނީ ހަމަލާބަދަލުކުރުން ހުއްޓާލުމުގެ ހުށަހެޅުންތަކަށް އިންކާރު ކުރައްވައި، އެމެރިކާ އާއި އިޒްރޭލު "ކަކޫ ޖައްސުވަންޖެހޭނެ" ކަމަށް ވިދާޅުވެފަ އެވެ.
މި ހަނގުރާމަ މުޅި ސަރަހައްދަށް ފެތުރިފައިވާއިރު، މިދިޔަ މަހުގެ ފަހުކޮޅު ހަނގުރާމަ ފެށި ފަހުން ލުބުނާނުން 900 މީހުން މަރުވެ 800,000 މީހުން ގެދޮރު ދޫކޮށް ގޮސްފައިވެ އެވެ. އަދި އީރާނުން 3,000އަށް ވުރެ ގިނަ މީހުން ވަނީ މަރުވެފަ އެވެ.
މި ކުރިމަތިލުންތަކުގެ ސަބަބުން ދުނިޔޭގެ ހަކަތައިގެ ބާޒާރަށް ވެސް ވަނީ ބުރޫއަރާފަ އެވެ. ހޮރްމޫޒް ކަނޑުއޮޅީގެ ބޮޑު ބައެއް ބަންދުވެ، ތެލުގެ އަގު ވަރަށް ބޮޑަށް އުފުލިފައިވާއިރު، ހަނގުރާމަ ފުޅާވަމުންދާތީ ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ.