ދެކުނު އޭޝިއާ ސަރަހައްދުގެ ފުރަތަމަ ފުޓްސަލް މުބާރާތް ކަމުގައިވާ ސާފް ފުޓްސަލް ޗެމްޕިއަންޝިޕުގައި ކުޅުނު ހުރިހާ މެޗަކުން މޮޅުވެ މުބާރާތް ނިންމާލުމަކީ ލިބުނު ބޮޑު ހިތްހަމަޖެހުމެއް ކަމަށް ޓީމުގެ ތަރި ހުޒެެއިފަތު ރަޝީދު (ހުޒޭ) ބުނެފިއެވެ. ރާއްޖެ ވަނީ މުބާރާތުގައި ކުޅުނު ހަ މެޗުވެސް ކާމިޔާބުކޮށްފައެވެ. އަދި ޗެމްޕިއަންކަން ކަށަވަރުކުރީ ބާކީ އެއް މެޗު އޮއްވައެވެ. މުބާރާތުގައި ރާއްޖެ ވަނީ ފަހު މެޗުގައި މިއަދު ސްރީ ލަންކާއާ ވާދަކޮށް 5-2 ގެ ނަތީޖާއަކުން މެޗު ކާމިޔާބުކޮށްފައެވެ. މެޗަށްފަހު ވާހަކަދައްކަމުން ހުޒޭ ބުނީ މެޗާ ދޭތެރޭ ވަރަށް ހިތްހަމަޖެހޭ ކަމަށެވެ. "ކޯޗުވެސް ޓީމުވެސް މެނޭޖްމަންޓުންވެސް ބޭނުންވި ގޮތަށް 100 ޕަސެންޓް ވިނިން ރެކޯޑާއެކު މެޗު ނިންމާލީ" މެޗަށްފަހު ހުޒޭ ބުންޏެވެ. ފުރަތަމަ މެޗުގައި ޕާކިސްތާނު އަތުން 7-1 ގެ ނަތީޖާއަކުން ރާއްޖެ މޮޅުވިއިރު، ދެވަނަ މެޗުގައި ބަންގްލަދޭޝް އަތުން މޮޅުވީ 6-1 ގެ ނަތީޖާއަކުންނެވެ. ތިންވަނަ މެޗުގައި ސަރަހައްދުގެ ގަދަބާރު އިންޑިއާ އަތުން މޮޅުވީ 5-0 އިންނެވެ. ނޭޕާލް އަތުން 2-1 އިން މޮޅުވިއިރު، ބޫޓާންގެ މައްޗަށް ކުރިހޯދީ 3-1 އިންނެވެ. ރާއްޖެއިން ވަނީ ލަންކާ މެޗާ ކުރިމަތިލީ އިރުވެސް ސަރަހައްދުގެ ތަށި ޔަގީންކޮށްފައެވެ. ރާއްޖެއިން ތަށި ކަށަވަރުކުރީ ބޫޓާނާ ދެކޮޅަށް ކުޅުނު މެޗުގައި ހޯދި ތިން ޕޮއިންޓާއެކު އެވެ. މުބާރާތުގެ ޓްރޮފީއާއެކު ޓީމު އެނބުރި ރާއްޖެ އައުމަށް ހަމަޖެހިފައިވަނީ މާދަމާރޭ އެވެ.