ހުޅުމާލޭ ދެ ވަނަ ފިޔަވަހީގައި ސަރުކާރުން އަލަށް ހުޅުވި ސްކޫލުގައި މިއަދު ކިޔަވައިދޭން ފަށައިފި އެވެ.
ވީ ކިހިނެއް؟ - މިއީ އާބާދީ ބޮޑު ދެވަނަ ފިޔަވަހީގައި ހުޅުވި ތިން ވަނަ ޕްރައިމަރީ ސްކޫލެވެ. ދެން ހުންނަނީ އެންމެ ގިނަ ދަރިވަރުން ކިޔަވާ ސަލާހުއްދީން ސްކޫލާއި ކާމިލްދީދީ ސްކޫލެވެ.
ތަފްސީލް - ޝަހީދު އަލި ރަސްގެފާނުގެ ނަމުން ނަން ދީފައިވާ އާ ސްކޫލުން، 1،950 ދަރިވަރުންނަށް ވަނީ ޖާގަ ދީފަ އެވެ. އަދި ދެ ދަންފަޅިއަށް ކިޔަވައިދޭއިރު، 230 ޓީޗަރުން ތިބޭނެ ކަމަށް އެޑިއުކޭޝަން މިނިސްޓްރީން ވަނީ ބުނެފަ އެވެ.
މިއީ މާލެ ސަރަހައްދުގައި މި ސަރުކާރުން ގާއިމް ކުރި ފުރަތަމަ ސްކޫލެވެ. އެ ސްކޫލުގެ މަސައްކަތް މިނިސްޓްރީން ފަށާފައިވަނީ 2023ގަ އެވެ.
ފަސް ބުރީގެ މި ސްކޫލުގައި:
ގްރޭޑް 1-10އާ ހަަމައަށް ކިޔަވައިދޭނެ
32 ކުދިންގެ ޖާގައިގެ 54 ކްލާސްރޫމު ހުރޭ
400 ކުދިންގެ ޖާގައިގެ އޮޑިޓޯރިއަމްއަކާއި އިންޑޯ އަދި އައުޓްޑޯ ހޯލެއް ހުރޭ 
ގިނަ އަދަދެއްގެ ކުދިންނަށް އެއް ފަހަރާ އެރޭވަރުގެ ތިން ލިފްޓްވެސް ހަރުކޮށްފައި ހުރޭ
ހިޔާ ފްލެޓްތަކުގެ ރަތް ޓަވަރުތައް ކައިރީ ހުންނަ މި ސްކޫލުގެ ކުލައަކީ ވެސް ރަތެވެ. ބޭރު ފާރުގައި، ސްކޫލުގެ ނަމާ އެކު ކުރަހާފައިވާ ލޯގޯއަށް ގިނަ ބައެއްގެ ސަމާލުކަން އަންނަނީ ލިބެމުންނެވެ.