ދިވެހި ރައްޔިތުން ގެދޮރުވެރި ކުރުވުމަށް ފަށާފައިވާ މަސައްކަތް ސަރުކާރުން ކާމިޔާބު ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ރައީސުލްޖުމްހޫރިއްޔާގެ ސްކޮލަރޝިޕާއި، ހައި އެޗީވަރސް ސްކޮލަރޝިޕްގެ ލިޔުން ހަވާލު ކުރުމުގެ ރަސްމިއްޔާތުގައި، މިރޭ ވާހަކަފުޅު ދައްކަވަމުންނެވެ.
ރައީސް ވިދާޅުވީ، ރާއްޖެއިން ބޭރުގައި މަތީ ތައުލީމު ހާސިލު ކުރުމަށް، މާލޭގައި، ސަރުކާރަށް ހިދުމަތް ކުރަން ދަރިވަރުން ނާންނަ ސަބަބުތަކުގެ ތެރޭގައި ގެދޮރުގެ ދަތިކަން ހިމެނޭ ކަމުގައެވެ. އެހެންވެ، އެކަން ހައްލު ކުރުމަށް އެމަނިކުފާނު ގެންގުޅުއްވާ ސިޔާސަތު ތަންފީޒު ކުރައްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ގިނަ ދަރިވަރުން މާލޭގައި ތައުލީމު ހާސިލު ކުރަނީ ވަރަށް ހާލުގައި، ގިނަ ބަޔަކު އެކުގައި ކުލި ދައްކައިގެން ކަމަށެވެ.
”ގެދޮރުވެރިކަމުގެ އަމާޒު ޙާސިލްކުރުމަށް ފަށާފައި އޮތް މަސައްކަތް، އިރާދަކުރެއްވިއްޔާ، ކާމިޔާބުކުރާނަން. އޭރުން ތިކުދިން އަމިއްލަ ދިރިއުޅުމެއް ފެށުމަށްޓަކައި ބޭނުންވާ ގެދޮރުވެރިކަމާއި، ޢާއިލާ އެކީގައި އުޅުމަށް ބޭނުންވާނެ ގެދޮރުވެރިކަމާއި މި ހުރިހާ އޮޕްޝަނަކަށް ވާގޮތަށް އިރާދަކުރެއްވިއްޔާ އަޅުގަނޑުމެން ގެދޮރުވެރިކަމުގެ މައްސަލަ ހައްލު ކޮށްދޭނަން.“ ރައީސް ވިދާޅުވިއެވެ.
ވެރިކަމުގެ ފަސް އަހަރުގެ ތެރޭގައި، ރާއްޖޭގެ ހުރިހ ރައްޔިތުން ގެދޮރުވެރި ކުރުވުމަކީ ރައީސް މުއިއްޒުގެ އެންމެ ފާހަގަކޮށްލެވޭ އެއް  ވައުދުފުޅެވެ. މި ވައުދު ފުއްދުމަށްޓަކައި، ރައީސް މުއިއްޒުގެ ސަރުކާރުން ފަށާފައިވާ އެންމެ ބޮޑު މަޝްރޫއު އަކީ ރަސްމާލެ ސިޓީގެ މަޝްރޫއުއެވެ.