މިއަދުގެ ޙާލަތަށް ބަލައިފިނަމަ އިސްލާމީ އުންމަތަށް ކުރިމަތިވެފައިވާ އެންމެ ބޮޑު މައްސަލައަކީ، އަދި މުޅި އުންމަތަށް ކަރުނައަޅަންޖެހިފައިވާ މައްސަލައަކީ ކޮބައިކަން އެނގޭހެއްޔެވެ؟ 
ޔަޤީނުންވެސް އެއީ ޢިލްމް ނެތުމެއް ނޫނެވެ. ޢިލްމްވެރިން ވަރަށް ގިނައެވެ. ގިނަ ބައަކަށް ވަނީ ތަންދޮރު އޮޅުންފިލައިފައެވެ. ލިޔެވިފައިވާ ފޮތްތައް އެހައި ގިނައެވެ. މަޢުލޫމާތު ހިމެނޭ އޮންލައިން ވަސީލަތްތައް އެހައި ގިނައެވެ. ވީމާ މިތިބީ ތަންދޮރު ނުއެނގިކަމަކަށް ނުބުނެވޭނެއެވެ.  
މީސްތަކުންނޭވެ! މިހެން ބުނީމާ ރުޅި ނައިސް ވިސްނައިލާށެވެ! މިއުންމަތުގައި މިއަދު އެންމެ ބޮޑު މައްސަލައަކީވެސް އެންމެ ހިތްދަތިޙާލުގައި ތިބެ ކަރުނައަޅަންޖެހިފައިވަނީވެސް ތަފާތު މައްސަލަތައް ކުރިމަތިވެ އެކަނިވެރިވުމުން ދަތިޙާލުގައި އުޅެންޖެހިފައިވާ އެކަނިވެރި މައިންނާއި އެމީހުން ބަލަމުން ގެންދާ ދަރިންނަށެވެ.  
މިދައްކަނީ ހަމައެކަނި ކައިވެނި ރޫޅުމުން އެކަނިވެރިވެފައިތިބި އަންހެނުންގެ ވާހަކައެއް ނޫނެވެ. ވާހަކަ މިދައްކަނީ ފިރިމީހާ މަރުވުމުން ހުވަފަތްވެފައިވާ އަންހެނުންނާއި ޔަތީމްވެފައިވާ ކުދިންވެސް ހިމަނައިގެންނެވެ. ފާހަގަމިކުރަނީ އެމީހުންނަށް އެހީތެރިވެ ނުދެވޭ މައްސަލައެވެ.  
ވަރިއާއި ކައިވެނީގެ މައްސަލަ ބާއްވާށެވެ! އެއީ އަބަދުވެސް އޮންނާނެ މައްސަލައެކެވެ. ބަލަންވީ އެމައްސަލައަކަށް ނޫނެވެ. ބަލަންވީ ދަތިޙާލުގައި އުޅެންޖެހިފައިވާ އަންހެނުންނަށާއި ކުދިންނަށް އެހީތެރިވުމަށެވެ. އެކަމަށް ކުރަން އޮތް ކަމަކީ އެކަނިވެރި މައިންނާއި އަދި ހުވަފަތް އަންހެނުންނާއި ކައިވެނިކޮށް އެމީހުންނަށާއި އެމީހުންގެ ގާތުގައި ތިބި ކުދިންނަށް އެހީތެރިވުމެވެ.  
ހުވަފަތްވެފައިވާ އަންހެނުންގެ ގާތުގައި އެތިބީ ނިކަމެތިވެފައި ތިބި ޔަތީމް ކުދިންނެވެ. ވަރިކުރުމަށްފަހު ދަރިންގެ ބައްޕަ އެހީތެރިނުވުމުން ނިކަމެތިވެފައި އެތިބަ ތުއްތުކުދިންނަކީ ދީނީ ގޮތުން ޔަތީމް ކުދިންކަމަށް ނުވިނަމަވެސް ޔަތީމްކުދިންނާއި އެކުދިންނާއި ހުރީ ކޮން ތަފާތެއް ހެއްޔެވެ؟ ނިކަމެތިވެފައި ތިބި ކުދިންނާއި ޔަތީމްކުދިންނަށް އެހީތެރިވުމަކީ އެންމެ މަތިވެރި އަޅުކަމުގެ ތެރޭގައި ހިމެނޭ ކަމެކެވެ.  
ތަނަވަސްކަން ހުރެގެން 2 ވަނަ އަންތބަކު ހޯދާނަމަވެސް އެފަދަ އަންހެނަކު އިޚްތިޔާރުކުރާށެވެ! ހެޔޮ ނިޔަތުގައި އެކަނބަލުންނާއި ކައިވެނިކޮށް އެކަނބަލުންނާއި ދަރިންގެ ނިކަމެތިކަން ފިލުވައިދޭނަމަ އެމީހަކު ނިކަމެތިނުކުރައްވަވާނެތެވެ. އެމީހަކަށް ﷲ ތަޢާލާ ރަހްމަތް ލައްވަވާނެތެވެ! އިން ޝާ ﷲ
 
- މަޢުލުމާތު: ޝައިޚް މުޙައްމަދު ހޮބްލޮސް