ޒަވާޖީ ހަޔާތުގެ ކަންތައްތަކާއިބެހޭ ގޮތުން ނުވަތަ ބައިވެރިޔާގެ ޢަމަލުތަކާއިބެހޭ ގޮތުން މީހުން ކުރާ ސުވާލުތަކަށް ޖަވާބުދޭން މަސައްކަތްނުކުރާށެވެ. އެންމެ ބޮޑު ސަބަބަކީ ތިބާ ޖަވާބުދޭން ބޭނުން ނުވި ނަމަވެސް ތިބާގެ މޫނުން ޖަވާބުލިބިދާނެކަމެވެ. 
މިހެން ބުނުމުން އެއީ ކިހިނެއްވެދާނެ ކަމެއްތޯ ބައެއް މީހުންގެ ހިތުގައި ސުވާލު އުފެދިދާނެއެވެ. އެކަންވާގޮތަކީ ޖަވާބުދޭން ބޭނުން ނުވިނަމަވެސް މޫނަށް އަންނަ ބަދަލުތަކުން ޖަވާބު ހާމަވަނީއެވެ. ހިތްދަތިކަމުގައި ނުވަތަ ހަމަނުޖެހުމުގައި އުޅޭނަމަ އެކަން މޫނުމަތިން އެނގިގެންދަނީއެވެ. 
އެއީ މައްސަލައެއްތޯ ކުރާ ސުވާލުގެ ޖަވާބުގައި ބުނަން ޖެހެނީ އެއީ ވަރަށް ބޮޑު މައްސަލައެއް ކަމަށެވެ. ސަބަބަކަށްވަނީ ސުވާލުކުރާ މީހާއަށް ތިބާގެ ޙަޤީޤަތް އެނގި އެކަމުގެ ނާޖާއިޒު ފައިދާ ނަގަން ފުރުޞަތުލިބެނީއެވެ. 
އެހެންވީއިރު ޙައްލަކީ ކޮބައިތޯ ކުރާ ސުވާލުގެ ޖަވާބަކީ އެފަދަ ސުވާލެއްކޮށްފިނަމަ އެކަމަށް ނުވިސްނައި ހުރެ ތިއަބާވަތުގެ ސުވާލު ނުކުރަން ބުނުމެވެ. ނުވަތަ ކޮންމެވެސް މިންވަރަކަށް މައްސަލަ ހުރިނަމަވެސް އުޅެމުން އަންނަނީ އުފާވެރިކަމުގައި ކަމަށް ބުނުމެވެ. އަދި ބައިވެރިޔާގެ ކިބައިގައި ގިނައީ ރަނގަޅު ސިފަތައްކަމަށް ބުނުމާއިއެކު ބައިވެރިޔާ އާއިއެކުގައި ޢުމުރަށް އުޅެން ބޭނުން ކަމަށް ބުނުމެވެ.  
އެހެން މީހުން ބުނާ ބަސްތަކަށް ވިސްނުމުގެ ބަދަލުގައި އަމިއްލަ ޙަޔާތުގެ ތަޖުރިބާއިން ޢިބްރަތް ޙާޞިލުކުރާށެވެ! ދިރިއުޅުމުގައި މެދުވެރިވާ ހިތްހަމަނުޖެހޭ ކަްނަކމުގެ ވާހަކަތައް ޙިއްޞާކުރުމުން އެކަމުން ފައިދާއެއް ކުރާނީ ވަރަށް މަދުމީހަކަށެވެ. ގިނަ ބައަކަށް އޮންނާނީ ކޮންމެވެސް ގޮތަކުން ބޮޑު ދެރައެއް ލިބިފައެވެ.  
ތަޖުރިބާގެ މައްޗަށް ބަލައި ބުނަންޖެހެނީ އެހެން މީހުންގެ ދިރިއުޅުމުގެ ކަންކަން އޮޅުންފިލުވައި އެހީތެރިވެދޭނެ ކަމަށް ބުނާ ގިނަ މީހުންގެ އަމިއްލަ ދިރިއުޅުމުގެ ޙާލަތު އޮންނާނީ މާގޯސް ޙާލަތެއްގައެވެ. އަދި އެހެން މީހުންގެ އެފަދަ ކަންކަން އޮޅުން ފިލުވަން ބޭނުންވުމަކީވެސް މައްސަލައެކެވެ. ކިތަންމެ ގާތް އެކުވެރިއެއްގެ ނަމަވެސް އޭނާ ހާމަކުރަން ބޭނުންނުވާ، ނުވަތަ ހާމަނުކުރާ ކަންކަން ކޮނެގެން އޮޅުންފިލުވުމަކީ ހަރުދަނާ މީހަކު ކުރާނެ ކަމެއް ނޫނެވެ.