އޭނާއަކީ ޢުމުރުން 22 ވަރަކަށް އަހަރުގެ ވަރަށް ނިކަމެތި ކުއްޖެކެވެ. މައިންބަފައިންނަކީ ވަރަށް ފަޤީރު ބައެކެވެ. ކިތަންމެ ފަޤީރުނަމަވެސް، ދަތިޙާލުގައި އުޅުނަސް ކޮންމެ މީހަކުވެސް ހިތްހަމަޖެހުން ބޭނުންވާނެތީ ހަވީރު ޕާކަކަށް ގޮސް އޭނާވެސް ގޮނޑިއެއްގައި އިނެވެ.  
އެހެން އިންދައި ފެނުނީ ޒުވާނަކު ކުއްލިއަކަށް ވެއްޓުނުތަނެވެ. ފެނުނު ގިނަ މީހުން އަޅައިވެސް ނުލިއެވެ. ދެ ޒުވާނަކު އައިސް މަސައްކަތްކުރީ އޭނާގެ ޖީބުން ވޮލެޓު ދަމައިގަނެވޭތޯއެވެ. އެވަޤުތު ބިރުކަނޑާލާފައި އެއަންހެންކުއްޖާ ގޮސް އެދެ ޒުވާނުންނާއި ކުރިމަތިލިއެވެ. "ވަގުން ވަގުން" ކިޔައި އަޑުގަދަކުރަން ފެށުމުން އެ ދެ ޒުވާނުން ދުވެ ފިލައިފިއެވެ. އެއީ ބައަކު އައިސް އެމީހުންނަށް އަނިޔާކޮށްފާނެތީއެވެ.  
އަންހެންކުއްޖާގެ މަސައްކަތުން ޒުވާނާ ނަގައި ގޮނޑިއެއްގައި ބެއިންދިއެވެ. އަދި ގައި ފޮޅައިދީ ސާފުކޮށްލައިދިނެވެ. ޒުވާނާ އެކަމަށް އަގެއްގެ ގޮތުން 1000 ރުޕީސް ދިއްކޮށްލުމުން އަންހެންކުއްޖާ ބުނީ ބޭނުން ނޫން ކަމަށެވެ. އޭނާގެ މައިންބަފައިން ބުނަނީ އަތުންފައިން މަސައްކަތްކޮށްގެން ލިބޭ ފައިސާ ނޫނީ ބޭނުން ނުކުރުމަށް ކަމަށެވެ. އަދި ޒުވާނާއަށް އޭނާ ކޮށްދިނީ މަސައްކަތް ނޫން ކަމަށާއި އަދާކުރީ އިންސާނީ ވާޖިބެއް ކަމަށެވެ.
އޭނާ ދެއްކި ވާހަކަތަކަށް ޒުވާނާ ޝައުޤުވެރިވިއެވެ. އަދި އޭނާގެ އޮފީހަށް އަނެއް ދުވަހު އައުމުން ވަޒީފާއެއްދީފާނެކަމަށް ބުނުމުން އަންހެންކުއްޖާ ބުނީ އޭނާގެ މައިންބަފައިން ފަޤީރުވީމާ އޭނާއަށް ކިޔަވައިދެވިފައި ނުވާކަމަށެވެ. ޒުވާނާ ބުނީ ނުކިޔެވި ތިބޭ މީހުންނަށްވެސް ކުރެވޭނެ މަސައްކަތް ހުންނަ ކަމަށެވެ.  
އަނެއްދުވަހު އެއޮފީހަށް ދިއުމުން ވަޒީފާއެއް ދިނެވެ. ކުނިކަހައި ތަންތަން ސާފުކުރުމުގެ ވަޒީފާއެވެ. އެވަޒީފާގައި ދުވަސްކޮޅަކު ގެންގުޅެފައި ޒުވާނާއަށް ކޮފީ ހަދައިދިނުމާއި ޒުވާނާގެ ކޮޓަރި ސާފުކޮށް ބެލެހެއްޓުމުގެ ވަޒީފާއަށް ބަދަލުކުރިއެވެ.  
އެއިގެ ދުވަސްކޮޅެއްފަހުން ޒުވާނާ އަމިއްލައަށް ގޮސް އަންހެންކުއްޖާގެ ޢާއިލާ އާއި ބައްދަލުކޮށް ކައިވެންޏަށް އެދުމުން ޢާއިލާއިން ބުނީ އެމީހުންނަކީ ވަރަށް ފަޤީރު ބައެއް ކަމަށާއި އެހެންކަމަށްވާއިރު އެހައި ތަނަވަސް މީހުންނާއި ދަރިން ކައިވެނިކުރުމުން ފެންވަރުގެ ގޮތުން ވަރަށް ތަފާތުވުމުން ކުރިމަތިވާނެ ވަރަށް ގިނަ މައްސަލަތައް ހުރެދާނެ ކަމަށެވެ.  
ޒުވާނާ ބުނީ އޭނާ ބޭނުންވަނީ އެފަދަ ކުއްޖަކު ކަމަށެވެ. އަދި ދަރިފުޅާއިމެދު ވަރަށް ބޮޑަށް އިތުބާރުކުރެވޭ ކަމަށެވެ. ވަޒީފާގައި ގެންގުޅޭތާ 2 އަހަރުވެފައިވާތީ ދަރިފުޅުގެ ކަންކަން ވަރަށް ރަނގަޅަށް އެނގޭކަމަށާއި ކައިވެނިމިކުރަނީ ހުރިހާ ކަންކަން އެނގިހެރެގެން ކަމަށެވެ.
މައިންބަފައިންގެ ރުހުމާއިއެކު ދެމީހުން ކައިވެނިކުރިއެވެ. އެކައިވެންޏަށް މިހާރު 12 އަހަރުވީއެވެ. ދެމީހުން ދިރިއުޅެމުން އަންނަނީ ވަރަށް އުފަލުގައެވެ. 
މިއީ އަޅުގަނޑު ކިޔާފައިވާ ވާހަކައެއްގެ ކުރުކުރު ޚުލާޞާއެކެވެ. އަޅުގަނޑު މިއަދުނޫހުގެ ކިޔުންތެރިންނަށް ޚާއްޞަކޮށް ކަނބަލުންނަށް ބުނެލަން ބޭނުންވަނީ ކިތަންމެ ދަތިޙާލުގައި އުޅެންޖެހުނަސް ޙަލާލު ދިރިއުޅުމެއް އުޅެން މަސައްކަތްކުރާ ކޮންމެ މީހަކަށް މިފަދަ ގޮތްތައް މިންވަރުކުރައްވަވާނެއެވެ. މިންވަރުކުރައްވަވާ ކަންކަން ތަފާތުވެދާނެއެވެ. ނަމަވެސް ހެޔޮ ގޮތްތައް މިންވަރުކުރައްވަވާނެއެވެ.  
ކޮންމެ މީހަކު ކުރާ ކޮންމެކަމަކަށްވެސް ﷲ ތަޢާލާ ބައްލަވައިވޮޑިގެންވެއެވެ. މިސާލަކަށް އެޒުވާނާ ދިން 1000 ރުޕީސްގައި ހިފިނަމަ އެހިސާބުން އެކަން އޮތީހީ ވިޔަފާރިއަކަށްވެ ނިމިފައެވެ. އެއަންހެންކުއްޖާއަށް އެހައި ރަނގަޅު މަގު ފެނިގެން އެދިއައީ އޭނާއަށް ޢަމަލުކުރެވުނު ގޮތް ރަނގަޅުވީމައެވެ. ވީމާ އަބަދުވެސް ވީހައި ރަނގަޅު ގޮތުގައި ކަންކަން ކުރަން ގަދައަޅައި މަސައްކަތްކުރާށެވެ. ރަނގަޅު ގޮތުގައި ކުރާ ކޮންމެ ކަމަކަށް ހެޔޮޖަޒާ ދެއްވަވާނެތެވެ. އިން ޝާ ﷲ  
 
- ނަޞީރާ / މިއަދުނޫހުގެ ކިޔުންތެރިއެއް