ޕްރެޒިޑެންޓްސް ކަޕްގެ ފައިނަލް މެޗު މާދަމާ ހަވީރު ކުޅޭ ގޮތަށް ގަޑިއަށް ބަދަލު ގެނެސްފި އެވެ. ޕްރެޒިޑެންޓްސް ކަޕްގެ ފައިނަލް މެޗު ކުރިން މާދަމާ ރޭ ކުޅޭ ގޮތަށް ހަމަޖެހިފައިވީ ނަމަވެސް، އެ މެޗު މާދަމާ ހަވީރު ކުޅޭ ގޮތަށް އެފްއޭއެމުން ނިންމިކަން އިއުލާންކޮށްފައި ވަނީ އެ އެސޯސިއޭޝަނުން މިއަދު ނެރުނު ނޫސްބަޔާނަކުންނެވެ. އެ މުބާރާތުގެ ފައިނަލުގައި ކްލަބު އީގަލްސް އާއި ޓީސީ ސްޕޯޓްސް ކްލަބް ބައްދަލުކުރާ މެޗު މިހާރު ކުޅޭ ގޮތަށް ހަމަޖެހިފައި ވަނީ މާދަމާ 15:50 ގަ އެވެ. ޕްރެޒިޑެންޓްސް ކަޕްގެ ފައިނަލަށް ޓީސީ އަލަށް ދަތުރުކުރި އިރު، އީގަލްސް ވަނީ ކުރިން ވެސް އެ މުބާރާތުގެ ފައިނަލެއްގައި ކުޅެފަ އެވެ. ޕްރެޒިޑެންޓްސް ކަޕް 2014ގެ ފައިނަލުގައި ނިއު ރޭޑިއަންޓް ސްޕޯޓްސް ކްލަބު އަތުން އެ ފަހަރު އީގަލްސް ބަލިވެފައި ވަނީ 1-0 ލަނޑުންނެވެ. އެހެންކަމުން މި އަހަރުގެ ޗެމްޕިއަންކަން ހޯދާ ޓީމަކަށް އެ މުބާރާތުގެ ޗެމްޕިއަންކަން ލިބޭނީ މުޅިން އަލަށެވެ. އެ މުބާރާތުގެ ފައިނަލަށް އީގަލްސް ދަތުރުކުރީ ވާދަވެރި ކުޅުމެއް ފެނިގެންދިޔަ ސެމީ ފައިނަލްގެ ފުރަތަމަ މެޗުގައި މުޅިން އަލަށް ފުރަތަމަ ޑިވިޝަންގައި ވާދަކުރި ޔުނައިޓެޑް ވިކްޓަރީ އަތުން 3-2 ލަނޑުން މޮޅުވެގެންނެވެ. އަދި ޓީސީން ފައިނަލުގެ ޖާގައެއް ހޯދީ ސެމީގެ ދެ ވަނަ މެޗުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ކްލަބު އަތުން 2-0 ލަނޑުން މޮޅުވެގެންނެވެ.